༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་རྒྱལ་ས་ཝ་ཤིང་ཊོན་ཌི་སི་ཁུལ་གྱི་ཐེངས་གཉིས་པའི་མཛད་རིམ་ཁག་ལེགས་པར་གྲུབ་རྗེས།  ཕྱི་ལོ་ ༢༠༢༣ ཟླ་ ༢ ཚེས་ ༡༠ ཉིན་ཀོ་ལ་རེ་ཌོའི་གྲོང་ཁྱེར་ཌན་ཝར་ (Denver) དུ་ཕེབས་ཐོན་གནང་ཡོད།

དེ་ཡང་དཔལ་ལྡན་སྲིད་སྐྱོང་མཆོག་ཨ་རི་ཀོ་ལོ་རེ་ཌོ་མངའ་སྡེའི་རྒྱལ་ས་ཌེན་ཝར་གནམ་ཐང་དུ་ཕེབས་འབྱོར་སྐབས་ཀོ་ལ་རེ་ཌོ་བོད་རིགས་སྤྱི་མཐུན་ཚོགས་པའི་ཚོགས་གཙོ་གཙོས་པའི་རྒྱུན་ལས་དང་།  ས་གནས་མང་ཚོགས་བཅས་ཀྱིས་དགའ་བསུའི་སྣེ་ལེན་གཟབ་རྒྱས་ཞུས་ཡོད།གོང་ཚེས་ཉིན་གྱི་ཕྱི་དྲོར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་ཕེབས་འབྱོར་སྐབས་ཁུལ་དེའི་གཟའ་མཇུག་སློབ་གྲྭའི་སློབ་ཕྲུག་དང་།  མང་ཚོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།  མཛད་རིམ་ལྟར་ས་གནས་སྤྱི་མཐུན་ཚོགས་པའི་ཚོགས་གཙོས་དགའ་བསུའི་གསུང་བཤད་དང་ལས་བསྡོམས་སྙིང་བསྡུས་སྙན་སྒྲོན་ཞུས་གྲུབ་མཚམས་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་སྒྲུབ་ལགས་ཀྱིས་དཔལ་ལྡན་སྲིད་སྐྱོང་མཆོག་གི་ཐེངས་འདིའི་བྱང་ཨ་རིའི་ཁུལ་གྱི་གྲུབ་ཟིན་པའི་མཛད་རིམ་ཁག་གཅིག་དང་།  རྒྱལ་ས་ཝ་ཤིང་ཊོན་ཌི་སི་རུ་གནད་ཡོད་མི་སྣ་མཇལ་འཕྲད་ཀྱིས་མཚོན་ཡོངས་བསྒྲགས་བྱས་ན་འགྲིག་པའི་གནས་ཚུལ་ཁག་གཅིག་ངོ་སྤྲོད་སྙིང་བསྡུས་ཞུས་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་མང་ཚོགས་ལ་གསུང་བཤད་གནང་བའི་སྙིང་པོར། སོ་སོའི་རྒྱལ་ཁབ་ཀྱི་ལོ་རྒྱུས་ལ་དོ་སྣང་དང་ཤེས་རྟོགས་དགོས་རྒྱུ་ནི་ཧ་ཅང་གལ་ཆེན་པོ་ཡིན་སྐོར་དང་། རྒྱ་ནག་གཞུང་ནས་བོད་ནང་དྲག་གནོན་ཅན་གྱི་སྲིད་བྱུས་འདྲ་མིན་ལག་བསྟར་བྱེད་བཞིན་པའི་ཛ་དྲག་གནས་སྟངས།  ཉེ་ལམ་ལོ་ཤས་ནང་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་ལ་བརྟེན་ནས་ཕྱིའི་རྒྱལ་ཁབ་ཁག་གིས་རྒྱ་ནག་ཐོག་བལྟ་སྟངས་གང་འདྲ་ཆགས་ཡོད་མེད།  དེ་འདྲའི་གནས་སྟངས་འོག་བོད་མིའི་སྒྲིག་འཛུགས་ནས་གོ་སྐབས་དམ་འཛིན་གྱིས་རྒྱལ་སྤྱིའི་སྟེང་བོད་དོན་གནས་བབ་མཐོ་རུ་གཏོང་ཐབས་སུ་འབད་བརྩོན་གང་འདྲ་གནང་གི་ཡོད་པ།  བོད་ནང་གི་གནས་སྟངས་རྒྱུས་ལོན་བྱེད་རྒྱུར་ཐབས་ཤེས་དང་ཤུགས་སྣོན་གང་འདྲ་རྒྱག་གི་ཡོད་པ་སོགས་ཀྱི་སྐོར་འགྲེལ་བརྗོད་དང་། དེ་བཞིན་དཔལ་ལྡན་སྲིད་སྐྱོང་མཆོག་གིས།  བར་ལམ་ཨ་རིའི་གྲོས་ཚོགས་ནང་བོད་དོན་ཁྲིམས་འཆར་གསར་པ་ངོ་སྤྲོད་གནང་ཟིན་པ་ལྟར།  ལོ་རྒྱུས་ཀྱི་དོན་སྙིང་ལྡན་པའི་ཁྲིམས་འཆར་དེ་གཏན་འབེབས་ཡོང་སླད་རང་རིགས་མང་ཚོགས་ནས་ཕྱར་གྲུ་མཉམ་འདེགས་དང་།  དང་བླངས་བོད་དོན་ཞུ་གཏུག་ལས་འགུལ་ནང་རྒན་གཞོན་བར་གསུམ་ནས་མཉམ་ཞུགས་དགོས་པའི་གལ་ཆེའི་རང་བཞིན་སྐོར་ནན་བརྗོད་གནང་། ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཨ་རི་དང་བོད་དབར་གྱི་འབྲེལ་བ་དང་། ཨ་རིའི་སྲིད་གཞུང་ནས་བོད་མི་རིགས་ལ་ཆབ་སྲིད་དང་དཔལ་འབྱོར་གྱི་རོགས་སྐྱོར་ཤུགས་ཆེ་གནང་བཞིན་པར་བཀའ་དྲིན་ཆེ་ཚུལ་སྐོར་དང་ཆབས་ཅིག་བོད་མིའི་སྒྲིག་འཛུགས་ཀྱི་མ་འོངས་ལོ་གསུམ་གྱི་ལས་འཆར་ཁག་རོབ་ཙམ་བང་སྒྲིག་ཟིན་པ་དང་།  བཀའ་ཤག་སྐབས་ ༡༦ པས་ཐུགས་འགན་བཞེས་ཏེ་ལོ་གཅིག་དང་ཟླ་བ་བརྒྱད་སོང་རིང་གི་ལས་དོན་ཆེ་བ་ཁག་གཅིག་མང་ཚོགས་ལ་ལས་བསྡོམས་ཀྱི་ཚུལ་དུ་སྙན་སེང་སྙིང་བསྡུས་ཞུས་པའི་ནང་།  གཞིས་ཆགས་སྲ་བརྟན་དང་། སྲི་ཞུའི་ལས་བྱེད་པའི་ནུས་པ་གོང་སྤེལ།  བོད་མིའི་སྒྲིག་འཛུགས་ཀྱི་སྒྲོམ་གཞི་ཡར་རྒྱས།  ས་ཁང་སྒྲིག་གཞི་བསྐྱར་བཅོས་སོགས་ཀྱི་སྐོར་འགྲེལ་བརྗོད་དང་གསལ་བཤད་གནང་། གཞན་ཡང་དཔལ་ལྡན་སྲིད་སྐྱོང་མཆོག་ད་རེས་ས་གནས་ཁག་ཏུ་ཕེབས་པའི་གོ་སྐབས་དང་བསྟུན་ས་གནས་ཀྱི་བོད་རིགས་གཞོན་སྐྱེས་དང་ཟུར་དུ་མཇལ་འཕྲད་ཀྱིས་བོད་ཀྱི་ཡུལ་ལྗོངས་དང་།  ས་བབས་ཆགས་ཚུལ། རྒྱལ་རབས་ལོ་རྒྱུས།  ཆབ་སྲིད་དང་འབྲེལ་བའི་ལས་དོན་བྱེད་ཕྱོགས། ཨ་རི་གཞུང་གི་བོད་དོན་རྒྱབ་སྐྱོར་གྱི་སྲིད་བྱུས་ཁག  རྒྱ་ནག་གཞུང་ནས་བོད་ནང་དྲག་གནོན། མི་རིགས་དང་སྐད་ཡིག་རྩ་མེད་གཏོང་རྒྱུའི་སྲིད་བྱུས་ལག་བསྟར་བྱེད་བཞིན་པའི་སྐོར།  ༧རྒྱལ་བའི་ཡང་སྲིད་ངོས་འཛིན་ཐོག་རྒྱ་ནག་གཞུང་གིས་ཐེ་བྱུས་བྱེད་བཞིན་པའི་སྐོར། དེ་བཞིན་གཞོན་སྐྱེས་རྣམས་ནས་བོད་ཀྱི་རྒྱལ་རབས་ལོ་རྒྱུས་དང་། སོ་སོའི་སྐད་ཡིག་ལ་སྦྱང་བརྩོན་བྱེད་རྒྱུ། རང་རེའི་རྩ་དོན་ལ་ཕན་པའི་ལས་འགུལ་ཁག་ནང་མཉམ་ཞུགས་བྱེད་རྒྱུ་ཤིན་ཏུ་གལ་ཆེ་ཚུལ་སོགས་ཀྱི་སྐོར་གསུང་བཤད་གནང་གྲུབ་རྗེས་འདྲི་བར་ལན་འདེབས་གསལ་བཤད་གནང་ཡོད།ཕྱི་ཚེས་ ༡༡ ཉིན་གྱི་སྔ་དྲོ་དཔལ་ལྡན་སྲིད་སྐྱོང་མཆོག་ཌན་ཝར་ནས་ཕེབས་ཐོན་གྱིས་ཨ་རིའི་མངའ་སྡེ་ཡུ་ཊའི་གྲོང་ཁྱེར་སོལཊ་ལེཀ་སི་ཊི་རུ་ཉིན་གུང་ཕེབས་འབྱོར་གནང་ཞིང་།  གནམ་ཐང་དུ་བྱང་ཨ་རིའི་སྤྱི་ཟུར་པདྨ་ཕྱག་མཛོད་ཚང་དང་། ཡུ་ཊ་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རྒྱུན་ལས། མང་ཚོགས་བཅས་ནས་དགའ་བསུའི་སྣེ་ལེན་ཞུས་ཡོད།  ཉིན་རྒྱབ་ཁུལ་དེར་ཡོད་པའི་གཞོན་སྐྱེས་རྣམས་དང་ཐུག་འཕྲད་གནང་ཡོད་པ་མ་ཟད།  ཕྱི་དྲོར་ས་གནས་བོད་རིགས་མང་ཚོགས་ལ་གསུང་བཤད་གནང་ཡོད་པ་བཅས། །