༄༅། །ཕྱི་ལོ་ ༢༠༢༣ ཟླ་བ་ ༣ ཚེས་ ༢༧ རེས་གཟའ་ཟླ་བ་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་ཚོགས་ཁང་དུ་ཌེན་མག་ནས་ཕེབས་པའི་སློབ་ཕྲུག་གྲངས་ ༢༣ དང་དགེ་རྒན་གྲངས་གཉིས་བཅས་ལ་བོད་ཀྱི་ལོ་རྒྱུས་དང་བོད་མིའི་སྒྲིག་འཛུགས་ཀྱི་སྐོར་གསུང་བཤད་གནང་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གིས་བཙན་བྱོལ་ནང་དུ་མང་གཙོའི་འཕེལ་རིམ་དང་། གཞིས་ཆགས་ཁག་ཆགས་ཚུལ། བོད་མིའི་སྒྲིག་འཛུགས་ཀྱི་སྒྲོམ་གཞི་དང་ཕྱག་ལས་གནང་ཕྱོགས། བོད་ནང་གི་ད་ལྟའི་གནས་སྟངས། བོད་ཀྱི་དངོས་ཡོད་བྱུང་རབས་ལོ་རྒྱུས་དང་རྒྱ་ནག་གཞུང་ནས་བོད་ཀྱི་ལོ་རྒྱུས་རྫུན་བཟོ་དང་འཁྱོག་བཤད་བྱེད་བཞིན་ཡོད་པའི་སྐོར་དང་། དེ་བཞིན་དཔལ་ལྡན་སྲིད་སྐྱོང་མཆོག་གིས་བཙན་བྱོལ་བོད་མིའི་འཚོ་བའི་གནས་སྟངས་སྤྱི་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་འོག་བཙན་བྱོལ་བོད་མིའི་སྤྱི་ཚོགས་ཚགས་ཆུད་ཙམ་དུ་མ་ཟད། མང་གཙོའི་ལམ་བཟང་གསོལ་སྩལ་མཛད་པའི་སྐོར། བོད་ཀྱི་ཁོར་ཡུག་ནི་ཨེ་ཤི་ཡའི་ཡུལ་གྲུ་ཁག་ལ་གལ་གནད་ཆེན་པོ་ཆགས་ཡོད་སྐོར་སོགས་ཀྱི་གསུང་བཤད་གནང་ཡོད།མཐར་དཔལ་ལྡན་སྲིད་སྐྱོང་མཆོག་གིས་གལ་ཏེ་སློབ་ཕྲུག་རྣམས་ནས་བོད་དོན་སྐོར་ཞིབ་རྒྱས་ཤེས་འདོད་ཡོད་ཚེ་བོད་ཀྱི་ལོ་རྒྱུས་ཐོག་ཉམས་ཞིབ་གནང་མཁན་དང་རྒྱལ་སྤྱིའི་ཁྲིམས་ཐོག་མཁས་པ་སྐུ་ཞབས་མཧི་ཀལ་ཝན་ཝལ་ཊ་ (Michael Van Walt) ལགས་ཀྱིས་བརྩམས་པའི་བོད་ཀྱི་གནས་ཚུལ་གནད་བསྡུས་ (The Tibet Brief 20/20) ཞེས་པའི་དཔེ་དེབ་ངེས་པར་དུ་ཀློག་དགོས་སྐོར་གསུང་གནང་ཡོད་པ་བཅས། །