༄༅། །ཕྱི་ལོ་ ༢༠༢༣ ཟླ་བ་ ༠༢ ཚེས་ ༠༥ ཉིན་མན་ཊི་ས་གནས་འགོ་འཛིན་བསྟན་འཛིན་ཚུལ་ཁྲིམས་ལགས་ཀྱིས་ཧི་མཱ་ཅལ་མངའ་སྡེའི་ཡོང་འབབ་དང་། སྐྱེད་ཚལ་རིག་པ། ཚོ་ཁག་ཡར་རྒྱས་ལྷན་ཁང་གི་བློན་ཆེན་སྐུ་ཞབས་ཇ་གཏ་སིངྒ་ནེ་གཱི་ (Jagat Singh Negi, Minster of Revenue, Horticulture and Tribal Development) མཆོག་ལ་འཚམས་འདྲིའི་མཇལ་བཅར་ཞུས་ཡོད་པ་རེད།

སྐབས་དེར་ས་གནས་འགོ་འཛིན་བསྟན་འཛིན་ཚུལ་ཁྲིམས་ལགས་ཀྱིས་སྐུ་ཞབས་ཇ་གཏ་སིངྒ་ནེ་གཱི་མཆོག་ལ་འོས་བསྡུའི་རྒྱལ་ཁ་ཐོབ་པ་མ་ཟད། མངའ་སྡེའི་བློན་ཆེན་དུ་བསྐོ་གཞག་བྱུང་བར་འཚམས་འདྲི་ཞུས་པ་དང་ཆབས་ཅིག ཧི་མཱ་ཅལ་མངའ་སྡེ་དང་རྒྱ་གར་གཞུང་དམངས་གཉིས་ནས་ཕྱི་ལོ་ ༡༩༦༠ ཙམ་ནས་བོད་མིར་རྒྱབ་སྐྱོར་མཐུན་གྲོགས་གནང་བར་ཐུགས་རྗེ་ལེགས་འབུལ་ཞུས་ཡོད། གཞན་ཡང་ས་གནས་འགོ་འཛིན་གྱིས་ཁོང་ལ་རྒྱ་གར་གཞུང་གིས་གཏན་ལ་ཕབ་པའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ དང་། ཧི་མཱ་ཅལ་མངའ་སྡེའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༥ བཅས་ངོ་སྤྲོད་གནང་བ་མ་ཟད། མཚོ་པདྨ་དང་སྤོན་ཌོ་བཀྲ་ཤིས་གླིང་བོད་མིའི་གཞིས་ཆགས་ཀྱི་ས་བོགས་དུས་འགྱངས་ཞུ་སྒོའི་སྐོར་སྙན་སེང་དང་སྦྲགས་ཞུ་སྙན་ཕུལ་ཏེ་དེ་དོན་རོགས་སྐྱོར་གནང་སྐྱོང་ཡོང་བའི་འབོད་སྐུལ་ཞུས་པར་བློན་ཆེན་མཆོག་གིས་དེ་ལུགས་བོད་མིའི་ཁེ་ཕན་ལ་དམིགས་ཏེ་དགོངས་བཞེས་གནང་རྒྱུའི་ཞལ་བཞེས་གནང་ཡོད་པ་བཅས།།