༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་གྲོང་ཁྱེར་སོལཊ་ལེཀ་སི་ཊིའི་མཛད་འཆར་ཁག་ལེགས་གྲུབ་རྗེས་ཕྱི་ལོ་ ༢༠༢༣ ཟླ་བ་ ༢ ཚེས་ ༡༢ ཉིན་གྱི་སྔ་དྲོ་སྤོཊ་ལེནཌ་ཕེབས་ཐོན་གྱིས་ཉིན་རྒྱབ་ས་གནས་སུ་ཕེབས་འབྱོར་གནང་ཞིང་། གནམ་ཐང་དུ་ནུབ་བྱང་བོད་མིའི་རིག་གཞུང་ཚོགས་པའི་ཚོགས་གཙོ་དང་རྒྱུན་ལས། གཞན་ཡང་མང་ཚོགས་ཁག་ཅིག་ནས་ཕེབས་བསུའི་སྣེ་ལེན་ཞུས་ཡོད།
ཕྱི་དྲོ་ས་གནས་བོད་རིགས་ཚོགས་པའི་ཚོགས་ཁང་དུ་ཕེབས་འབྱོར་སྐབས་ཁུལ་དེའི་མང་ཚོགས་ནས་དགའ་བསུའི་སྣེ་ལེན་གཟབ་རྒྱས་ཞུས་གྲུབ་མཚམས་ཐོག་མར་གཟའ་མཇུག་སློབ་གྲྭའི་སློབ་ཕྲུག་དང་ཐུགས་འཕྲད་ཀྱིས་འཛིན་ཁང་ཁག་ལ་གཟིགས་སྐོར་གནང་རྗེས་གཞོན་སྐྱེས་རྣམས་དང་ཟུར་དུ་ཐུག་འཕྲད་ཀྱིས་གསུང་བཤད་གནང་ཡོད། 
དེ་རྗེས་མཛད་རིམ་ལྟར་ས་གནས་བོད་རིགས་ཚོགས་པའི་ཚོགས་གཙོས་དགའ་བསུའི་གསུང་བཤད་གནང་གྲུབ་བསྟུན་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་དཔལ་ལྡན་སྲིད་སྐྱོང་མཆོག་གི་ཐེངས་འདིའི་བྱང་ཨ་རིའི་ཁུལ་གྱི་གྲུབ་ཟིན་པའི་མཛད་རིམ་ཁག་ཅིག་དང་། རྒྱལ་ས་ཝ་ཤིང་ཊོན་ཌི་སི་རུ་གནད་ཡོད་མི་སྣ་མཇལ་འཕྲད་ཀྱིས་གནས་ཚུལ་ཁག་ཅིག་ངོ་སྤྲོད་སྙིང་བསྡུས་གནང་རྗེས་དཔལ་ལྡན་སྲིད་སྐྱོང་མཆོག་གིས་མང་ཚོགས་ལ་གསུང་བཤད་གནང་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས་མང་ཚོགས་ལ་སོ་སོའི་རྒྱལ་ཁབ་ཀྱི་ལོ་རྒྱུས་ལ་དོ་སྣང་དང་ཤེས་རྟོགས་དགོས་རྒྱུ་ཤིན་ཏུ་གལ་ཆེན་པོ་ཡིན་སྐོར་དང་། རྒྱ་ནག་གཞུང་ནས་བོད་ནང་དྲག་གནོན་ཅན་གྱི་སྲིད་བྱུས་འདྲ་མིན་ལག་བསྟར་བྱེད་བཞིན་པའི་ཛ་དྲག་གནས་སྟངས་སྐོར་དང་། དེ་བཞིན་བར་ལམ་ཨ་རིའི་གྲོས་ཚོགས་ནང་བོད་དོན་ཁྲིམས་འཆར་གསར་པ་ངོ་སྤྲོད་གནང་ཟིན་པ་ལྟར། ཁྲིམས་འཆར་དེ་གཏན་འབེབས་ཡོང་སླད་བོད་རིགས་མང་ཚོགས་ནས་ཀྱང་ཕྱར་གྲུ་མཉམ་འདེགས་གནང་དགོས་པའི་གལ་ཆེའི་རང་བཞིན་སྐོར་ནན་བརྗོད་གནང་། 
གཞན་ཡང་ཨ་རི་སྲིད་གཞུང་ནས་བོད་མི་རིགས་ལ་ཆབ་སྲིད་དང་དཔལ་འབྱོར་གྱི་རོགས་སྐྱོར་ཤུགས་ཆེ་གནང་བཞིན་པར་བཀའ་དྲིན་ཆེ་ཚུལ་སྐོར་དང་། བཀའ་ཤག་སྐབས་ ༡༦ པས་ཐུགས་འགན་བཞེས་ཏེ་ལོ་གཅིག་དང་ཟླ་བ་བརྒྱད་སོང་རིང་གི་ལས་དོན་ཆེ་བ་ཁག་ཅིག་མང་ཚོགས་ལ་ལས་བསྡོམས་ཀྱི་ཚུལ་དུ་སྙན་སེང་སྙིང་བསྡུས་ཞུས་པའི་ནང་། གཞིས་ཆགས་སྲ་བརྟན་དང་། སྲི་ཞུའི་ལས་བྱེད་ཀྱི་ནུས་པ་གོང་སྤེལ། མི་འབོར་གྲངས་བཤེར་བྱེད་རྒྱུ་གལ་ཆེན་ཡིན་པ། བོད་རིགས་རྣམས་ནས་དཔྱ་དངུལ་འབུལ་རྒྱུ་ཤིན་ཏུ་གལ་ཆེན་པོ་ཡིན་སྐོར། ས་ཁང་སྒྲིག་གཞི་བསྐྱར་བཅོས་སོགས་ཀྱི་སྐོར་ལ་འགྲེལ་བརྗོད་དང་གསལ་བཤད་
གཞོན་སྐྱེས་རྣམས་དང་ཟུར་དུ་མཇལ་འཕྲད་སྐབས་དཔལ་ལྡན་སྲིད་སྐྱོང་མཆོག་གིས་བོད་ཀྱི་ས་བབ་ཆགས་ཚུལ་དང་། རྒྱལ་རབས་ལོ་རྒྱུས། ནང་ཆོས་བོད་ནང་ཐོག་མར་དར་ཚུལ། ཨ་རི་དང་བོད་དབར་གྱི་འབྲེལ་བ་དང་ཨ་རིར་བོད་མི་ཐོག་མ་སླེབས་ཚུལ་གྱི་ལོ་རྒྱུས། ཨ་རི་གཞུང་གི་བོད་དོན་རྒྱབ་སྐྱོར་གྱི་སྲིད་བྱུས་ཁག་ངོ་སྤྲོད་དང་། རྒྱ་ནག་གཞུང་ནས་བོད་ནང་དྲག་གནོན་དང་། མི་རིགས་དང་སྐད་ཡིག་རྩ་མེད་གཏོང་རྒྱུའི་སྲིད་བྱུས་ལག་བསྟར་བྱེད་བཞིན་པའི་སྐོར། ཨ་རིའི་གྲོས་ཚོགས་ནང་བོད་དོན་ཁྲིམས་འཆར་གསར་པ་ངོ་སྤྲོད་གནང་ཟིན་པར་གཏན་འབེབས་ཡོང་སླད་གཞོན་སྐྱེས་རྣམས་ནས་ལས་འགུལ་ཁག་ནང་མཉམ་ཞུགས་གནང་གལ་སྐོར། དེ་བཞིན་གཞོན་སྐྱེས་རྣམས་ནས་བོད་ཀྱི་རྒྱལ་རབས་ལོ་རྒྱུས་དང་། སོ་སོའི་སྐད་ཡིག་ལ་སྦྱང་བརྩོན་བྱེད་རྒྱུ་ཧ་ཅང་གལ་ཆེན་པོ་ཡིན་པ་སོགས་ཀྱི་སྐོར་གསུངས། 
ཕྱི་ཚེས་ ༡༣ ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྤོཊ་ལེནཌ་ནས་འཁོར་ལམ་བརྒྱུད་ཕེབས་ཐོན་གྱིས་ཉིན་གུང་སི་ཡ་ཊལ་ཕེབས་འབྱོར་གནང་ཞིང་། ཕྱི་དྲོ་ (Mount Lake Terrace Community Center) ཞེས་པའི་ཚོགས་ཁང་དུ་ཕེབས་འབྱོར་སྐབས་ཝ་ཤིང་ཊོན་བོད་རིགས་ཚོགས་པའི་ཚོགས་གཙོ་དང་རྒྱུན་ལས། མང་ཚོགས་བཅས་ནས་དགའ་བསུའི་སྣེ་ལེན་ཞུས། དེ་རྗེས་དཔལ་ལྡན་སྲིད་སྐྱོང་མཆོག་གིས་མང་ཚོགས་ལ་གསུང་བཤད་གནང་བ་མ་ཟད། གཞོན་སྐྱེས་རྣམས་ལ་བོ
