༄༅། །ཕྱི་ལོ་ ༢༠༢༣ ཟླ་བ་ ༢ ཚེས་ ༡༤ རེས་གཟའ་མིག་དམར་ཉིན་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་རྡ་ས་གཞུང་གི་མཐོ་སློབ་ཏུ་ (Jagori charitable trust) ཞེས་པའི་གཞུང་ཁོངས་མིན་པའི་ཚོགས་པས་གོ་སྒྲིག་ཞུས་པའི་བུད་མེད་ལ་རྩུབ་སྤྱོད་འགོག་ཐབས་ཀྱི་རོལ་དབྱངས་མཛད་སྒོར་སྐུ་མགྲོན་གཙོ་བོར་ཆེད་ཕེབས་ཀྱིས་གསུང་བཤད་གནང་ཡོད།སྐབས་དེར་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་གསུང་དོན། དེ་རིང་འདིར་བྱིས་པ་ཆུང་ངུ་རྣམས་ནས་འཁྲབ་སྟོན་གནང་བར་ཧ་ཅང་དགའ་པོ་བྱུང་། རྒྱ་ནག་གཞུང་གིས་བོད་ས་བཙན་བཟུང་གིས་ད་ལྟའི་ཆར་བོད་པའི་ཕྲུ་གུ་ས་ཡ་གཅིག་ཙམ་རང་གི་ཕ་མ་དང་ཁ་བྲལ་ཏེ་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བཙན་པོས་བཏང་སྟེ་ཆབ་སྲིད་ཀྱི་སློབ་གསོ་སྤྲོད་བཞིན་ཡོད་པ་མ་ཟད། ཆབ་སྲིད་ཀྱི་སློབ་གསོ་དེ་བརྒྱུད་བོད་པའི་ངོ་བོའི་རྩ་བ་སྟེ་ཆོས་དང་རིག་གཞུང་། སྐད་ཡིག  ཡུལ་སྲོལ་གོམས་གཤིས་སོགས་རྩ་གཏོར་དུ་བཏང་ནས་བོད་མིའི་རིག་གཞུང་དང་ཡུལ་སྲོལ་གོམས་གཤིས་སོགས་ཧན་མི་རིགས་ཀྱི་རིག་གཞུང་ཅན་དུ་སྒྱུར་བཞིན་ཡོད། ཅེས་སོགས་ཀྱི་གསུང་བཤད་གནང་། །