༄༅། །ཕྱི་ལོ་ ༢༠༢༣ ཟླ་བ་ ༠༡ ཚེས་ ༣༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་བདམས་ཐོན་སྲིད་འཛིན་སྐུ་ཞབས་པི་ཊར་པ་ཝེལ (Petr Pavel) མཆོག་ལ་དགའ་བསུའི་འཚམས་འདྲི་ཞུས་གནང་ཡོད།
དེ་ཡང་མཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་དུ་བདམས་ཐོན་བྱུང་བར་དགའ་བསུའི་འཚམས་འདྲི་ཞུ་རྒྱུ་ཡིན།
ཅེཀ་སྤྱི་མཐུན་རྒྱལ་ཁབ་ཀྱིས་དབུ་ཁྲིད་ལམ་སྟོན་འོག་འཛམ་གླིང་ནང་མང་གཙོ་དང་། རྩ་འཛིན། རིན་ཐང་གཞི་རྩར་བཟུང་བའི་ལམ་ལུགས་ཀྱི་འོད་སྣང་བསྟན་གནང་ཡོད་ཅིང་། དེ་ལྟ་བུའི་རིན་ཐང་འཛམ་གླིང་གང་སར་ལག་བསྟར་བྱེད་ཀྱིན་མེད། སྐུ་ཉིད་ཀྱི་དབུ་ཁྲིད་འོག་ཅེཀ་སྤྱི་མཐུན་རྒྱལ་ཁབ་ཀྱི་དམ་བཅའ་བཞིན་འགྲོ་བ་མིའི་ཐོབ་ཐང་དང་། མང་གཙོའི་རང་དབང་གོང་ནས་གོང་དུ་འཕེལ་ཏེ་གཞན་གྱི་མིག་དཔེར་འགྱུར་བའི་གདེང་ཚོད་ཡོད། ཅེས་དང་།
མཐར་དཔལ་ལྡན་སྲིད་སྐྱོང་མཆོག་གིས། སྐུ་ཉིད་ཀྱིས་མུ་མཐུད་སྲིད་འཛིན་ཟུར་པ་སྐུ་ཞབས་ཝ་ཀེ་ལེབ་ཧ་ཝེལ་ (Vaclav Havel) མཆོག་གི་མཛད་རྗེས་རྒྱུན་སྐྱོང་གནང་སྐྱོང་ཡོང་བ་མ་ཟད། ཡོ་རོབ་དང་འཛམ་གླིང་སྤྱི་ཡོངས་སུ་ཞི་བདེ་ཁྱབ་འཕེལ་ཡོང་སླད་ཞབས་འདེགས་སྒྲུབ་ཐུབ་པའི་རེ་བ་ཡོད། ཅེས་འཁོད་ཡོད་པ་བཅས།།
