༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།   ཕྱི་ལོ་ ༢༠༢༣ ཟླ་བ་ ༢ ཚེས་ ༤ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རི་དྭགས་དགའ་ཚལ་གླིང་དགོན་པར་ (Deer Park Monastery) གནས་གཟིགས་གནང་གྲུབ་མཚམས།  ཝིས་ཀོན་སིན་རི་དྭགས་དགའ་ཚལ་གླིང་དགོན་པའི་ཚོགས་ཁང་དུ་སློབ་གྲྭར་བསྐྱོད་བཞིན་པའི་བོད་རིགས་གཞོན་སྐྱེས་དང་།  གཞོན་སྐྱེས་ཆེད་ལས་པ།  དེ་མིན་གྱི་གཞོན་སྐྱེས།  ཕྱི་རྒྱལ་དོ་སྣང་ཅན་གཞོན་སྐྱེས་རེ་ཟུང་བཅས་དང་གླེང་མོལ་གནང་ཡོད།  

དེ་ཡང་དཔལ་ལྡན་སྲིད་སྐྱོང་མཆོག་ས་གནས་ཁག་ཏུ་གཞུང་འབྲེལ་འཚམས་གཟིགས་གནང་སྐབས།  མ་འོངས་བོད་ཀྱི་བདག་པོ་ཡིན་པའི་བོད་རིགས་གཞོན་སྐྱེས་དང་མཉམ་དུ་མཇལ་མོལ་གྱི་མཛད་རིམ་སྒྲིག་དགོས་དོན་གཙོ་བོ་ནི།  བོད་རིགས་གཞོན་སྐྱེས་ཚོས་ཕྱི་མི་རྣམས་ལ་བོད་སྐོར་འགྲེལ་བརྗོད་བྱེད་སྐབས་ཀྱི་རྒྱུ་ཆ་ཕུན་སུམ་ཚོགས་སུ་གཏོང་རྒྱུ་དང་།  བོད་རིགས་གཞོན་སྐྱེས་ཚོའི་བོད་སྐོར་གྱི་ཤེས་བྱ་ཕུན་སུམ་ཚོགས་སུ་གཏོང་རྒྱུ་དེ་ཡིན་པ་རེད།  ཝིས་ཀོན་སིན་བོད་ཀྱི་སྐད་ཡིག་དང་རིག་གཞུང་སློབ་གྲྭའི་སློབ་སྤྱི་བྱམས་པ་མཁས་གྲུབ་ལགས་ཀྱིས་གླེང་མོལ་གྱི་མཛད་རིམ་དབུ་འཛུགས་དང་འབྲེལ་གཞོན་སྐྱེས་རྣམས་ཀྱི་གནས་སྟངས་ངོ་སྤྲོད་རོབ་ཙམ་གནང་གྲུབ་མཚམས།  དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཞོན་སྐྱེས་རྣམས་ལ།  བོད་གངས་ཅན་ལྗོངས་ཀྱི་ས་བབ་ཆགས་ཚུལ་དང་།  བོད་ཀྱི་སྐྱེས་ཁམས་ཁོར་ཡུག་གནས་སྟངས།  བོད་ཀྱི་ལོ་རྒྱུས་གནས་བབ།  རྒྱ་གར་ནས་བོད་དུ་ནང་ཆོས་དར་ཚུལ།  ཕྱི་ལོ་ ༡༩༥༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་རྒྱ་གར་དུ་བཙན་བྱོལ་ལ་ཕེབས་མ་ཐག་གི་འཕགས་བོད་འབྲེལ་བ།  ཨ་རི་དང་བོད་དབར་གྱི་ལོ་རྒྱུས་འབྲེལ་བ།  ༸གོང་ས་མཆོག་གི་ཐུགས་རྗེའི་བཀའ་དྲིན་ལ་བརྟེན་ནས་དེང་སྐབས་ཨ་རིའི་ནང་བོད་དོན་ལ་ཚད་མཐོའི་རྒྱབ་སྐྱོར་ཇི་ལྟར་བྱུང་བའི་འཕེལ་རིམ་བཅས་གསུང་པའི་ལམ་ནས་བོད་སྐོར་ངོ་སྤྲོད་གནང་། མཇུག་ཏུ་དཔལ་ལྡན་སྲིད་སྐྱོང་མཆོག་གིས།  བོད་དོན་ཞུ་གཏུག་ལས་འགུལ་ནི་ཧ་ཅང་གི་གལ་ཆེན་པོ་ཡིན་པར་བརྟེན་རྒྱལ་སྤྱིའི་བོད་དོན་ལས་འགུལ་ཁང་ནས་ལོ་ལྟར་གོ་སྒྲིག་གནང་གི་ཡོད་པའི་བོད་དོན་ཞུ་གཏུག་ལས་འགུལ་ནང་མཉམ་ཞུགས་དགོས་པའི་འབོད་སྐུལ་ནན་པོ་གནང་ཡོད།

དྲི་བ་དྲིས་ལན་སྐབས།  ཨ་རིའི་རོགས་དངུལ་སྐོར་དང་།  གཞོན་སྐྱེས་བོད་པའི་སྤྱི་ཚོགས་ནང་འདྲེས་ཐབས་སྐོར།  དང་བླངས་བོད་དོན་ཞུ་གཏུག་ལས་འགུལ་སྐོར།  མིག་སྔའི་སྤྱི་ཚོགས་ཀྱི་གནད་དོན་སྐོར་དྲི་བ་བྱུང་བ་ཁག་ལ་ལན་འདེབས་གསལ་བཤད་གནང་བ་དང་ཆབས་ཅིག་ཨ་རི་དང་།  ཡུ་རོབ་སོགས་རྒྱལ་སྤྱིའི་ཆབ་སྲིད་ཀྱི་གནས་སྟངས་འགྱུར་འགྲོས་འཁྲུག་ཆ་ཆེ་བའི་ཁོར་ཡུག་ཁྲོད། དཔལ་ལྡན་སྲིད་སྐྱོང་མཆོག་གི་སྤྱིའི་དགོངས་པ་བཞེས་ཕྱོགས་གང་ཡིན་པ་ཡང་གཞོན་སྐྱེས་རྣམས་ཀྱི་བསམ་བློའི་དཔྱད་གཞིར་ངོ་སྤྲོད་མདོར་བསྡུས་གནང་།  གཞོན་སྐྱེས་ཁག་ཅིག་གིས་བོད་སྐོར་ངོ་སྤྲོད་གནང་བར་དོན་དམ་གྱི་ཕན་ཐོགས་བྱུང་བའི་རྣམ་འགྱུར་བསྟན།  དཔལ་ལྡན་སྲིད་སྐྱོང་མཆོག་གིས་གཞོན་སྐྱེས་དང་ལྷན་དུ་གླེང་མོལ་གནང་བའི་མཛད་རིམ་འདིར།  ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་བཀྲ་ཤིས་རྡོ་རྗེ་ལགས་དང་།  ཝིས་ཀོན་སིན་བོད་ཀྱི་སྐད་ཡིག་དང་རིག་གཞུང་སློབ་གྲྭའི་སློབ་སྤྱི་བྱམས་པ་མཁས་གྲུབ་ལགས།  རི་དྭགས་དགའ་ཚལ་གླིང་དགོན་པའི་དགེ་འདུན་པ་བཅས་མཉམ་ཞུགས་གནང་ཡོད་པ་དང་།  དཔལ་འབྱོར་དྲུང་ཚབ་བསྟན་འཛིན་ལེགས་གྲུབ་ལགས་དང་།  བྱང་ཨ་རི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་དཔལ་ལྡན་སྲིད་སྐྱོང་མཆོག་དང་ལྷན་བཅར་ཞུས་ཡོད།  

དཔལ་ལྡན་སྲིད་སྐྱོང་མཆོག་དང་བོད་རིགས་གཞོན་སྐྱེས་དབར་གྱི་མཇལ་མོལ་མཛད་རིམ་འདི།  ཝིས་ཀོན་སིན་བོད་ཀྱི་སྐད་ཡིག་དང་རིག་གཞུང་སློབ་གྲྭའི་སློབ་སྤྱི་བྱམས་པ་མཁས་གྲུབ་ལགས་ཀྱིས་གཙོ་སྐྱོང་གནང་ཞིང་།  ཚོགས་གཙོ་བཀྲ་ཤིས་རྡོ་རྗེ་ལགས་ཀྱིས་དཔལ་ལྡན་སྲིད་སྐྱོང་མཆོག་གིས་གཙོས་ཚང་མར་ཐུགས་རྗེ་ཆེ་ཞུས་ཏེ།  ཝིས་ཀོན་སིན་བོད་རིགས་གཞོན་སྐྱེས་རྣམས་དང་དཔལ་ལྡན་སྲིད་སྐྱོང་དབར་གྱི་མཇལ་མོལ་ལས་རིམ་ཟིན་རྗེས་ཝིས་ཀོན་སིན་ས་གནས་སུ་འཚམས་གཟིགས་ལེགས་གྲུབ་བྱུང་ཡོད།  ཉིན་རྒྱབ་ཅི་ཀ་གྷོ་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཞོན་དང་རྒྱུན་ལས་ཀྱི་སྣེ་ལེན་ཕེབས་རོགས་འོག་ཝིས་ཀོན་སིན་ནས་ཅི་ཀ་གྷོར་ཕེབས་ཐོན་གནང་། ཕྱི་དྲོ་ས་གནས་ཀྱི་སྤྱི་ཁང་དུ་གཟའ་མཇུག་སློབ་གྲྭའི་སློབ་ཕྲུག་དང་།  རྒྱུན་ལས།  མང་ཚོགས་བཅས་ནས་བོད་ལུགས་ལྟར་དཔལ་ལྡན་སྲིད་སྐྱོང་མཆོག་ལ་ཕེབས་བསུ་གཟབ་རྒྱས་ཞུས་ཡོད།

ཚོགས་ཁང་དུ་ཕེབས་འབྱོར་རྗེས་གཟའ་མཇུག་སློབ་གྲྭའི་སློབ་ཕྲུག་རྣམས་ནས་རིག་གཞུང་འཁྲབ་སྟོན་དང་།  གཞས་སྣ་ཁག་ཅིག་གཟིགས་འབུལ་ཞུས་གྲུབ་མཚམས་གཙོ་སྐྱོང་ནས་དཔལ་ལྡན་སྲིད་སྐྱོང་མཆོག་གི་ལོ་རྒྱུས་ངོ་སྤྲོད་སྙིང་བསྡུས་གནང་རྗེས་ས་གནས་ཀྱི་ཚོགས་གཞོན་ཐུབ་བསྟན་ཆོས་བཟང་ལགས་ཀྱིས་དགའ་བསུའི་གསུང་བཤད་གནང་བ་དང་ཆབས་ཅིག་ས་གནས་ཀྱི་ལས་བསྡོམས་སྒྲོགས་སྦྱང་ཞུས།  བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ཀྱིས་དཔལ་ལྡན་སྲིད་སྐྱོང་མཆོག་ཐེངས་འདིར་བྱང་ཨ་རིའི་ཁུལ་དུ་གཞུང་འབྲེལ་འཚམས་གཟིགས་ཕེབས་དགོས་དོན་དང་།  སྤྱི་མཐུན་ཚོགས་པའི་ལས་དོན་ལ་ས་གནས་མང་ཚོགས་ནས་སྔར་ལྷག་རྒྱབ་སྐྱོར་གནང་དགོས་པའི་གལ་ཆེའི་རང་བཞིན་སྐོར་གསུངས་ནས་མི་འབོར་གྲངས་བཤེར་དང་།  བོད་དོན་ཞུ་གཏུག་ལས་འགུལ་ལ་ཐུགས་སྣང་རྒྱབ་སྐྱོར་སྔར་ལྷག་དགོས་པའི་འབོད་སྐུལ་གནང་།  དཔལ་ལྡན་སྲིད་སྐྱོང་མཆོག་གིས་མང་ཚོགས་ལ་གསུང་བཤད་གནང་བའི་ནང་།  ༸གོང་ས་མཆོག་གི་ཐུགས་རྗེ་བཀའ་དྲིན་དང་།  གཞིས་ལུས་མི་མང་གི་བློས་གཏོང་།  བཙན་བྱོལ་ནང་མི་རབས་རྒན་པ་རྣམ་པས་སྐུ་ལས་བསྐྱོན་པ་ལ་བརྟེན་ནས་ང་ཚོ་བཙན་བྱོལ་བ་འདྲ་འདྲའི་ནང་ནས་མི་འདྲ་བ་ཆགས་ཡོད་པའི་སྐོར་དང་།  དེང་སྐབས་བོད་ནང་རྒྱ་ནག་གཞུང་གིས་དེང་དུས་ཚན་རིག་ལག་རྩལ་ལ་བརྟེན་ནས་དམ་བསྒྲགས་ཅན་གྱི་སྲིད་བྱུས་ལག་ལེན་བསྟར་བཞིན་པའི་སྐོར།  རང་ལུས་མེར་སྲེག་གཏོང་མཁན་གྱིས་མཚོན་རྒྱལ་གཅེས་དཔའ་བོ་དཔའ་མོ་རྣམས་ཀྱི་བློས་གཏོང་ཆེན་པོ་གནང་བ་ནམ་ཡང་ཆུད་ཟོས་སུ་ཕྱིན་མེད་པའི་སྐོར།   རྒྱ་ནག་གཞུང་གིས་རང་རིགས་བོད་ཕྲུག་རྣམས་གཏན་འཇགས་སློབ་གྲྭ་ཁག་ནང་བརྫངས་ནས་བོད་ཀྱི་སྐད་ཡིག་ཉམས་དམས་སུ་གཏོང་ཐབས་ཀྱི་སྲིད་བྱུས་འཛིན་བཞིན་ཡོད་པའི་སྐོར་སོགས་བོད་ནང་གི་གནས་སྟངས་སྐོར་དང་།  གཞན་ཡང་དཔལ་ལྡན་སྲིད་སྐྱོང་མཆོག་གིས།  ང་ཚོས་གཉིས་སྨན་དབུ་མའི་ལམ་གྱི་སྲིད་བྱུས་རྒྱུན་འཁྱོངས་གནང་གི་ཡོད་པ།  བོད་འདི་ལོ་རྒྱུས་ཐོག་རང་བཙན་གྱི་གནས་བབ་ཡིན་པའི་སྐོར་སྔ་ལོ་ཨ་རིའི་གྲོས་ཚོགས་ནང་ཉན་ཞིབ་གོ་སྒྲིག་དང་།  ཨ་རིའི་གྲོས་ཚོགས་ནང་དེ་འབྲེལ་གྱི་ཁྲིམས་འཆར་གཏན་འབེབས་ཡོང་ཐབས་སུ་འབད་བཞིན་པའི་སྐོར།  རྒྱ་ནག་གཞུང་དང་མཉམ་དུ་སྐད་ཆ་མ་བཤད་པར་བོད་ཀྱི་དཀའ་ངལ་སེལ་ཐབས་མེད་པ་དང་།  རྒྱལ་སྤྱིའི་ཐོག་བོད་དོན་ཞུ་གཏུག་ལས་འགུལ་ཤུགས་ཆེ་རུ་གཏོང་དགོས་ངེས་ཀྱང་།  བོད་ཀྱི་གནད་དོན་འདི་རང་སོ་སོའི་རྒྱལ་ཁབ་ཀྱི་ཁེ་ཕན་སྒང་ལ་འཇོག་མི་སྲིད་པ་བཅས་གནད་དོན་འདི་གཉིས་ངེས་པར་དུ་ཤེས་དགོས།  ཞེས་དང་།

ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་མུ་མཐུད་ནས།  བཀའ་ཤག་སྐབས་ ༡༦ པས་བཙན་བྱོལ་བོད་མི་འདུས་སྡོད་གཞིས་ཆགས་ཁག་གི་གནས་སྟངས་དང་།  འཛིན་སྐྱོང་གི་སྒྲོམ་གཞི་སྲ་བརྟན་གཏོང་ཆེད་དུས་ཚོད་རིང་པོ་བཏང་ནས་འབད་བརྩོན་གནང་སྐོར་དང་།  བཙན་བྱོལ་བོད་མིའི་མི་འབོར་གྲངས་བཤེར་ལས་དོན་གྱི་གལ་ཆེའི་རང་བཞིན་བཅས་ངོ་སྤྲོད་གནང་བ་མ་ཟད། ས་ཁང་སྒྲིག་གཞི་གསར་པའི་དགོས་དམིགས་ཀྱང་འགྲེལ་བརྗོད་རོབ་ཙམ་གནང་ཡོད།དྲི་བ་དྲི་ལན་སྐབས།  གཟའ་མཇུག་སློབ་གྲྭའི་བསླབ་གཞི་དང་།  དྲྭ་ཐོག་དང་བླངས་དཔྱ་དངུལ།  ཨ་རུ་ན་ཅལ་ཁུལ་གྱི་བཙན་བྱོལ་བོད་མིའི་གཞིས་ཆགས་ཁག་གི་གནས་སྟངས།  ཅི་ཀ་གྷོ་རྒྱ་རིགས་སློབ་ཕྲུག་གི་རྣམ་འགྱུར་སྟོན་སྟངས་དེ་སྔ་དང་མི་འདྲ་བར་འགྱུར་བ་ཕྱིན་པ་སོགས་ཀྱི་སྐོར་དྲི་བ་ཕེབས་པར་ལན་འདེབས་གསལ་བཤད་གྲུབ་རྗེས་གཙོ་སྐྱོང་ནས་ཐུགས་རྗེ་ཆེ་ཞུའི་གསུང་བཤད་གནང་།  

ས་གནས་མང་ཚོགས་འདུ་འཛོམས་ཆེ་བའི་གོ་སྐབས་དང་བསྟུན་ནས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་ཅི་ཀ་གྷོ་གཟའ་མཇུག་སློབ་གྲྭའི་སློབ་ཕྲུག་བུ་དང་བུ་མོ་རྩེ་ཕུད་གཉིས་ལ་གཟེངས་བསྟོད་ཕྱག་འཁྱེར་གནང་ཡོད་པ་དཔལ་ལྡན་སྲིད་སྐྱོང་མཆོག་གི་ཕྱག་ནས་སློབ་ཕྲུག་སོ་སོར་གནང་། དེ་བཞིན་ས་གནས་གཟའ་མཇུག་སློབ་གྲྭར་ལོ་མང་དགེ་རྒན་གནང་མཁན་བློ་བཟང་ཡར་འཕེལ་ལགས་སུའང་ཐུགས་རྗེ་ཆེ་ཞུའི་མཇལ་དར་གནང་བ་དང་འབྲེལ་ཚེས་ ༤ ཉིན་གྱི་མཛད་རིམ་ཁག་ལེགས་པར་གྲུབ།  ཕྱི་ཚེས་ ༥ ཉིན་གྱི་སྔ་དྲོར་གཟའ་མཇུག་སློབ་གྲྭར་གཟིགས་སྐོར་དང་།  ས་གནས་སུ་ཡོད་པའི་བོད་རིགས་གཞོན་སྐྱེས་དང་མཇལ་མོལ་གནང་རྒྱུ་ཡིན་པ་བཅས།།