༄༅། །འདི་གར་ཐའེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༠༣ ཚེས་ ༡༢ ཉིན་ཐའེ་ཝན་དུ་བོད་ཀྱི་བུད་མེད་སྒེར་ལངས་ཉིན་མོ་སྲུང་བརྩི་དང་འབྲེལ་མི་ལོ་དྲུག་བཅུའི་རིང་གི་བོད་མིའི་འགོག་རྒོལ་ཞེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་གོ་སྒྲིག་གནང་ཡོད།

དེ་ཡང་ཐའེ་ཝན་དུ་བོད་ཀྱི་བུད་མེད་སྒེར་ལངས་ཐེངས་ ༦༤ པ་དེ་བཞིན་རྒྱལ་ཡོངས་ཡང་མིང་ཆའུ་ཐུང་གཙུག་ལག་སློབ་གཉེར་ཁང་ (National Yang-Ming Chiao Tung University) གི་ཉམས་ཞིབ་སློབ་མ་སྒྲོལ་མ་ཚེ་རིང་ལགས་དང་། ནིའུ་བྷུ་ལུམ་དུས་དེབ་ (New Bloom Magazine) ཟུང་སྦྲེལ་གྱིས་ཐེངས་དང་པོ་སྲུང་བརྩི་ཞུས་ཡོད་པ་དང་། བགྲོ་གླེང་ཚོགས་འདུའི་ནང་བོད་མི་དང་། ཐའེ་ཝན་རྒྱ་རིགས། ཕྱི་རྒྱལ་བ་སོགས་མཉམ་ཞུགས་གནང་ཡོད་པ་རེད། སྐབས་དེར་སྒྲོལ་མ་ཚེ་རིང་ལགས་ཀྱིས་བགྲོ་གླེང་ཚོགས་འདུའི་བརྗོད་གཞི་ངོ་སྤྲོད་དང་། དེ་ལྟར་བདམ་དགོས་པའི་རྒྱུ་མཚན་སོགས་འགྲེལ་བརྗོད་དང་། ཕྱི་ཟླ་གསུམ་པ་ནི་རྒྱ་ནག་ལ་མཚོན་ན་སེམས་འཚབ་བྱེད་རྒྱུའི་དུས་ཤིག་ཡིན་པས་རྒྱ་གཞུང་ནས་སྐབས་དེར་བོད་ནང་དམ་བསྒྲགས་ཆེ་རུ་གཏོང་གི་ཡོད་ཅེས་སོགས་ངོ་སྤྲོད་གནང་། གཞན་ཡང་བགྲོ་གླེང་ཚོགས་འདུའི་ཐོག་ཀལ་ཀཏྟཱ་གཙུག་ལག་སློབ་གཉེར་ཁང་གི་ཉེ་བའི་སློབ་དཔོན་འཇིགས་མེད་ཡེ་ཤེས་ལགས་དང་། བོད་མི་མང་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས། ཐའེ་ཝན་གྱི་ལས་འགུལ་བ་པེང་སུ་ཧན་ (Peng Hsuan Lee) ལགས་བཅས་ནས་ཕྱི་ལོ་ ༡༩༥༩ ལོའི་བོད་མིའི་རང་དབང་སྒེར་ལངས་ཀྱི་སྤྱི་ཡོངས་ངོ་སྤྲོད་དང་། བྱེ་བྲག་ཏུ་བོད་མི་བུད་མེད་ཀྱི་རྒྱལ་ཞེན་སྙིང་སྟོབས་སྐོར་གསུང་བཤད་གནང་ཡོད་པ་རེད།

བགྲོ་གླེང་གི་གཙོ་སྐྱོང་རྒྱལ་སྤྱིའི་བོད་དོན་འབྲེལ་མཐུད་ཁང་གི་ཤར་ཨེ་ཤི་ཡའི་འབྲེལ་མཐུད་པ་དང་ནིའུ་བྷུ་ལུམ་དུས་དེབ་ཀྱི་འབྲེལ་ལས་ཨ་རོ་ར་ཆང་ (Aurora Chang) ལགས་ཀྱིས་གནང་ཞིང། ཐེངས་འདིའི་བགྲོ་གླེང་ཚོགས་འདུ་གོ་སྒྲིག་བྱེད་དགོས་པའི་རྒྱུ་མཚན་གཙོ་བོ་ཐའེ་ཝན་ནང་དུ་བོད་དོན་སྐོར་གོ་རྟོགས་རྒྱ་ཆེ་རུ་སྤེལ་རྒྱུའི་སླད་ཡིན་པ་བཅས།།