༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༣ ཟླ་བ་ ༠༡ ཚེས་ ༢༤ ཉིན་ནིའུ་ཛི་ལེནྜ་གྱི་སྲིད་བློན་གསར་པ་ཀི་རི་སི་ཧིཔ་ཀིན་ (Chris Hipkins) མཆོག་ལ་དགའ་བསུའི་འཚམས་འཕྲིན་ཞིག་སྩལ་གནང་ཡོད།
དེ་ཡང་འཚམས་འཕྲིན་ནང་མགོན་པོ་གང་ཉིད་མཆོག་གིས། ངོས་རང་སྐུ་ཉིད་ཀྱི་མཛེས་སྡུག་ལྡན་པའི་རྒྱལ་ཁབ་ཏུ་ཐེངས་འགའ་བསྐྱོད་རྒྱུ་བྱུང་ལ། སྐབས་དེར་ངོས་ཀྱིས་འགྲོ་བ་མི་རིགས་གཅིག་གྱུར་གྱི་འདུ་ཤེས་གོང་མཐོར་གཏང་རྒྱུ་དང་། ཆོས་ལུགས་མཐུན་འབྲེལ་ཡོང་ཐབས་འབད་རྩོལ་བྱེད་བཞིན་པར་མི་མང་ཚོས་དོ་སྣང་ཆེན་པོ་བྱེད་བཞིན་པ་མཐོང་དུས་སེམས་ནང་ཚོར་སྣང་དམིགས་བསལ་བྱུང་།
དེང་སྐབས་འཛམ་གླིང་ལ་དཀའ་ངལ་ཧ་ཅང་ཆེན་པོ་འཕྲད་བཞིན་ཡོད། སྐུ་ཉིད་ཀྱིས་ནིའུ་ཛི་ལེནྜ་མི་མང་གི་དགོས་མཁོ་དང་མངོན་འདོད་སྒྲུབ་ཆེད་འབྱུང་འགྱུར་གྱི་དཀའ་ངལ་ཁག་ལ་གདོང་ལེན་གནང་ཐུབ་པའི་སྨོན་འདུན་ཞུ་རྒྱུ་ཡིན་ཞེས་འཁོད་ཡོད་པ་བཅས།།
