༄༅། །ཕྱི་ལོ་ ༢༠༢༣ ཟླ་བ་ ༠༡ ཚེས་ ༡༥ ཉིན་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཨོ་གླིང་གནས་སྡོད་རྒྱ་རིགས་རྩོམ་པ་པོ་དང་། མཁས་དབང་། མང་གཙོ་དོན་གཉེར་བ་ཁག་གཅིག་དང་ཐུག་འཕྲད་གནང་ཡོད།

དེ་ཡང་སྐབས་དེར་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་རྒྱ་རིགས་ཆེད་གྲོགས་རྣམས་ལ་གནམ་ལོ་གསར་ཚེས་ཀྱི་འཚམས་འདྲི་དང་སྦྲགས། ཁོང་རྣམས་ནས་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ལེགས་འབུལ་ཞུས་པ་མ་ཟད། རྒྱ་རིགས་དང་བོད་མི་བར་མཛའ་འབྲེལ་བཟང་དུ་གཏོང་བར་ཕྱོགས་གཉིས་དབར་འབྲེལ་མཐུད་མང་དུ་གཏོང་དགོས་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དགོངས་གཞི། བོད་མིའི་སྒྲིག་འཛུགས་ཀྱི་བོད་རྒྱའི་དཀའ་རྙོག་སེལ་ཐབས་ཀྱི་དབུ་མའི་ལམ་གྱི་སྲིད་བྱུས། ད་ལྟའི་བོད་ནང་གི་གནས་སྟངས་བཅས་ཀྱི་སྐོར་འགྲེལ་བརྗོད་གནང་ཡོད་པ་རེད།

ཚོགས་འདུའི་ཐོག་རྒྱ་རིགས་ཆེད་གྲོགས་རྣམས་ནས་བོད་མིའི་འཚེ་མེད་ཞི་བའི་རང་དབང་འཐབ་རྩོད་ལ་གདུང་སེམས་མཉམ་སྐྱེ་དང་བཅས་བོད་ཀྱི་རིག་གཞུང་དང་། འགྲོ་བ་མིའི་ཐོབ་ཐང་། རྒྱ་ནག་ནང་མང་གཙོ་དར་འཕེལ་གཏོང་ཕྱོགས་སོགས་ཀྱི་གནད་དོན་ཐོག་དགོངས་ཚུལ་བཏོན་གནང་ཡོད། ཆུ་ཚོད་གསུམ་རིང་གི་ཚོགས་འདུའི་ནང་ཨོ་གླིང་དུ་རྟེན་གཞི་བྱས་པའི་རྒྱ་ནག་མང་གཙོ་མཐུན་ཚོགས་ (Chinese Alliance for Democracy) ཀྱི་ཚོགས་གཙོ་འབུམ་རམས་པ་ཇི་ཧང་ཀྲོང་ལགས་དང་། རྒྱ་ནག་མང་གཙོ་ལྷན་ཚོགས་ (Federation for a Democratic China)་ཀྱི་ཚོགས་གཙོ་འབུམ་རམས་པ་ཅིན་ཇིན་ལགས་ཀྱིས་གཙོས་པའི་རྒྱ་རིགས་རྩོམ་པ་པོ་དང་། མཁས་དབང་། མང་གཙོ་དོན་གཉེར་བ་བཞི་བཅུ་ལྷག་མཉམ་ཞུགས་གནང་ཡོད་པ་རེད།

གཞན་ཡང་ཚོགས་འདུའི་སྐབས་ཨོ་གླིང་སིཊ་ནིར་རྟེན་གཞི་བྱས་པའི་རྒྱ་བོད་མཛའ་འབྲེལ་ཚོགས་པའི་ཚོགས་གཙོར་ལྕམ་སྐུ་ཀྲང་གྲུ་གྲུ་ལགས་གསར་འདེམས་གནང་ཡོད། རྒྱ་བོད་མཛའ་འབྲེལ་ཚོགས་པ་དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རྒྱ་བོད་མི་རིགས་བར་མཛའ་འབྲེལ་སྐྲུན་ཆེད་དེ་ལྟ་བུའི་ཚོགས་པ་ཞིག་མཁོ་གལ་ཆེ་བའི་ལམ་སྟོན་བཀའ་སློབ་ཕེབས་པ་ལྟར་ཕྱི་ལོ་ ༢༠༠༨ ལོར་གསར་བཙུགས་གནང་ཡོད་པ་བཅས།།