༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། རྒྱ་ནག་གཞུང་གིས་བོད་རང་སྐྱོང་ལྗོངས་ཞེས་པའི་འགོ་ཁྲིད་མཐོ་གྲས་ནང་རྒྱ་མི་ལྡབ་འགྱུར་གྱིས་མང་བ་བསྐོ་གཞག་བྱས་ཡོད་པ་མ་ཟད། བོད་ནང་གི་བོད་མི་གཞོན་སྐྱེས་རྣམས་ལས་ཁུངས་ཀྱི་དྲུང་ཡིག་སོགས་གནས་རིམ་མཐོ་གྲས་སུ་འཛུལ་ཞུགས་བྱེད་པར་མཐོ་སློབ་ཐོན་པའི་ཨང་རིམ་མཐོ་གྲས་ཁག་དྲག་འདེམས་བྱེད་ཀྱི་ཡོད་པར་བརྟེན་བོད་གཞིས་ཀ་རྩེ་ཁུལ་གྱི་བོད་མི་ན་གཞོན་རང་ལོ་ ༡༨ ལོན་པ་དང་། མཐོ་འབྲིང་གི་སློབ་ཚད་ཐོན་པ་ཁག་དམག་མིར་འཛུལ་ཞུགས་མ་བྱེད་ཐབས་མེད་ལྟ་བུ་ཆགས་ཡོད་འདུག་པ་དང་། སློབ་གྲྭ་ཁག་གི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་རྒྱལ་ཁབ་ཁ་བྲལ་གཏོང་མཁན་རེད་ཅེས་སློབ་ཕྲུག་ཚོའི་བསམ་བློ་བསྒྱུར་ཐབས་ཀྱི་སློབ་གསོའི་ལས་འགུལ་མུ་མཐུད་སྤེལ་བཞིན་ཡོད་འདུག
དེ་བཞིན་དཀར་མཛེས་ཁུལ་དཔལ་ཡུལ་རྫོང་གི་ཕྱི་ལོ་ ༢༠༢༢ ལོའི་ལོ་འཁོར་ལས་བསྡོམས་ནང་། མི་རིགས་མཐུན་སྒྲིལ་གྱི་མཉམ་ཤུགས་མངོན་པར་བྱས་པ་ཞེས་པའི་འགོ་བརྗོད་འོག བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བའི་ཁ་ཕྱོགས་མཐའ་འཁྱོངས་དང་། ཁྲིམས་ལྟར་ཆོས་ལུགས་ལས་དོན་དོ་དམ་བྱེད་ཤུགས་ཆེ་རུ་བཏང་ཡོད་པའི་སྐོར། ཡ་ཆེན་སྒར་དགོན་པའི་ལས་དོན་ཐད། ཡ་ཆེན་ཆོས་སྒར་གྱི་གྲྭ་བཙུན་གྲངས་ ༤༦༥༡ ཕྱིར་ཕུད་དང་། གྲྭ་ཤག་ ༤༡༢༠ མེད་པར་བཟོས་ཡོད་པ་བཀོད་ཡོད་འདུག་པ་བཅས། །
