༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨིན་ཡུལ་ཁུལ་གྱི་གཞུང་འབྲེལ་ཕྱོགས་ཕེབས་ཐོག་མའི་སྐབས་ཨོག་སི་ཕོཊ་གཙུག་ལག་སློབ་གཉེར་ཁང་དུ་གསུང་བཤད་དང་། གསར་འགོད་པའི་བཅར་འདྲིར་དང་ལེན། སློབ་ཕྲུག་ལ་གསུང་བཤད། བསམ་མཛོད་བསྟི་གནས་ཁང་དུ་གསུང་བཤད་བཅས་ཀྱི་མཛད་འཆར་ཁག་ལེགས་པར་གྲུབ་ཡོད་པ་རེད།
དེ་ཡང་ཕྱི་ལོ་ ༢༠༢༣ ཟླ་བ་ ༠༡ ཚེས་ ༣༠ རེས་གཟའ་ཟླ་བ་ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལོན་ཊོན་གནམ་ཐང་དུ་ཕེབས་འབྱོར་སྐབས་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་། ས་གནས་བོད་རིགས་མང་ཚོགས་ནས་ཕེབས་བསུའི་སྣེ་ལེན་ཞུས་རྗེས་སྐུ་ཚབ་དོན་ཁང་དུ་ཆེད་ཕེབས་ཀྱིས་དོན་ཁང་གི་ལས་བྱེད་ལྷན་གུང་ཚིགས་ཚོགས་འདུ་ཚོགས་གནང་ཡོད། ཉིན་རྒྱབ་དཔལ་ལྡན་སྲིད་སྐྱོང་མཆོག་གིས་ཨིན་ཡུལ་གྱི་གསར་ཁང་གྲགས་ཅན་བྷི་བྷི་སིའི་སྤྱི་ཁྱབ་བཀོད་སྒྲིག་པ་དང་ལྷན་ཚོགས་འདུ་ཚོགས་གནང་ཡོད་པ་དང་། ཕྱི་དྲོ་ཨིན་ཡུལ་པི་ཀ་ཊི་ལི་བཞི་མདོར་ (Piccadilly Circus) སིར་ཀས་འགྲེམས་སྤེལ་ཞུ་བཞིན་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རེ་བའི་སྒྱུ་རྩལ་ཞེས་པའི་བརྙན་གཟིགས་སླད་ཕེབས་ཡོད་པ་རེད།
ཕྱི་ཚེས་ ༣༡ ཉིན་གྱི་སྔ་དྲོ་དཔལ་ལྡན་སྲིད་སྐྱོང་མཆོག་བྷི་བྷི་སི་གསར་ཁང་གི་བཅར་འདྲི་ལེ་ཚན་གཉིས་དང་ལེན་གྱིས་ལན་འདེབས་གནང་ཡོད་ཅིང་། དེ་རྗེས་ཨོག་སི་ཕོཊ་གཙུག་ལག་སློབ་གཉེར་ཁང་དུ་ཆེད་ཕེབས་ཐོག་བོད་དོན་ནི་རྒྱལ་སྤྱིའི་སྟེང་ཐག་ཆོད་མེད་པའི་གནད་དོན་ཞིག་ཡིན་ཞེས་པའི་བརྗོད་གཞིའི་ཐོག་གསུང་བཤད་གནང་། སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་ཀྱི་འདས་པའི་ལོ་རྒྱུས་དང་། རྒྱ་ནག་གིས་བོད་ས་བཙན་བཟུང་བྱས་རྗེས་རྒྱལ་སྤྱིའི་ཁོར་ཡུག་དང་། གཙང་ཆུ། ཚོང་འབྲེལ། འཛམ་གླིང་ཞི་བདེ་སོགས་ལ་གནོད་སྐྱོན་ཐེབས་པའི་སྐོར། བོད་རྒྱའི་དཀའ་རྙོག་གཉིས་སྨན་དབུ་མའི་ལམ་ཐོག་ནས་སེལ་ཐབས་གནང་རྒྱུའི་འབད་རྩོལ་གནང་བཞིན་པའི་སྐོར་གསུངས་པ་མ་ཟད། དོན་གཉེར་ཅན་རྣམས་ལ་དེ་འབྲེལ་དཔེ་དེབ་ཁག་གཅིག་ངོ་སྤྲོད་གནང་ཡོད།
ཨོག་སི་ཕོཊ་གཙུག་ལག་སློབ་ཁང་དུ་གསུང་བཤད་གྲུབ་མཚམས་དཔལ་ལྡན་སྲིད་སྐྱོང་མཆོག་ལ་གཙུག་ལག་སློབ་གཉེར་ཁང་དེའི་སློབ་གཉེར་བའི་དུས་དེབ་ཀྱི་རྩོམ་སྒྲིག་པས་བཅར་འདྲི་ཞུས་ཤིང་། དེ་རྗེས་གཙུག་ལག་སློབ་གཉེར་ཁང་གི་དགེ་ལས་སློབ་ཕྲུག་སྡེ་ཁག་འགའ་ཤས་དང་ལྷན་དུ་མཇལ་མོལ་གནང་སྟེ། ཚོགས་བཅར་བ་འགའ་རེས་བོད་དོན་ལ་ཇི་ལྟར་རྒྱབ་སྐྱོར་བྱེད་དགོས་མིན་ཐད་བཀའ་འདྲི་ཞུས་པར་དཔལ་ལྡན་སྲིད་སྐྱོང་མཆོག་གིས་ཨོག་སི་ཕོཊ་རུ་བོད་རང་བཙན་སློབ་ཕྲུག་ཚོགས་པའམ་ཨིན་ཡུལ་བོད་དོན་རྒྱབ་སྐྱོར་ཚོགས་པའི་ཡན་ལག་ཚོགས་པ་གསར་འཛུགས་གནང་འཐུས་ཞེས་ལམ་སྟོན་གནང་ཡོད། དེ་མཚུངས་དཔལ་ལྡན་སྲིད་སྐྱོང་མཆོག་གིས་ཨོག་སི་ཕོཊ་གཙུག་ལག་སློབ་གཉེར་ཁང་དུ་ཡོད་པའི་བོད་མི་ཉི་ཤུ་ཙམ་ལ་བཀའ་ཤག་སྐབས་བཅུ་དྲུག་པའི་སྲིད་བྱུས་དང་ལངས་ཕྱོགས་ངོ་སྤྲོད། བོད་མིའི་སྒྲིག་འཛུགས་དང་ཕྱི་རྒྱལ་ཁག་ཏུ་ཡོད་པའི་བོད་མི་བར་མཉམ་ལས་གནང་རྒྱུའི་གོ་སྐབས་ཇི་ཡོད་སྐོར། དང་བླངས་བོད་དོན་ཞུ་གཏུག་ལས་འགུལ། བཙན་བྱོལ་བོད་མིའི་མི་འབོར་གྲངས་བཤེར་སྐོར་ངོ་སྤྲོད་གནང་། གཞན་ཡང་དྲི་བ་དྲིས་ལན་སྐབས་ཁོང་གིས་བོད་མི་རྣམས་ནས་བོད་ཀྱི་སྐད་ཡིག་སྲུང་སྐྱོབ་དང་། བོད་དོན་དྲིལ་བསྒྲགས་ཆེད་ཨིན་ཡུལ་སྐུ་ཚབ་དོན་ཁང་ལ་རྒྱབ་སྐྱོར་གནང་དགོས་སྐོར་གསུངས་ཡོད།
ཕྱི་ཚེས་ ༠༡ ཉིན་གྱི་སྔ་དྲོར་དཔལ་ལྡན་སྲིད་སྐྱོང་མཆོག་ཨ་རིར་ཕེབས་ཐོན་མ་གནང་གོང་དུ་ཀེམ་བྷི་རི་ཅི་ (Cambridge) ནང་རྟེན་གཞི་བྱས་པའི་རྒྱལ་སྤྱིའི་བསམ་མཛོད་བསྟི་གནས་ཁང་ཞིག་གི་བཅར་འདྲིར་དང་ལེན་དང་། དེ་རྗེས་འབྲུག་ཐར་ལགས་ཀྱི་གླེང་མོལ་ལས་རིམ་ནང་མཉམ་ཞུགས་གནང་ཡོད།
དཔལ་ལྡན་སྲིད་སྐྱོང་མཆོག་གི་ཨིན་ཡུལ་ཕྱོགས་ཕེབས་འདི་བཞིན་ཨོག་སི་ཕོཊ་གཙུག་ལག་སློབ་ཁང་ནས་མགྲོན་འབོད་གནང་བ་ལྟར་ཨིན་ཡུལ་སྐུ་ཚབ་དོན་ཁང་གིས་གོ་སྒྲིག་གནང་ཡོད་ཅིང་། རིང་མིན་ཕྱི་ཟླ་ ༠༤ ནང་དཔལ་ལྡན་སྲིད་སྐྱོང་མཆོག་སླར་ཡང་ཨིན་ཡུལ་དུ་ཕེབས་རྒྱུའི་མཛད་འཆར་ཡོད་པ་བཞིན་སྐུ་ཚབ་དོན་ཁང་ནས་ཆབ་སྲིད་དང་ཕྱི་འབྲེལ་གྱི་མཇལ་མོལ་ཁག་གཅིག་གོ་སྒྲིག་ཞུ་འཆར་ཡོད་པ་བཅས།། 
