༄༅། །འདི་གར་བལ་ཡུལ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་རྒྱལ་ལོ་ ༢༡༥༠ རབ་གནས་ཆུ་ཡོས་ལོའི་བོད་ཟླ་ ༡ ཚེས་ ༤ ཕྱི་ལོ་ ༢༠༢༣ ཟླ་བ་ ༢ ཚེས་ ༢༣ རེས་གཟའ་ཕུར་བུའི་ཉིན་བལ་ཡུལ་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག་འཇོ་ཁེལ་བསམ་གྲུབ་གླིང་བཟོ་གཞིས་ཐང་ཆེན་དུ་བལ་ཡུལ་བོད་ཀྱི་ལོ་གསར་དགྱེས་སྟོན་གཟབ་རྒྱས་བྱུང་བ་དང་། དེ་ཡང་སྐབས་དེའི་མཛད་སྒོའི་ཐོག་སྐུ་མགྲོན་གཙོ་བོ་དཔལ་མཉམ་མེད་རི་བོ་དགེ་ལྡན་པའི་བསྟན་པའི་མཛེས་རྒྱན་བྱང་རྩེ་ཆོས་རྗེ་སྒོ་སོག་རིན་པོ་ཆེ་མཆོག་དང་། བལ་ཡུལ་སྐུ་ཚབ་དོན་གཅོད་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས། མཁན་བླ་ཁག དམིགས་བསལ་སྐུ་མགྲོན་ཨ་རི་གཞུང་ཚབ་ཆེན་མོ་ (Dean R Thompson) ལགས། སུད་སི་གཞུང་ཚབ་ཆེན་མོ་ (Elisabeth Von Capeller) ལགས། ཨོསྟྲེ་ལི་ཡཱ་གཞུང་ཚབ་ཆེན་མོ་ (Fellcity Volk) ལགས།གཞན་ཡང་བལ་ཡུལ་ནང་གི་གཞུང་ཚབ་ཁག་གཅིག་གི་སྐུ་ཚབ། དེ་བཞིན་ཕྱོགས་བཞུགས་སྤྱི་འཐུས་དང་སྤྱི་ཟུར་རྣམ་པ། བལ་ཡུལ་ཁུལ་གྱི་ས་གནས་འཐུས་ཚོགས་ཁག་དང་ས་གནས་འགོ་འཛིན་ཁག ས་གནས་རང་བདེན་ཚོགས་ཆུང་ཁག་གི་ཚོགས་གཙོ། ཤེས་རིག་དཔར་ཁང་བཅས་པའི་འགན་འཛིན། དགོན་སྡེ་ཚོགས་སྐྱིད་ཁག་གི་འགན་འཛིན། བལ་ཡུལ་ནང་གི་འགྲོ་བ་མིའི་ཐོབ་ཐང་གི་ཚོགས་གཙོ་ཁག གཞན་ཡང་བལ་པོའི་གནད་ཡོད་མི་སྣ་དང་། ལྷག་པར་ཧི་མ་ལ་ཡའི་ཚོགས་པ་ཁག་གི་ཚོགས་གཙོ་ཁག ཕྱོགས་མཚུངས་བོད་མི་དང་ཧི་མ་ལ་ཡའི་སེར་སྐྱ་སྟོང་ཕྲག་ཙམ་འདུ་འཛོམས་ཀྱི་བོད་ཀྱི་ལོ་གསར་དེ་སྔ་ལས་གཞི་རྒྱ་ཆེ་བ་གནང་ཐུབ་པ་བྱུང་། དེ་ཡང་ཡུལ་ཁྲིམས་དང་མཐུན་པའི་སྒོ་ནས་བཀའ་འཁྲོལ་གྱིས་བོད་ཀྱི་རིག་གཞུང་སྲུང་སྐྱོབ་ཆེད་བལ་ཡུལ་ཀཐ་མན་ཀྲུ་ཁུལ་གྱི་བོད་མིའི་སློབ་གྲྭ་ཁག་བཞི་དང་། ཆོལ་ཁ་གསུམ་གྱི་སྐྱིད་སྡུག ལྷག་བསམ་ཅན་རྣམས་ནས་གཞས་སྣ་དང་གཡག་སེང་སོགས་འཁྲབ་སྟོན་ལེགས་པར་གནང་བ་དང་། དེ་རྗེས་གཞུང་འབྲེལ་མཛད་སྒོར་མཐུན་འགྱུར་གནང་མཁན་གྱི་མི་སྣ་ལྷག་བསམ་ཅན་ཁག་དང་། འཁྲབ་སྟོན་གནང་མཁན་གྱི་ཚོགས་སྐྱིད་རྣམས་ལ་གཟེངས་བསྟོད་ཕྱག་འཁྱེར་རེ་ཕུལ།

དེ་ནས་མཐུ་སྨོན་མཚམས་སྦྱོར་གྱི་བཀྲ་ཤིས་རྣམ་ཐར་དང་འབྲེལ་ཀི་སྭོ་ལྷ་རྒྱལ་བཅས་གཞུང་འབྲེལ་མཛད་སྒོ་ལེགས་པར་གྲུབ་ཡོད་པ་བཅས། །