༄༅། །ཕྱི་ལོ་ ༢༠༢༣ ཟླ་བ་ ༣ ཚེས་ ༨ ཉིན་སུད་སིའི་གྲོང་ཁྱེར་ཛུ་རིག་ཏུ་རྟེན་གཞི་བྱས་པའི་རེ་ཊི་བྷག་འགྲེམས་སྟོན་ཁང་ (Reitberg Museum) དུ་གཡག་དང་མཉམ་དུ་གྷི་ལོ་བྷི་ཞེས་པའི་རི་མོའི་བརྙན་དེབ་དབུ་འབྱེད་ཀྱི་མཛད་སྒོ་ཞིག་ཚོགས་ཡོད་པ་དང་། དབུ་འབྱེད་མཛད་སྒོར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་བྷུ་ཆི་ལ་ (Thomas Büchli) ལགས། གྷི་ལོ་བྷི་པར་སྐྲུན་ཁང་གི་གྷི་སེ་ལཱ་ (Gisela Klinkenberg) ལགས། རྩོམ་པ་པོ་ཌེ་ནི་ཕི་རིག་ (Dani Frick) ལགས་དང་བྷོ་ནི་ཀོ་ལེར་ (Boni Koller) བཅས་མཉམ་ཞུགས་གནང་ཡོད།དེ་ཡང་གཡག་དང་མཉམ་དུ་གྷི་ལོ་བྷི་ཞེས་པའི་རི་མོའི་བརྙན་དེབ་དེའི་ནང་བོད་ཀྱི་རི་བོ་དང་། དགོན་སྡེ། དར་ལྕོག་སོགས་ཀྱི་རི་མོ་བྲིས་ཡོད། སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་བྷུ་ཆི་ལ་ལགས་ཀྱིས། བརྙན་དེབ་དེ་བོད་ཡིག་ཐོག་བསྒྱུར་ཐུབ་ན་དགེ་མཚན་ཆེ་བའི་སྐོར་གསུངས། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས། དཔེ་དེབ་དེ་པར་སྐྲུན་གནང་མཁན་དང་རྩོམ་པ་པོ་བཅས་ལ་ཐུགས་རྗེ་ཆེ་ཞུས་པ་དང་འབྲེལ་སུད་སིར་ཡོད་པའི་བོད་ཕྲུག་རྣམས་ཀྱིས་དཔེ་དེབ་དེ་བརྒྱུད་བོད་མིའི་ཆོས་དང་རིག་གཞུང་། ཡུལ་སྲོལ་གོམས་གཤིས་སོགས་ལ་སྦྱང་བརྩོན་གནང་ཐུབ་པའི་རེ་བ་ཡོད་སྐོར་དང་། དཔེ་དེབ་དེས་བོད་པའི་གཞོན་སྐྱེས་རྣམས་ལ་སུད་སི་ཡིས་ཕྱི་ལོ་ ༡༩༦༠ ནང་བཙན་བྱོལ་བོད་མི་རྣམས་སུད་སིར་སྣེ་ལེན་གནང་བ་དེ་དག་དྲན་གསོ་བྱ་ཐུབ་ངེས་ཡིན་པ། མ་འོངས་པར་དཔེ་དེབ་དེ་བོད་ཡིག་ཏུ་བསྒྱུར་བར་རྒྱབ་སྐྱོར་གནང་རྒྱུ་ཡིན་སྐོར་གསུངས། །