༄༅། །འདི་གར་བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན།   ཕྱི་ལོ་ ༢༠༢༣ ཟླ་བ་ ༡ ཚེས་ ༢༩ རེས་གཟའ་ཉི་མའི་ཨ་རིའི་གྲོང་ཁྱེར་ནིའུ་ཡོག་ཏུ་ཆགས་པའི་ཚོགས་ཁང་ཕུན་ཚོགས་སྡེ་བཞིའི་ནང་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ལྗིམ་མེག་གྷོ་ཝན་ (US congressman Jim McGovern) མཆོག་ལ་ཆེ་བསྟོད་སྣེ་ལེན་ཞུ་བའི་མཛད་སྒོ་རྒྱས་བསྡུས་འཚམས་པོ་ཞིག་གྲ་སྒྲི་གནང་ཡོད་པ་དང་།  བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་སྒྲུབ་ལགས་མཛད་སྒོ་གྲ་སྒྲིག་ཞུ་མཁན་གྱིས་གདན་ཞུས་ལྟར་མཉམ་ཞུགས་གནང་ཡོད།  དེ་ཡང་ཡུན་རིང་བོད་དོན་ལ་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ལྗིམ་མེག་གྷོ་ཝན་མཆོག་ལ་ཆེ་བསྟོད་སྣེ་ལེན་ཞུ་བའི་མཛད་སྒོ་འདི་ནི།  ལྷོ་བྱང་ཨ་རིའི་ཕྱོགས་བཞུགས་སྤྱི་འཐུས་རྣམ་པ་གཉིས་དང་།  ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པ་གཉིས་ཐུན་མོང་གིས་གྲ་སྒྲིག་བྱས་པ་ཞིག་ཡིན་པ་དང་།  མཛད་སྒོར་ནིའུ་ཡོག་གྲོང་ཁྱེར་གྱི་ས་ཁུལ་ལས་འཛིན་ལྷན་ཚོགས་ཀྱི་ཚོགས་མི་འཇུ་ལི་ཡ་ཝུན་ (New York city Council Member Julie Won) ལགས་དང་།  བོད་མིའི་གཞུང་ཁོངས་མ་ཡིན་པའི་ཚོགས་སྐྱིད་ཁག་གི་ཚོགས་གཙོའམ་སྐུ་ཚབ།  ཆོས་ཚོགས་ཁག་གི་བླ་སྤྲུལ་དགེ་བཤེས།  བོད་ཀྱི་ཐེབས་རྩའི་འགན་འཛིན་ལས་ཚབ། མང་ཚོགས་བཅས་ཁྱོན་མི་གྲངས་ ༥༠༠ ཙམ་མཛད་སྒོར་མཉམ་ཞུགས་གནང་། ལྗིམ་མེག་གྷོ་ཝན་མཆོག་གིས།  སྔོན་ལ་ནིའུ་ཡོག་དང་ནིའུ་འཇར་སི་བློ་གསལ་སྐྱེད་ཚལ་གཟའ་མཇུག་སློབ་གྲྭར་གཟིགས་སྐོར་སྐབས།  སློབ་སྤྱིས་ལྗིམ་མཆོག་ལ་སློབ་གྲྭའི་སྐོར་ངོ་སྤྲོད་མདོར་བསྡུས་དང་།  ལྗིམ་གྱིས་སློབ་ཕྲུག་རྣམས་ལ་ཁྱེད་ཚོས་སྣེ་ལེན་གནང་བར་ཐུགས་རྗེ་ཆེ་གསུངས།  དེ་ནས་འཛིན་ཁང་ཁ་ཤས་ནང་ཕེབས་ཏེ་སློབ་ཁྲིད་བྱེད་སྟངས་ལ་གཟིགས་ཞིབ་གྲུབ་རྗེས།  ཚོགས་ཁང་སྒང་ལ་མཛད་སྒོ་དངོས་གཞི་དབུ་འཛུགས་གནང་།  བོད་རིགས་སྤྱི་མཐུན་ཚོགས་པའི་ཚོགས་གཙོས་དགའ་བསུའི་གསུང་བཤད་དང་། ལྷོ་བྱང་ཨ་རིའི་ཕྱོགས་བཞུགས་སྤྱི་འཐུས་གཉིས་ཀྱིས་ཁག་སོ་སོར་ལྗིམ་ངོ་སྤྲོད་དང་།  ཐུགས་རྗེ་ཆེ་ཞུའི་གསུང་བཤད།  བྱང་ཨ་རི་སྐུ་ཚབ་དོན་གཅོད་དང་།  རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པས་ལྗིམ་དང་འབྲེལ་བའི་སྐོར་གསུང་བཤད་གནང་སྟེ།  ཚང་མས་སྐུ་ཞབས་ལྗིམ་མེག་གྷོ་ཝན་མཆོག་གིས་ཨ་རིའི་གྲོས་ཚོགས་ནང་ལོ་མང་པོའི་རིང་བོད་དོན་ལ་རྒྱབ་སྐྱོར་གནང་བ་དྲན་གསོ་དང་འབྲེལ་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་ཁོང་ལ་ཐུགས་རྗེ་ཆེ་ཞུས།  ལྗིམ་མེག་གྷོ་ཝན་མཆོག་གིས་གསུང་བཤད་གནང་སྐབས།  ཁོང་དང་ཨ་རིའི་གྲོས་ཚོགས་ཀྱིས་བདེན་པར་རྒྱབ་སྐྱོར་བྱས་དང་བྱེད་བཞིན་ཡོད།  མ་འོངས་པར་ཡང་མུ་མཐུད་རྒྱབ་སྐྱོར་ཞུ་རྒྱུའི་ཐོག་ཆོད་སེམས་བརྟན་པོ་ཡོད།  ཅེས་གསུངས།  ད་དུང་ཁོང་གིས་བོད་དོན་ཁྲིམས་གཞི་གསར་པའི་གལ་གནད་རང་བཞིན་ངོ་སྤྲོད་དང་འབྲེལ། བོད་མི་གནས་ཡུལ་ཨ་རིའི་ས་གནས་སོ་སོའི་གྲོས་ཚོགས་འཐུས་མི་གནད་འགག་ཆེ་བ་ཁག་ཅིག་གི་མཚན་གསལ་སྟོན་གནང་སྟེ།  ཁོང་རྣམ་པའི་རྒྱབ་སྐྱོར་ཐོབ་ཐབས་ལ་བོད་མི་སོ་སོའི་ངོས་ནས་སྒོ་གང་ས་ནས་འབད་བརྩོན་གནང་དགོས་པའི་འབོད་སྐུལ་ཡང་གནང་།  མཛད་སྒོའི་སྐབས་བློ་གསལ་སྐྱེད་ཚལ་གཟའ་མཇུག་སློབ་གྲྭའི་སློབ་ཕྲུག་ཚོས།  སོ་སོ་རང་ཉིད་ཀྱི་རིག་གཞུང་འཁྲབ་སྟོན་གནང་བར་སྐུ་ཞབས་ལྗིམ་ཐུགས་མཉེས་པོ་བྱུང་།  མཇུག་ཏུ་གྲ་སྒྲིག་ཞུ་མཁན་གྱིས་༧གོང་ས་མཆོག་དང་སྤྱན་རས་གཟིགས་ངོ་བོ་དབྱེར་མེད་ཡིན་པའི་སྐུ་ཐང་ཐོན་གསར་ཞིག་དང་།  དཀར་གཙང་གི་མཇལ་དར་བཅས་སྐུ་ཞབས་ལྗིམ་ལ་དྲན་རྟེན་དུ་ཕུལ་ཏེ།  བོད་མི་ཚང་མའི་ཚབ་ཞུས་ནས་ཐུགས་རྗེ་ཆེ་མཚོན་པ་གནང་བ་བཅས།  །