༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཞིས་བྱེས་བོད་མི་ཡོངས་ལ་བོད་རྒྱལ་ལོ་ ༢༡༥༠ རབ་གནས་ཆུ་ཡོས་ལོའི་གནམ་ལོ་གསར་དུ་བཞད་པའི་དགའ་སྟོན་གྱི་རྟེན་འབྲེལ་ལ་འཚམས་འདྲི་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་སུ་དྲན་པའི་སྒོ་ནས་སྒོ་གསུམ་གུས་ཕྱག་ཕུལ་བ་དང་སྦྲགས། བོད་ཕྱི་ནང་གཉིས་སུ་ཡོད་པའི་བོད་མི་ཡོངས་ལ་བོད་རྒྱལ་ལོ་ ༢༡༥༠ རབ་གནས་ཆུ་ཡོས་ཀྱི་ལོ་ལ་བཀའ་ཤག་སྐབས་བཅུ་དྲུག་པ་དང་ང་རང་སྒེར་གྱི་ངོས་ནས་ལོ་གསར་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
དེ་རིང་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་ཆབས་ཅིག་ཉེ་ཆར་ཕྱི་ལོ་གསར་ཚེས་ཀྱི་ཚེས་གཅིག་ཉིན་རི་བོ་དགེ་ལྡན་པའི་བརྟན་བཞུགས་བསྟར་འབུལ་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གི་བརྟན་བཞུགས་དེ་མ་འགྲིག་ལྷུན་གྲུབ་ཧ་ཅང་ཡག་པོ་བྱུང་སོང་ཞེས་བཀའ་སློབ་སྩལ་ཡོད་པ་མ་ཟད། ལོ་གསར་པ་ལ་རེ་བ་གསར་པ་ཞིག་རྒྱག་ཆོག་གི་རེད་ཅེས་བཀའ་གནང་ཡོད་དུས་ང་ཚོས་ཏན་ཏན་ལོ་གསར་པ་ལ་རེ་བ་གསར་པ་རྒྱག་ཆོག་གི་རེད།
འཛམ་གླིང་གི་གནས་སྟངས་ལ་འགྱུར་བ་མང་པོ་ཞིག་འགྲོ་གི་ཡོད་པ་དང་། དེ་དང་སྟབས་བསྟུན་རྒྱ་ནག་དང་བོད་ནང་ལ་འགྱུར་བ་ཇི་ལྟར་འགྲོ་གི་ཡོད་པ་ལྟ་དགོས་ཀྱི་ཡོད། དེ་བཞིན་རྒྱལ་སྤྱིའི་ནང་ལ་འགྱུར་བ་ཇི་ལྟར་འགྲོ་གི་འདུག དེས་ང་ཚོ་ལ་ཤུགས་རྐྱེན་ཇི་ལྟར་ཐེབས་ཀྱི་ཡོད་མེད་ལྟ་དགོས་ཀྱི་ཡོད། དེ་ཚོ་ལ་རྒྱུན་ལྡན་ནས་བོད་རིགས་ཚང་མས་དོ་སྣང་ཡག་པོ་བྱེད་རྒྱུ་དེ་གལ་ཆེན་པོ་ཡིན། དེ་རིང་ལོ་གསར་དང་སྟབས་བསྟུན་རྣམ་པ་ཚོར་ཞུ་རྒྱུ་གཙོ་བོ་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་ལོ་ ༨༧ ལ་ཕེབས་ཡོད་པས་སྔོན་མ་ནང་བཞིན་ཕར་ཚུར་ཆིབས་སྒྱུར་གནང་ཐུབ་ཀྱི་མེད། ཆིབས་སྒྱུར་གནང་རྒྱུ་ཉུང་དུ་འགྲོ་གི་ཡོད་པ་རེད། དེ་འདྲ་ཡིན་དུས་ད་ལྟ་བར་དུ་འདས་པའི་ལོ་ངོ་ ༦༣ རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱག་གཉིས་ཐལ་མོ་སྦྱར་ནས་འཛམ་གླིང་ལ་སྐོར་བ་སྐྱོན་གནང་ཡོད་པ་དང་། བོད་ཀྱི་གནད་དོན་དེ་འཛམ་གླིང་གི་གནད་དོན་འདྲ་པོ་མང་པོ་ཡོད་པའི་ནང་ནས་གཞན་དང་མི་འདྲ་བ་ཞིག་ཆགས་པ་དེ་༸རྒྱལ་བ་རིན་པོ་ཆེའི་ཐུགས་རྗེ་བཀའ་དྲིན་དང་། བཀའ་སློབ་ལམ་སྟོན་ལ་བརྟེན་ནས་བྱུང་བ་ཞིག་ཡིན་པ་ང་ཚོ་བོད་མི་ཚང་མས་ཤེས་དགོས་རྒྱུ་ཧ་ཅང་གལ་ཆེན་པོ་རེད། བཀའ་དྲིན་རྗེས་སུ་དྲན་དགོས་རེད་མ་གཏོགས་བཀའ་དྲིན་རྗེས་སུ་མ་དྲན་པ་ཡིན་ན་ལས་རྒྱུ་འབྲས་མི་རྩི་མཁན་ཆགས་འགྲོ་གི་རེད།
དེ་དང་མཉམ་དུ་ང་ཚོ་བོད་མི་ཡིན་པའི་ཆ་ནས་དེ་སྔ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་པ་འཕྲིན་ལས་བསྐྱངས་པ་དེ་དག་གི་རྗེས་སུ་བསྙེགས་ཏེ་༸རྒྱལ་བ་རིན་པོ་ཆེས་ང་ཚོ་ལ་ཐུགས་རེ་ག་ཚོད་གནང་གི་ཡོད་པ་ཇི་བཞིན་ང་ཚོས་ཀྱང་དཀའ་ལས་ངེས་པར་དུ་རྒྱག་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་རིང་པོ་བརྟན་རྒྱུ་ཡིན་པའི་སྐོར་བཀའ་སློབ་མང་པོ་སྩལ་ཡོད། ལོ་བཅུ་ཕྲག་གཉིས་སམ་དགུང་ལོ་ ༡༡༣ བཞུགས་རྒྱུའི་སྐོར་བཀའ་སློབ་སྩལ་ཡོད་རེད་དེ། བླ་མ་སྐུ་ཚེ་བརྟན་དང་མི་བརྟན་ཟེར་བ་དེ་བླ་མ་དང་སློབ་མའི་དམ་ཚིག་ལའང་མང་པོ་ཞིག་རག་ལུས་ཡོད་སྟབས། སློབ་མའི་ངོས་ནས་༸རྒྱལ་བ་རིན་པོ་ཆེའི་དགོངས་པ་གང་ཡིན་པ་རྟོགས་པའི་ཐོག་ནས་སྒྲུབ་ཀྱི་ཡིན་ན་༸རྒྱལ་བ་རིན་པོ་ཆེའི་དགོངས་པ་གཞིར་བཟུར་ལས་ཀ་སྒྲུབ་ཐུབ། ཡང་སོ་སོའི་འདོད་པ་ཡོད་པ་གཅིག་པུ་བླངས། འདོད་པ་མེད་པ་དེ་ཕར་བཞག འདོད་པ་ཡོད་པ་དེ་༸རྒྱལ་བ་རིན་པོ་ཆེའི་བཀའ་དང་། འདོད་པ་མེད་པ་དེ་༸རྒྱལ་བ་རིན་པོ་ཆེའི་བཀའ་མིན་པར་བཞག་ན་ཏག་ཏག་སྡོད་ཀྱི་མེད།
སྐབས་རེ་ང་ཚོས་༸རྒྱལ་བ་རིན་པོ་ཆེའི་བཀའ་སྒྲུབ་ཀྱི་ཡོད་བསམ། འོན་ཀྱང་ལས་ཀ་དེ་ལྡོག་ཕྱོགས་བྱེད་ཀྱི་ཡོད་པ་དེ་འདྲ་ཡོང་གི་ཡོད། དེ་འདྲ་ཡིན་དུས་ང་ཚོ་འགོ་ཁྲིད་ནང་ཡིན་ནའང་རེད། མང་ཚོགས་ནང་ལ་ཡིན་ནའང་རེད། སོ་སོའི་ཁ་ནས་སྐད་ཆ་ཞིག་བཤད་པ་ཡིན་ནའང་རེད། ལུས་ཀྱི་རྣམ་འགྱུར་ཞིག་བསྟན་ནའང་རེད། དེ་བོད་སྤྱི་ལ་ཕན་ཐོགས་རྒྱུ་ཞིག་ཡིན་མིན་དགོངས་པ་བཞེས་རྒྱུ་གལ་ཆེན་པོ་རེད་མ་གཏོགས་སྐབས་རེ་ང་ཚོ་སོ་སོ་ཁུངས་གང་ནས་ཡིན་པ་དེའི་ཁེ་ཕན་གཙོ་བོར་འཛིན་ནས་བོད་སྤྱི་པའི་ཁེ་ཕན་དེ་ཆུང་ཆུང་ཡིན་པ་ལྟ་བུར་འཛིན་གྱི་འདུག དེ་འདྲ་བྱས་ཏེ་ང་ཚོ་སྤྱི་པའི་དོན་དག་དེ་མ་བསྒྲུབ་པ་ཡིན་ན་རང་སོ་སོའི་ཁུངས་སམ་ཁུལ་གང་ཡིན་ནའང་དེའི་དོན་དག་བསྒྲུབ་ཐུབ་རྒྱུ་མེད་པ་གསལ་པོ་རེད།
དེར་བརྟེན་ང་ཚོས་རྒྱ་ཆེ་སའི་དམིགས་ཡུལ་མཉམ་དུ་སྒྲུབ་དགོས་རྒྱུ་གལ་ཆེན་པོ་རེད། མ་འོངས་པར་བོད་ཀྱི་དཀའ་རྙོག་ཇི་ལྟར་སེལ་བ་ཡིན་ནའང་བོད་མི་ཚང་མས་འདོད་པ་ཡོད་པའི་ལམ་ཁ་ཞིག་གི་སྒང་ལ་འགྲོ་ཐུབ་དགོས་རྒྱུ་གལ་ཆེན་པོ་རེད། ང་ཚོ་བཀའ་ཤག་ངོས་ནས་འབད་རྩོལ་དེ་ལྟར་ཞུ་རྒྱུ་ཡིན། བཀའ་ཤག་གི་ངོས་ནས་ཆབ་སྲིད་ཀྱི་ལས་དོན་དང་། བཙན་བྱོལ་ནང་གི་བོད་མིའི་བདེ་སྡུག་གི་དཀའ་ངལ་བསལ་རྒྱུ་མཚོན་པའི་ལས་དོན་ཡོངས་རྫོགས་༸རྒྱལ་བ་རིན་པོ་ཆེའི་དགོངས་པ་དང་ལམ་སྟོན་གཞིར་བཟུང་འགྲོ་རྒྱུར་དམ་བཅའ་གཡོ་བ་མེད་པ་ཡིན། མང་ཚོགས་ངོས་ནས་ཀྱང་དེ་ལུགས་དགོངས་པ་བཞེས་ཏེ་ང་ཚོ་མི་མང་པོ་མེད་ནའང་གང་ཡོད་པ་དེ་མཉམ་རུབ་བྱས་ཏེ་ནུས་པ་གདོན་རྒྱུར་ཤུགས་རྒྱག་རོགས་ཞེས་ཞུ་རྒྱུ་ཡིན། དེ་རིང་ཞུ་རྒྱུ་འདི་ཙམ་ཡིན། ཐུགས་རྗེ་ཆེ། །
