༄༅། །ཕྱི་ལོ་ ༢༠༢༣ ཟླ་བ་ ༢ ཚེས་ ༢༨ ཉིན་རྒྱ་གར་ལྷོ་ཕྱོགས་སྦོང་ལོར་གྲོང་ཁྱེར་དུ་རྟེན་གཞི་བྱས་པའི་༸ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་སྐབས་བཅུ་དྲུག་པའི་བོད་ཀྱི་མཐོ་རིམ་སློབ་མའི་ཚོགས་ཆེན་གྱི་དབུ་འབྱེད་མཛད་སྒོ་ཚོགས་ཡོད་པ་དང་། དབུ་འབྱེད་མཛད་སྒོར་སྐུ་མགྲོན་གཙོ་བོ་སྦོང་ལོར་གཙུག་ལག་སློབ་གཉེར་ཁང་གི་ཉེ་བའི་རིགས་བདག་ཇཱ་ཡ་ཀ་ར་(Jayakara S.M) ལགས་དང་རིགས་དྲུང༌ཨེན་མ་ཧེཤ་བྷ་བྷུ་ (N Mahesh Babu) ལགས། དེ་བཞིན་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་སྐུ་མགྲོན་གཞན་ཁག་སོགས་ཕེབས་ཡོད།

དེ་ཡང་སྐུ་མགྲོན་གཙོ་བོ་སྦོང་ལོར་གཙུག་ལག་སློབ་གཉེར་ཁང་གི་ཉེ་བའི་རིགས་བདག་ཇཱ་ཡ་ཀ་ར་ལགས་ཀྱིས། རྒྱ་གར་གྱི་མཐོ་རིམ་ཤེས་ཡོན་སློབ་གསོ་དང་། རྒྱ་གར་རྒྱལ་ཡོངས་ཤེས་ཡོན་སྲིད་བྱུས་ཀྱི་ཀ་བ་ལྔའི་སྐོར་ངོ་སྤྲོད་གནང་ཡོད། གཞན་ཡང་ཁོང་གིས་བོད་རིགས་གཞོན་སྐྱེས་རྣམས་ཀྱིས་བོད་རང་གི་རིག་གཞུང་མི་ཉམས་རྒྱུན་འཛིན་གནང་དགོས་པའི་གལ་གནད་སྐོར་གསུངས་པ་དང་འབྲེལ་མགྲོན་འབོད་གནང་བར་ཐུགས་རྗེ་ཆེ་ཞུས་གནང་ཡོད།ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་རྩོམ་ཡིག་གཅེས་བསྡུས་ཀྱི་དཔེ་དེབ་དབུ་འབྱེད་གནང་རྗེས་ཤེས་ཡོན་གྱི་གལ་གནད་དང་། ཕྱི་ལོ་ ༡༩༥༩ ལོ་ནས་ད་བར་གྱི་བཙན་བྱོལ་བོད་མིའི་ཤེས་ཡོན་སློབ་གསོའི་བྱུང་བ་སོགས་ཀྱི་སྐོར་གསུངས་གྲུབ་མཚམས་རྒྱ་གར་དབུས་གཞུང་དང་མངའ་སྡེ་གཞུང་གཉིས་ནས་བཙན་བྱོལ་བོད་མི་གཞོན་སྐྱེས་རྣམས་ཀྱིས་རང་གི་རིག་གཞུང་དང་སྐད་ཡིག་མི་ཉམས་རྒྱུན་འཛིན་གནང་སླད་རྒྱབ་སྐྱོར་གནང་བཞིན་པར་ཐུགས་རྗེ་ཆེ་ཞུས་གནང་ཡོད།

མཐར་བོད་ཀྱི་མཐོ་རིམ་སློབ་མའི་ཚོགས་ཆེན་གོ་སྒྲིག་པས་སྐུ་མགྲོན་གཙོ་བོ་དང་སྐུ་མགྲོན་གཞན་རྣམས་ལ་སྟོན་པའི་སྐུ་ཐང་རེ་ཕུལ་ཡོད། སྐབས་བཅུ་དྲུག་པའི་བོད་ཀྱི་མཐོ་རིམ་སློབ་མའི་ཚོགས་ཆེན་དེ་བཞིན་ཕྱི་ལོ་ ༢༠༢༣ ཟླ་བ་ ༢ ཚེས་ ༢༨ ཉིན་ནས་འགོ་བཙུགས་ཏེ་ཕྱི་ཟླ་ ༣ ཚེས་ ༥ བར་འཚོག་གི་ཡོད་པ་བཅས།།