༄༅། །ཕྱི་ལོ་ ༢༠༢༣ ཟླ་བ་ ༠༡ ཚེས་ ༢༧ དང་ ༢༨ ཉིན་གནས་མཆོག་རྡོ་རྗེ་གདན་དུ་བྱང་ཆུབ་ཆེན་པོའི་མཆོད་རྟེན་འཛིན་སྐྱོང་ཚོགས་པ་དང་གྷ་ཡ་ཡུལ་སྐོར་སྤྲོ་འཆམ་ལས་ཁུངས་གཉིས་ཀྱི་གོ་སྒྲིག་ཞུས་པའི་ནང་པའི་དུས་སྟོན་ཐོག་བོད་ཀྱི་ཟློས་གར་ཚོགས་པའི་འཁྲབ་སྟོན་རུ་ཁག་མགྲོན་འབོད་གནང་བ་ལྟར་བོད་ཀྱི་སྲོལ་རྒྱུན་འཁྲབ་སྟོན་ཁག་གཅིག་གཟིགས་འབུལ་ཞུས་ཡོད་པ་རེད། 

དུས་སྟོན་གྱི་དབུ་འབྱེད་མཛད་སྒོའི་ཐོག་བི་ཧཱར་མངའ་སྡེ་གཞུང་གི་སྤྱི་ཁྱབ་བློན་ཆེན་གཞོན་པ་སྐུ་ཞབས་ཏེ་ཇསྦཱི་པྲ་སཱད་ཡཱ་དབ་མཆོག་གཙོས་པའི་ཨེ་ཤི་ཡའི་རྒྱལ་ཁབ་འདྲ་མིན་ནས་ཕེབས་པའི་འཁྲབ་སྟོན་པ་ཁག་མཉམ་ཞུགས་གནང་ཡོད་པ་དང་། སྐབས་དེར་བོད་ཀྱི་ཟློས་གར་ཚོགས་པའི་འཁྲབ་སྟོན་པ་རྣམས་ནས་སེངྒེའི་གར་དང་གཞན་ཡང་སྲོལ་རྒྱུན་གཞས་སྣ་ཁག་གཅིག་གཟིགས་འབུལ་ཞུས་ཡོད་པ་བཅས།།