༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༣ ཟླ་བ་ ༢ ཚེས་ ༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་ཅི་ཀ་གྷོ་ཁུལ་གྱི་མཛད་རིམ་མཐའ་མ་སྟེ།  ཅི་ཀ་གྷོ་ཁུལ་དུ་ཡོད་པའི་གཞོན་སྐྱེས་རྣམས་དང་མཇལ་འཕྲད་གནང་སྟེ།  བོད་སྐོར་ངོ་སྤྲོད་མ་གནང་གོང་རྒན་བསྟན་ཆོས་ལགས་ཀྱིས་དགའ་བསུའི་གསུང་བཤད་གནང་བ་དང་།  སློབ་མ་བསྟན་འཛིན་ཀུན་བཟང་ལགས་ཀྱིས་དཔལ་ལྡན་སྲིད་སྐྱོང་མཆོག་གི་ལོ་རྒྱུས་སྙིང་བསྡུས་ངོ་སྤྲོད་གནང་གྲུབ་མཚམས་དཔལ་ལྡན་སྲིད་སྐྱོང་མཆོག་གིས།  གངས་རི་ར་བས་བསྐོར་བའི་ཞིང་ཁམས་སུ་ཞེས་པའི་གོ་དོན་ཨིན་སྐད་ཐོག་འགྲེལ་བརྗོད་དང་འབྲེལ་ནས་བོད་ཀྱི་ས་བབ་ཆགས་ཚུལ་དང་།  ཕུན་སུམ་ཚོགས་པའི་བོད་ཀྱི་གཙང་པོ་ཆེ་ཁག་ཁྱིམ་མཚེས་རྒྱལ་ཁབ་ཁག་ལ་ཅི་འདྲའི་གལ་ཆེན་པོ་ཆགས་ཡོད་པ།   དེ་དང་འབྲེལ་ནས་འཛམ་གླིང་གི་གནམ་གཤིས་འགྱུར་ལྡོག་སྐོར།  བཙན་པོའི་དུས་རབས་ནས་བཟུང་བོད་ཀྱི་ལོ་རྒྱུས་གནས་སྟངས་སྙིང་བསྡུས།  རྒྱ་གར་ནས་བོད་དུ་ནང་ཆོས་དར་ཚུལ།  བོད་དང་ཨ་རིའི་ལོ་རྒྱུས་ཀྱི་འབྲེལ་བ།  ཕྱི་ལོ་ ༡༩༤༩ ལོར་རྒྱ་གཞུང་གིས་བོད་ལ་ཐོག་མར་བཙན་འཛུལ་བྱས་ནས་ད་བར་གྱི་ལོ་རྒྱུས་སོགས་ངོ་སྤྲོད་གནང་།  དེ་རྗེས་གཞོན་སྐྱེས་ཚོས།  ནང་ཆོས་དང་།  སྲིད་སྐྱོང་བྱེད་པར་ཆ་རྐྱེན་གང་དང་ཅི་ཞིག་ཚང་དགོས་མིན།  དཔལ་ལྡན་སྲིད་སྐྱོང་མཆོག་གིས་གཞོན་སྐྱེས་རྣམས་ལ་བརྡ་ལན་ག་རེ་ཡོད་མེད་སོགས་ཀྱི་དྲི་བ་ཁག་ལ་བཀའ་ལན་འགྲེལ་བརྗོད་གནང་བ་དང་ཆབས་ཅིག་གཞོན་སྐྱེས་རྣམས་ལ།  བོད་ཀྱི་ས་བབ་ཆགས་ཚུལ་གྱིས་མཚོན་བོད་ཀྱི་ལོ་རྒྱུས་ཤེས་རྟོགས་ཐུབ་པ་བྱུང་ན།  མི་གཞན་ལ་བོད་སྐོར་འགྲེལ་བརྗོད་དང་།  རྒྱ་ནག་གཞུང་གི་འཁྱོག་བཤད་ལ་ཡོ་བསྲང་ལན་འདེབས་བྱེད་རྒྱུར་ཕན་ཐོགས་ཡོད་པས།  དེའི་ཐོག་དོ་སྣང་དགོས་པའི་རེ་སྐུལ་གནང་།  མཇུག་ཏུ་གཙོ་སྐྱོང་ནས་ཐུགས་རྗེ་ཆེ་ཞུས་རྗེས་གཟའ་མཇུག་སློབ་གྲྭའི་འཛིན་གྲྭ་ཁག་ལ་གཟིགས་སྐོར་དང་།   གོང་གི་མཇལ་མོལ་ནང་མཉམ་ཞུགས་གནང་མཁན་སློབ་ཕྲུག་དང་མཉམ་དུ་དྲན་རྟེན་སྐུ་དཔར་སྒྲོན་ནས་དེ་ཉིན་གྱི་ལས་རིམ་ལེགས་པར་གྲུབ། ས་གནས་ཚོགས་གཞོན་དང་རྒྱུན་ལས་རྣམས་ནས་དཔལ་ལྡན་སྲིད་སྐྱོང་མཆོག་གནམ་ཐང་དུ་ཕེབས་སྐྱེལ་ཞུས་ཏེ་དགོང་དྲོ་ཝ་ཤིང་ཊོན་ཌི་སི་རུ་ཕེབས་འབྱོར་བྱུང་ཞིང་། ཕྱི་ཚེས་ ༦ ནས་བཟུང་ཉིན་ཤས་རིང་ཨ་རི་སྲིད་གཞུང་གི་རོགས་དངུལ་དང་འབྲེལ་བ་ཡོད་པའི་གནད་ཡོད་མི་སྣ་དང་། ཨ་རིའི་གྲོས་ཚོགས་ཀྱི་གནད་ཡོད་དཔོན་རིགས་དང་མཇལ་མོལ་གནང་རྒྱུའི་མཛད་རིམ་བསྐྱངས་རྒྱུ་ཡིན་པ་བཅས། །