༄༅། །ཕྱི་ལོ་ ༢༠༢༣ ཟླ་ ༡ ཚེས་ ༧ ཉིན་རྒྱབ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལྡི་ལི་བསམ་ཡས་གླིང་གཞིས་སྒར་དུ་བོད་མིའི་ཚོང་ལས་བདེ་ཚོགས་ཀྱིས་གོ་སྒྲིག་གནང་བའི་བོད་ཀྱི་དུས་སྟོན་དབུ་འབྱེད་མཛད་སྒོའི་སྐུ་མགྲོན་གཙོ་བོར་གདན་ཞུས་ལྟར་ཆེད་ཕེབས་ཀྱིས་གསུང་བཤད་གནང་ཡོད།
དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཐོག་མར་འཚམས་འདྲི་དང་སྦྲགས་གསུང་དོན། ང་ཚོ་བཙན་བྱོལ་དུ་འབྱོར་ནས་བོད་མིའི་སྒྲིག་འཛུགས་ནས་ཚོང་དེ་འདྲ་བརྒྱབ་པ་རེད། བྷི་ཧར་ནང་ལྕགས་ཀྱི་བཟོ་གྲྭ་བཙུགས་པ་རེད་དེ་ཁུངས་འཁྱོལ་མེད། དེ་བཞིན་བྷོ་པཱལ་ནང་ཤོག་བུའི་བཟོ་གྲྭ་བཙུགས་པ་དེ་ཕྱིས་སུ་སྒོ་བརྒྱབ་དགོས་བྱུང་བ་རེད། བོད་ནས་མ་རྩ་ཁུར་བ་མང་པོ་ཞིག་སྐབས་དེ་དུས་ནས་འཕྲོ་བརླག་ཕྱིན་ཟིན་པ་རེད། དེ་ནས་རིམ་བཞིན་༸གོང་ས་མཆོག་གི་ཡིད་ཆེས་དགེ་རྩའི་ཚོགས་པ་དཔལ་འབྱོར་ལས་ཁུངས་ཁོངས་སུ་དེབ་སྐྱེལ་གནང་སྟེ་སྤུ་མདོག་དང་གདན་གྱི་ཚོང་འགོ་འཛུགས་ཏེ་གནས་སྟངས་གང་ཙམ་བཟང་པོ་བྱུང་བ་རེད། གཞིས་ཆགས་ཁག་སོ་སོའི་ནང་རུམ་འཐག་སོགས་ལག་ཤེས་ཀྱི་རིགས་ཁག་གཅིག་དང་། ལྷག་པར་བལ་ཡུལ་ནང་གདན་གྱི་ཚོང་ཤུགས་ཆེན་བརྒྱབ་ཐུབ་པ་ལ་བརྟེན་ནས་བོད་མིའི་སྒྲིག་འཛུགས་ཀྱི་དཔལ་འབྱོར་ལས་ཁུངས་སུ་སྐབས་དེར་ཁེ་ཕན་གྱི་བརྒྱ་ཆ་གཅིག་འབུལ་གནང་གི་ཡོད་སྟབས་ཕན་ཐོགས་བྱུང་ཡོད།
སྤྱིར་གཞུང་དང་སྒྲིག་འཛུགས་ཤིག་གི་ངོ་བོ་ཐོག་ནས་ཚོང་རྒྱག་རྒྱུ་ཁག་པོ་ཡོད་པ་རེད། མི་སྒེར་སོ་སོས་ཚོང་བརྒྱབ་པ་ནང་བཞིན་སྤྱི་པའི་ལས་དོན་ལ་སེམས་ཁུར་དང་སྤྱི་པར་ཕན་ཐོགས་རྒྱུའི་ཆོད་སེམས་བརྟན་པོ་ཞིག་མེད་པ་ཡིན་ན། ལྷོད་གཡེང་ཕྱིན་ཏེ་རང་བཞིན་གྱིས་གྱོང་གུན་ནང་འགྲོ་དགོས་པའི་གནས་སྟངས་ཤིག་ཡོང་བཞིན་ཡོད། དེར་བརྟེན། བལ་ཡུལ་ནང་མི་སྒེར་མང་པོ་ཞིག་ཕྱུག་པོ་ཆགས་ཡོད་ཀྱང་སྤྱི་པའི་སྡེ་ཁག་དེ་ཚོ་རིམ་བཞིན་ཉམས་རྒུད་ཕྱིན་པར་བརྟེན་སློབ་དཔོན་ཟམ་གདོང་རིན་པོ་ཆེ་མཆོག་མི་མང་གིས་ཐད་ཀར་འོས་འདེམས་ཀྱིས་བཀའ་བློན་ཁྲི་པར་ཕེབས་པའི་སྐབས་སུ་མི་མང་གིས་དངུལ་བཅོལ་བ་མང་དག་ཅིག་དཔལ་འབྱོར་ལས་ཁུངས་སུ་ཉར་ཡོད་པ་དང་། དཔལ་འབྱོར་ལས་ཁུངས་ནས་མ་རྩ་དེ་དག་རྩིས་སྐོར་ཡོང་དུས་ས་ཆ་དང་ཚོང་ལས་ནང་ཇི་ཙམ་ཡོད་མེད་ཀྱི་གནས་སྟངས་སྙན་ཐོ་གྲོས་ཚོགས་སུ་བཏོན་གནང་སྟེ་བོད་མིའི་སྒྲིག་འཛུགས་ནས་ཚོང་ལས་གནང་མི་དགོས་པའི་ཐག་གཅོད་ཅིག་སྐབས་དེ་དུས་ནས་ཡོང་བཞིན་ཡོད།
ཚོང་གི་ངོ་བོ་དང་། ལས་ཀ། ཚོང་གི་ཐག་གཅོད་ཀྱི་བརྒྱུད་རིམ། ཚོང་གི་ཐག་གཅོད་ཀྱི་སྒྲོམ་གཞི་བཅས་གསལ་པོ་མེད་ན་ཚོང་ལས་ཚགས་ཆུད་ཡོང་རྒྱུ་ཁག་པོ་རེད། གཞུང་དང་སྒྲིག་འཛུགས་ངོས་ནས་ཚོང་རྒྱག་པའི་སྐབས་ག་དུས་ཡིན་ནའང་དཀའ་ངལ་ཡོད་པ་ཞིག་དང་། མི་སྒེར་སོ་སོས་ཚོང་ལས་གཉེར་བཞིན་པ་དེ་དག་ཡག་ཐག་གཅོད་ལྟ་བུ་ཆགས་འདུག མི་སྒེར་སོ་སོའི་ནང་དཔལ་འབྱོར་གྱི་ནུས་པ་སྟོན་ཐུབ་མཁན་རིགས་ཡོད་ན་ནུས་པ་སྟོན་རྒྱུའི་དུས་ཚོད་སླེབ་པ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་པའི་སྤྱི་ཚོགས་ནང་སྒོར་ས་ཡའི་བདག་པོ་དེ་འདྲ་དགོས་ཀྱི་རེད་ཅེས་བཀའ་གནང་བ་དེ་འདྲ་བྱུང་ཡོད། དཔལ་འབྱོར་མེད་ན་ལས་ཀ་བྱེད་ཐུབ་རྒྱུ་ཁག་པོ་རེད། རྒྱ་གར་གཞུང་དང་གནས་ཡུལ་རྒྱལ་ཁབ་སོ་སོའི་གཞུང་གི་བཀའ་དྲིན་ལ་བརྟེན་ནས་ད་ལྟ་བར་དུ་ང་ཚོ་ལའང་གོ་སྐབས་མི་ཉུང་བ་ཞིག་འཐོབ་བཞིན་ཡོད་པ་དང་། གོ་སྐབས་འདི་བརྒྱུད་བོད་པས་དཀའ་ལས་རྒྱག་སྟངས་དང་རིག་པའི་རྩལ་སྟོན་སྟངས་སོགས་གང་ཅིའི་ཐད་བོད་མི་རྣམས་བཙན་བྱོལ་བ་འདྲ་འདྲའི་ནང་ནས་མི་འདྲ་བ་ཞིག་ཆགས་ཡོད། ཅེས་སོགས་ཀྱི་གསུང་བཤད་གནང་།
མཛད་སྒོའི་ཐོག་རྒྱ་གར་རྒྱལ་ཡོངས་གྲངས་ཉུང་མི་རིགས་ལྷན་ཚོགས་ཀྱི་ཚོགས་མི་ལྕམ་སྐུ་རིན་ཆེན་ལྷ་མོ་ལགས་དང་། བོད་ཀྱི་དཔེ་མཛོད་ཁང་གི་ངེས་སྟོན་པ་དགེ་བཤེས་ལྷག་རྡོར་ལགས། ལྡི་ལི་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་དོན་གྲུབ་རྒྱལ་པོ་ལགས། ལྡི་ལི་ས་གནས་འགོ་འཛིན་རྡོ་རྗེ་ཚེ་རིང་ལགས། ཚོང་ལས་བདེ་ཚོགས་ཀྱི་ཚོགས་གཙོ་བཀྲ་ཤིས་དབང་འདུས་ལགས་སོགས་ཕེབས་གནང་ཡོད། །
