༄༅། །འདི་གར་བྱང་ཨ་རི་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་རྒྱལ་ས་ཝ་ཤིང་ཊོན་ཌི་སི་ཁུལ་གྱི་མཛད་རིམ་ཁག་ལེགས་པར་གྲུབ་སྟེ་ཕྱི་ལོ་ ༢༠༢༣ ཟླ་བ་ ༢ ཚེས་ ༣ ཉིན་ཅི་ཀ་གྷོ་གྲོང་ཁྱེར་གྱི་གནམ་ཐང་དུ་ཕེབས་འབྱོར་སྐབས།  ཅི་ཀ་གྷོ་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཞོན་དང་།   ཝི་སི་ཀོན་སིན་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ།  རི་དྭགས་དགའ་ཚལ་གླིང་དགོན་གྱི་དགེ་འདུན་པ་རྣམ་པ།  ས་གནས་མང་ཚོགས་བཅས་ནས་ཕེབས་བསུའི་མཇལ་དར་སྒྲོན་འབུལ་རྗེས་ཝི་སི་ཀོན་སིན་བཞུགས་གནས་མགྲོན་ཁང་དུ་ཕེབས།ཕྱི་དྲོ་ས་གནས་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་དར་རྒྱས་གླིང་དུ་ཕེབས་འབྱོར་སྐབས་ས་གནས་གཟའ་མཇུག་སློབ་གྲྭའི་སློབ་ཕྲུག་དང་མང་ཚོགས་ནས་བོད་ལུགས་ཕེབས་བསུ་ཟབ་རྒྱས་ཞུས་རྗེས།  སློབ་ཕྲུག་ཚོས་བོད་རྒྱལ་ཁབ་ཆེན་པོའི་རྒྱལ་གླུ་དཀྲོལ་གཏོང་དང་།  ཚོགས་གཙོས་དགའ་བསུའི་གསུང་བཤད་དང་བསྟུན།  སྤྱི་ཁང་གི་བྱུང་རིམ་དང་།  ས་གནས་སུ་ལས་འགུལ་སྤེལ་ཕྱོགས།  དང་བླངས་དཔྱ་དངུལ་བསྡུ་ཕྱོགས།  གཟའ་མཇུག་སློབ་གྲྭའི་གནས་སྟངས་སོགས་ཚོགས་པའི་ལས་བསྡོམས་སྙིང་བསྡུས་ངོ་སྤྲོད་གནང་།  སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ཀྱིས་དཔལ་ལྡན་སྲིད་སྐྱོང་མཆོག་ཐེངས་འདིར་བྱང་ཨ་རིའི་ཁུལ་དུ་ཕེབས་དགོས་དོན་དང་།  སྤྱི་མཐུན་ཚོགས་པའི་གལ་གནད་སྐོར་དང་འབྲེལ་ནས་འགོ་འཛུགས་ངོ་སྤྲོད་གསུང་བཤད་མདོར་བསྡུས་གནང་རྗེས། དཔལ་ལྡན་སྲིད་སྐྱོང་མཆོག་གིས་མང་ཚོགས་ལ་གསུང་བཤད་གནང་འགོ་བཙུགས།  

དེ་ཡང་དཔལ་ལྡན་སྲིད་སྐྱོང་མཆོག་གིས་སྲིད་སྐྱོང་གི་ཐུགས་འགན་བཞེས་ནས་ལོ་གཅིག་དང་ཟླ་བ་བརྒྱད་སོང་རིང་སྐབས་ ༡༦ པའི་བཀའ་ཤག་གི་སྤྱི་ཡོངས་ཀྱི་དགོངས་པ་བཞེས་ཕྱོགས་དང་།  ད་བར་གྱི་ལས་དོན་ཆེ་ཁག་རྣམས་ས་གནས་མང་ཚོགས་ལ་ལས་བསྡོམས་ཀྱི་ཚུལ་དུ་སྙན་སེང་ཞུས་པའི་ནང་།  གཞིས་ཆགས་སྲ་བརྟན་དུ་གཏོང་ཆེད།  གཞིས་ཆགས་ཀྱི་དགོས་མཁོ་ཇི་ཡིན་མཁྱེན་རྟོགས་གནང་སྟངས་སྐོར།  བོད་མིའི་སྒྲིག་འཛུགས་ཀྱི་སྒྲོམ་གཞི་བརྟན་པོ་ཇི་ལྟར་བཟོ་ཐབས་གནང་བའི་སྐོར།  གཞུང་ཞབས་ལས་བྱེད་པའི་ནུས་ཤུགས་སྔར་ལས་ཆེ་རུ་གཏོང་ཐབས།  ས་ཁང་སྒྲིག་གཞི་བསྐྱར་བཅོས་བྱས་པའི་དགོས་དམིགས་བཅས་ཀྱི་སྐོར་ལ་འགྲེལ་བརྗོད་དང་གསལ་བཤད་ཞིབ་ཕྲ་གནང་། དེ་བཞིན་བཀའ་ཤག་སྐབས་ ༡༦ པས།  ཉེ་ལམ་ལོ་ཤས་ནང་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་ལ་གཞིགས་ནས་གོ་སྐབས་ཇི་ཡོད་དམ་འཛིན་གནང་སྟངས་དང་། རྒྱལ་སྤྱིའི་སྟེང་བོད་དོན་གནས་བབ་མཐོ་རུ་གཏོང་ཐབས་གནང་སྐོར།  བོད་ནང་གི་གནས་སྟངས་རྒྱུས་ལོན་ཐད་ཐབས་ཤེས་དང་ཤུགས་སྣོན་གནང་གི་ཡོད་པ་སོགས་ཀྱི་སྐོར་ལ་འགྲེལ་བརྗོད་ཡང་གནང་།  

མང་ཚོགས་ཁྲོད་ནས་བཀའ་ཤག་གི་ཕྱག་ལས་གནང་ཕྱོགས་ལ་བསམ་འཆར་དང་།  དྲི་བ་ཇི་ཡོད་མང་ཚོགས་ལ་དུས་ཚོད་འདང་ངེས་གནང་པར།  དྲི་བ་དང་བསམ་ཚུལ་འདྲེས་མ་ཁག་ལྔ་ཙམ་གསུང་མཁན་བྱུང་བ་རྣམས་ལ་ལན་འདེབས་དགོས་སར་ལན་འདེབས་དང་།  གསལ་བཤད་དགོས་སར་གསལ་བཤད་གནང་།  མཇུག་ཏུ།  དཔལ་ལྡན་སྲིད་སྐྱོང་མཆོག་གིས་གོང་གསལ་དོན་གནད་རྣམས་ལ་མཇུག་བསྡོམས་དང་འབྲེལ་ད་ལྟའི་ཚོགས་གཙོ་དང་ཕྱག་རོགས་རྣམ་པ།  དེ་བཞིན་དེ་སྔ་ཚོགས་པའི་ལས་དོན་ཡུན་རིང་དང་བླངས་ཐོག་ནས་ཕྱག་ལས་གནང་མཁན་རྣམས་ལ་བསྔགས་བརྗོད་གནང་བ་དང་།  ས་གནས་ཚོགས་གཙོས་ཐུགས་རྗེ་ཆེ་ཞུས་ཏེ་དེ་རིང་གི་མཛད་རིམ་གྲུབ།  སང་སྔ་དྲོ་རི་དྭགས་དགའ་ཚལ་གླིང་དགོན་པར་གནས་གཟིགས་དང་ས་གནས་ཀྱི་གཞོན་སྐྱེས་རྣམས་དང་མཇལ་མོལ་གནང་རྒྱུ་དང་། ཉིན་རྒྱབ་ཅི་ཀ་གྷོར་ཕེབས་ཐོན་གནང་རྒྱུ་ཡིན་པ་བཅས་ཀྱི་གནས་ཚུལ་སྙིང་བསྡུས་སུ།   །