༄༅། །ཕྱི་ལོ་ ༢༠༢༣ ཟླ་བ་ ༢ ཚེས་ ༡༥ ཉིན་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ནིའུ་ཛི་ལེནྜའི་བོད་རིགས་ཚོགས་པའི་འགོ་ཁྲིད་དང་ལྷན་དྲ་ལམ་བརྒྱུད་ཚོགས་འདུ་བསྐོང་ཚོགས་གནང་ཡོད་པ་དང་། སྐབས་དེར་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཨོསྟྲེ་ལི་ཡཱ་སྐུ་ཚབ་དོན་ཁང་གི་ལས་དོན་གཙོ་བོ་ཁག་ངོ་སྤྲོད་དང་འབྲེལ་བོད་མི་ནང་ཁུལ་རྡོག་རྩ་ཆིག་སྒྲིལ་དགོས་པ་དང་། བོད་ཀྱི་རིག་གཞུང་དང་ངོ་བོ་སྲུང་སྐྱོབ་དགོས་པ། བོད་རིགས་གཞོན་སྐྱེས་རྣམས་ལ་བོད་ཀྱི་སྐད་ཡིག་དང་རིག་གཞུང་སྐོར་སློབ་ཁྲིད་དགོས་རྒྱུ་ཧ་ཅང་གལ་ཆེན་པོ་ཡིན་པའི་སྐོར་གསུངས་ཡོད།
དེ་ཡང་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཚོགས་བཅར་བ་རྣམས་ལ་ནིའུ་ཛི་ལེནྜ་ས་གནས་བོད་རིགས་མི་མང་དང་འབྲེལ་བའི་གལ་ཆེའི་ལས་དོན་ཁག་གཅིག་ངོ་སྤྲོད་དང་འབྲེལ་ལས་དོན་དེ་དག་སྒྲུབ་སླད་མཐུན་འགྱུར་དང་རྒྱབ་སྐྱོར་ཡོང་བའི་རེ་སྐུལ་གནང་ཡོད་པ་མ་ཟད། བོད་དོན་སླད་ལྷག་བསམ་རྣམ་དག་གིས་ཕྱག་ལས་གནང་བཞིན་པར་ཐུགས་རྗེ་ཆེ་ཞུས་གནང་བ་དང་ཆབས་ཅིག་མ་འོངས་བོད་དོན་ལས་འགུལ་ཆེད་སྐུ་ཚབ་དོན་ཁང་ནས་མཐུན་འགྱུར་དང་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད།
ཕྱོགས་མཚུངས་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ནིའུ་ཛི་ལེནྜ་ཁུལ་གྱི་བོད་རིགས་ཡོངས་ལ་འཆར་ལ་ཉེ་བའི་བོད་ཀྱི་ལོ་གསར་ལ་འཚམས་འདྲི་དང་འབྲེལ་མ་འོངས་པར་དངོས་སུ་ཐུག་འཕྲད་ཡོང་སྐོར་གསུང་གནང་ཡོད།
དྲ་ལམ་ཚོགས་འདུའི་ཐོག་ནིའུ་ཛི་ལེནྜའི་ཨོག་ལེན་ཌི་ས་གནས་བོད་རིགས་ཚོགས་པའི་ཚོགས་གཙོ་སྙན་གྲགས་ལགས་དང་འགན་འཛིན་ལྷན་ཚོགས་ཀྱི་ཚོགས་མི། ནིའུ་ཛི་ལེན་ཌིའི་དུ་ནེ་དིན་ས་གནས་ནས་བློ་བཟང་ཟླ་བ་ལགས་བཅས་མཉམ་ཞུགས་གནང་ཡོད། །
