༄༅། །ཕྱི་ལོ་ ༢༠༢༣ ཟླ་བ་ ༢ ཚེས་ ༧ ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རི་རྒྱལ་ས་ཝ་ཤིང་ཊོན་ཌི་སིར་ཨ་རི་གྲོས་ཆོགས་འོག་མའི་འཐུས་མི་དང་གྲོས་ཚོགས་ཀྱི་དགོས་དངུལ་ཆ་བགོས་ཚོགས་ཆུང་གི་ཚོགས་མི་སྐུ་ཞབས་ཌི་ཡཅ་བྷ་ལཊ་ (Diaz Balart)  ལགས་དང་མཇལ་འཕྲད་གནང་རྗེས་ཉིན་རྒྱབ་གྲོས་ཚོགས་འོག་མའི་འཐུས་མི་ལྕམ་ཡོང་ཀིམ Young Kim ལགས།   གྲོས་ཚོགས་གོང་མའི་འཐུས་མི་སྐུ་ཞབས་བྷྲ་ཨིན་ཤ་ཊས་ (Brian Schatz) ལགས།   གྲོས་ཚོགས་འོག་མའི་འཐུས་མི་དང་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ། དེ་བཞིན་གྲོས་ཚོགས་ནང་ཐོག་མར་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་གྱི་ཁྲིམས་འཆར་བསྐྱར་དུ་གྲོས་ཚོགས་འོག་མའི་ནང་ངོ་སྤྲོད་གནང་མཁན་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) ལགས་དང་མཇལ་འཕྲད་གནང་ཡོད་པ་མ་ཟད། གཞན་ཡང་དཔལ་ལྡན་སྲིད་སྐྱོང་མཆོག་གིས་ཨ་རི་གྲོས་ཚོགས་གོང་མའི་འཐུས་མི་དང་། གོང་གསལ་ཁྲིམས་འཆར་གྲོས་ཚོགས་གོང་མའི་ནང་བསྐྱར་དུ་ངོ་སྤྲོད་གནང་མཁན་སྐུ་ཞབས་ཊོ་ཌི་ཡོངྒ་ (Todd Young) ལགས་དང་མཇལ་མོལ་གནང་ཡོད། གོང་གསལ་མཇལ་མོལ་སྐབས་བྱང་ཨ་རིའི་སྐུ་ཚབ་དོན་གཅོད་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་ལྷན་ཚོགས་གཙོ་སྐུ་ཞབས་རི་ཆ་ཊི་གེར་ (དྲྭ་ཐོག་ནས་མཉམ་ཞུགས་གནང་།)  ལགས་དང་། བར་བརྒལ་འགན་འཛིན་དང་འགན་འཛིན་གཞོན་པ་བཅས་ལྷན་བཅར་ཞུས་གནང་ཡོད། མཇལ་མོལ་གནང་སྐབས་དཔལ་ལྡན་སྲིད་སྐྱོང་མཆོག་གིས་གྲོས་ཚོགས་འཐུས་མི་རྣམ་པར་གོང་གསལ་ཁྲིམས་འཆར་གཏན་འབེབས་ཡོང་སླད་རྒྱབ་སྐྱོར་གནང་རྒྱུར་འབོད་བསྐུལ་གནང་ཡོད་པ་མ་ཟད། ཁྲིམས་འཆར་དེ་དག་གཏན་འབེབས་བྱུང་ཚེ་འབྱུང་འགྱུར་བོད་དོན་རྒྱབ་སྐྱོར་གནང་མཁན་ཡུ་རོབ་རྒྱལ་ཁབ་དང་རྒྱལ་ཁབ་གཞན་རྣམས་ནས་ཀྱང་དེ་མཚུངས་ཁྲིམས་འཆར་གཏན་འབེབས་གནང་རྒྱུར་མིག་ལྟོས་བྱ་ཡུལ་དང་། བློ་སྟོབས་སྤེལ་རྒྱུར་ཐུགས་ཕན་ཆེན་པོ་ཡོང་གཞི་དང་། དེ་བཞིན་བོད་དོན་ཐོག་སྔར་ལམ་བཞིན་ཆབ་སྲིད་དང་དཔལ་འབྱོར་གྱི་རྒྱབ་སྐྱོར་མུ་མཐུད་གནང་རྒྱུར་འབོད་བསྐུལ་ཞུས་གནང་ཡོད།དེ་མིན་ཕྱི་ཚེས་ ༦ རེས་གཟའ་ཟླ་བ་ཉིན་གྱི་སྔ་དྲོ་ཨ་རི་ཕྱི་སྲིད་ལས་ཁུངས་ཀྱི་མང་གཙོ་དང་། འགྲོ་བ་མིའི་ཐོབ་ཐང་དང་ངལ་རྩོལ་སྡེ་ཚན་གྱི་འབྲེལ་ཡོད་ལས་འཆར་འགན་འཛིན་དང་ལས་བྱེད་རྣམས་དང་མཇལ་འཕྲད་ཀྱིས་བོད་མིའི་སྒྲིག་འཛུགས་ཀྱི་མ་འོངས་ལས་འཆར་སོགས་ཀྱི་སྐོར་འགྲེལ་བརྗོད་དང་གསལ་བཤད་སོགས་གནང་བ་དང་། ཕྱི་དྲོར་རྒྱལ་ཡོངས་མང་གཙོ་བསྟི་གནས་ཁང་གི་སྤྱི་ཁྱབ་འགན་འཛིན་ (Drek Mitchell) ལགས་དང་ལས་བྱེད་རྣམས་དང་མཇལ་འཕྲད་གནང་ཡོད་པ་བཅས། །