༄༅། །ཕྱི་ལོ་ ༢༠༢༣ ཟླ་ ༣ ཚེས་ ༨ དང་ ༩ ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག << ༢༠༠༨ ནས་བཟུང་ཉེ་རབས་བོད་ནང་གི་རྩོམ་རིག་རྒྱུན་སྐྱོང་དང་འགྱུར་ལྡོག ≫ ཅེས་པའི་ཐོག་ཕྱི་ཚེས་ ༨ ཉིན་ཕྱི་དྲིལ་ཀམ་པུ་ཊར་སྡེ་ཚན་གྱི་ཚོགས་ཁང་དུ་ཚོགས་འདུ་དབུ་འཛུགས་གནང་ཡོད།
ཚོགས་འདུའི་དབུ་འབྱེད་མཛད་སྒོར་སྐུ་མགྲོན་གཙོ་བོ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། དེ་བཞིན་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་དྲུང་ཆེ་བ་རི་ཟླ་བ་ཚེ་རིང་ལགས་དང་། འགན་འཛིན་གཞོན་པ་ཀུན་དགའ་རྒྱལ་མཚན་ལགས་ཕེབས་ཡོད།
མཛད་སྒོའི་ཐོག་མར་སྐུ་མགྲོན་གཙོ་བོ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་སྣང་གསལ་སྒྲོན་མེ་ཞལ་ཕྱེ་གནང་གྲུབ་མཚམས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་དྲུང་ཆེ་བ་རི་ཟླ་བ་ཚེ་རིང་ལགས་ཀྱིས་དགའ་བསུའི་གསུང་བཤད་དང་ཚོགས་འདུའི་ངོ་སྤྲོད་གནང་།
དེ་རྗེས་སྐུ་མགྲོན་གཙོ་བོ་ཕྱི་དྲིལ་བཀའ་བློན་མཆོག་གིས་ཚོགས་བཅར་བར་འཚམས་འདྲི་དང་གཏམ་བཤད་པ་རྣམ་པར་ཚོགས་འདུར་གཏམ་བཤད་གནང་རྒྱུར་དང་ལེན་གནང་བར་ཐུགས་རྗེ་གསུངས། དེ་བཞིན་ཁོང་གིས་གསུང་དོན། དེ་རིང་ཚོགས་འདུའི་བརྗོད་གཞི་འདི་ལྟ་བུ་གནད་འགག་ཆེན་པོ་ཡིན་པ་དང་། ཡང་སྒོས་ས་བྱི་ཞི་རྒོལ་ནས་བཟུང་བའི་རྩོམ་རིག་དེ་དག་བརྒྱུད་ལམ་གལ་ཆེན་པོ་ཞིག་ཡིན་པ་དང་། བོད་ནང་རྒྱ་ནག་གཞུང་གི་དམ་བསྒྲགས་ཆེན་པོ་ཡོད་བཞིན་དུ་རྩོམ་རིག་སྤེལ་བ་དེ་དག་ཆེ་མཐོང་དང་གུས་བཀུར་འོས་པ་མ་ཟད། རྩོམ་ཐོག་ཏུ་ཐོན་པ་ཙམ་མིན་པར་མ་ཐོན་པའི་གནས་སྟངས་ལའང་ཐུགས་སྣང་དགོས་ཚུལ། དེ་བཞིན་བཙན་བྱོལ་ནང་རང་དབང་དང་མང་གཙོའི་དཔལ་ལ་ལོངས་སུ་སྤྱོད་རྒྱུ་ཡོད་པ་བཞིན། བོད་ནང་གི་མགྲིན་ཚབ་པ་གནང་དགོས་པ་སོགས་གསུངས།
དབུ་འབྱེད་མཛད་སྒོའི་མཐའ་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཀུན་དགའ་རྒྱལ་མཚན་ལགས་ཀྱིས་སྐུ་མགྲོན་གཙོ་བོ་མཆོག་དང་། གཏམ་བཤད་པ། ཚོགས་བཅར་བ་བཅས་ལ་ཐུགས་རྗེ་ཆེ་ཞུའི་གསུང་བཤད་གནང་སྟེ་ཚོགས་འདུའི་དབུ་འབྱེད་མཛད་སྒོ་མཇུག་བསྒྲིལ་སོང་།
ད་ལན་ཉིན་གཉིས་ཀྱི་ཚོགས་འདུའི་ནང་གཏམ་བཤད་པ་ ༨ དང་། ཚོགས་འདུར་མཉམ་ཞུགས་གནང་མཁན་ཁོངས་བོད་མིའི་སྒྲིག་འཛུགས་ཀྱི་ལས་བྱེད་དང་། མཐོ་སློབ་དང་ལྟེ་གནས་ཁང་ཁག་གི་སྐུ་ཚབ་བཅས་བསྡོམས་མི་གྲངས་ ༤༥ ཡོད་པ་བཅས། །
