༄༅། །ཤི་ལོང་ས་གནས་འགོ་འཛིན་བསྟན་འཛིན་བསམ་གཏན་ལགས་དང་། ལས་དྲུང་ཆོས་སྒྲོན་ལགས། ཡན་ལག་སྨན་རྩིས་ཁང་གི་སྨན་པ་བསྟན་འཛིན་དགེ་ལེགས་ལགས། དགའ་ལྡན་ཆོས་གླིང་གི་བསོད་ནམས་བསྟན་པ་ལགས་དང་དཀོན་མཆོག་རྒྱ་མཚོ་ལགས་བཅས་ལས་གྲུབ་པའི་བོད་མིའི་སྐུ་ཚབ་ཚོགས་ཆུང་ནས་མེ་གྷཱ་ལཡ་མངའ་སྡེའི་སྤྱི་ཁྱབ་དྲུང་ཆེ་སྐུ་ཞབས་ཊོ་ནོལ་ཝ་ལང་(Donald Phillips Wahlang) ལགས་དང་མཇལ་འཕྲད་གནང་ཡོད།

དེ་ཡང་མཇལ་འཕྲད་སྐབས་ཤི་ལོང་ས་གནས་འགོ་འཛིན་བསྟན་འཛིན་བསམ་གཏན་ལགས་ཀྱིས་མེ་གྷཱ་ལཡ་མངའ་སྡེའི་སྤྱི་ཁྱབ་དྲུང་ཆེ་མཆོག་ལ་འཚམས་འདྲི་དང་སྦྲགས། དགའ་ལྡན་ཆོས་གླིང་དགོན་པ་བཞེངས་སྐྲུན་ལས་གཞིར་མཇུག་སྣོན་རོགས་སྐྱོར་དགོངས་བཞེས་ཡོང་བ་དང་། དེ་བཞིན་ཡན་ལག་སྨན་རྩིས་ཁང་ལ་ལས་ཁུངས་ས་ཆ་ཞིག་གནང་སྐྱོང་ཡོང་བའི་རེ་སྐུལ་ཞུས་ཤིང་། སྤྱི་ཁྱབ་དྲུང་ཆེ་མཆོག་གིས་ས་གནས་ཀྱི་འོས་བསྡུ་ལས་རིམ་གྲུབ་མཚམས་དེ་འབྲེལ་གནང་སྐྱོང་ཡོང་བའི་དགོངས་བཞེས་གནང་ཡོད་པ་བཅས།།