༄༅། །ཕྱིི་ལོ་ ༢༠༢༣ ཟླ་བ་ ༢ ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཝིཀ་ཊོ་རི་ཡ་གླིང་ཕྲན་ནས་ཕེབས་ཐོན་གྱིས་ཕྱི་དྲོ་ཀེལ་གྷེ་རི་གྲོང་ཁྱེར་དུ་ཕེབས་འབྱོར་གནང་ཞིང་། གནམ་ཐང་དུ་ཨལ་བྷར་ཊ་བོད་རིགས་ཚོགས་པའི་ཚོགས་གཞོན་དང་རྒྱུན་ལས། གཞན་ཡང་མང་ཚོགས་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།  དེ་རྗེས་ཚོགས་པའི་སྤྱི་ཁང་དུ་རྒྱུན་ལས་དང་ལྷན་མཇལ་མོལ་གནང་ཡོད།ཕྱི་ཚེས་  ༡༧ ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ས་གནས་ཀྱི་སྤྱི་ཁང་དུ་གཞོན་སྐྱེས་རྣམས་དང་ཟུར་དུ་ཐུག་འཕྲད་ཀྱིས་བོད་ཀྱི་རྒྱལ་རབས་ལོ་རྒྱུས་དང་། བོད་ཀྱི་ཡུལ་ལྗོངས་དང་ས་བབ་ཆགས་ཚུལ། བོད་མིའི་སྒྲིག་འཛུགས་ཀྱི་སྐོར་ངོ་སྤྲོད་དང་། ཁེ་ན་ཌར་བོད་མི་ཐོག་མ་སླེབས་ཚུལ་གྱི་ལོ་རྒྱུས།  རྒྱ་ནག་གཞུང་ནས་བོད་ནང་དྲག་གནོན་ཅན་གྱི་སྲིད་བྱུས་ལག་བསྟར་བྱེད་བཞིན་པའི་སྐོར་དང་། བོད་དོན་ཞུ་གཏུག་ལས་འགུལ་ནང་གཞོན་སྐྱེས་རྣམས་མཉམ་ཞུགས་གནང་དགོས་པ་དང་འབྲེལ་འགོ་ཁྲིད་གང་མང་ཐོན་ཐབས་དགོས་ངེས་སོགས་ཀྱི་སྐོར་གསུང་བཤད་གནང་རྗེས་དྲི་བ་ཁག་ལ་ལན་འདེབས་གནང་ཡོད། ཕྱི་ཚེས་ ༡༧ ཉིན་གྱི་ཕྱི་དྲོ་དཔལ་ལྡན་སྲིད་སྐྱོང་མཆོག་ (Calgary Downtown Kerby Centre) ཞེས་པའི་ཚོགས་ཁང་དུ་ཕེབས་འབྱོར་སྐབས་མང་ཚོགས་ནས་བོད་ལུགས་ལྟར་སྣེ་ལེན་གཟབ་རྒྱས་ཞུས་ཡོད། ཚོགས་འདུར་དཔལ་ལྡན་ཆེས་མཐོའི་ཁྲིམས་ཞིབ་པ་ཆེ་བ་ཟུར་པ་བཀའ་བརྒྱུད་དོན་གྲུབ་མཆོག་དང་། གཞུང་ཞབས་ཟུར་པ་ཁག་གཅིག་ཕེབས་གནང་འདུག མཛད་རིམ་ལྟར་ཐོག་མར་གཟའ་མཇུག་སློབ་གྲྭའི་སློབ་ཕྲུག་རྣམས་ནས་གཞས་སྣ་གཟིགས་འབུལ་ཞུས་རྗེས་ས་གནས་བོད་རིགས་ཚོགས་པའི་ཚོགས་གཞོན་གྱིས་དགའ་བསུའི་གསུང་བཤད་དང་ལས་བསྡོམས་སྙིང་བསྡུས་སྙན་སྒྲོན་ཞུས་གྲུབ་མཚམས་སྐུ་ཚབ་དོན་གཅོད་རྣམ་རྒྱལ་ཆོས་སྒྲུབ་ལགས་ཀྱིས་དཔལ་ལྡན་སྲིད་སྐྱོང་མཆོག་གི་ཐེངས་འདིའི་བྱང་ཨ་རིའི་ཁུལ་གྱི་གྲུབ་ཟིན་པའི་མཛད་རིམ་ཁག་གཅིག་དང་།  རྒྱལ་ས་ཝ་ཤིང་ཊོན་ཌི་སི་རུ་གནད་ཡོད་མི་སྣ་དང་མཇལ་འཕྲད་གནང་བའི་གནས་ཚུལ་ཁག་གཅིག་ངོ་སྤྲོད་སྙིང་བསྡུས་གནང་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འཚམས་འདྲི་དང་འབྲེལ་མང་ཚོགས་ལ་གསུང་བཤད་གནང་ཡོད།

དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྲིད་སྐྱོང་གི་ཐུགས་འགན་བཞེས་ཏེ་འདས་པའི་ལོ་གཅིག་དང་ཟླ་བ་བརྒྱད་སོང་རིང་སྐབས་ ༡༦ པའི་བཀའ་ཤག་གི་སྤྱི་ཡོངས་ཀྱི་དགོངས་པ་བཞེས་ཕྱོགས་དང་།  ད་བར་གྱི་ལས་དོན་ཆེ་ཁག་རྣམས་ས་གནས་མང་ཚོགས་ལ་ལས་བསྡོམས་ཀྱི་ཚུལ་དུ་སྙན་སེང་ཞུས་གནང་པའི་ནང་།  གཞིས་ཆགས་སྲ་བརྟན་ཡོང་སླད་གཞིས་ཆགས་ཀྱི་དགོས་མཁོ་ཇི་ཡིན་མཁྱེན་རྟོགས་གནང་སྟངས་སྐོར།  བོད་མིའི་སྒྲིག་འཛུགས་ཀྱི་སྒྲོམ་གཞི་བརྟན་པོ་ཇི་ལྟར་བཟོ་ཐབས་གནང་བའི་སྐོར།  སྲི་ཞུའི་ལས་བྱེད་རྣམས་ཀྱི་ནུས་ཤུགས་སྔར་ལས་ཆེ་རུ་གཏོང་ཐབས།  གཞིས་ཆགས་རྒྱུན་གནས་ཐུབ་ཐབས་དང་བོད་མི་མི་ཉུང་བ་ཞིག་ལ་སྡོད་གནས་ཀྱི་དཀའ་ངལ་འཕྲད་བཞིན་པར་སེལ་ཐབས་སྐོར། ཨ་རིའི་གྲོས་ཚོགས་འོག་མའི་ནང་བསྒྱུར་བ་ཕྲན་བུ་ཕྱིན་ཡོད་པར་ཁོང་རྣམ་པ་དང་མཇལ་མོལ་དང་། བོད་དོན་ཁྲིམས་འཆར་གསར་པ་ངོ་སྤྲོད་ཟིན་པར་གཏན་འབེབས་ཡོང་སླད་འབད་བརྩོན་གནང་བཞིན་པ་སོགས་ཀྱི་སྐོར་གསུང་བཤད་གནང་གྲུབ་མཚམས་མང་ཚོགས་ཁྲོད་ནས་བསམ་འཆར་དང་།  དྲི་བར་ལན་འདེབས་གསལ་བཤད་གནང་སྟེ་ཐེངས་འདིའི་ཨ་རི་ཁུལ་གྱི་གཞུང་འབྲེལ་ཕྱོགས་ཕེབས་ཀྱི་མཛད་འཆར་ཁག་ལེགས་པར་གྲུབ་ཡོད་པ་བཅས། །