༄༅། །ཕྱི་ལོ་ ༢༠༢༣ ཟླ་བ་ ༠༡ ཚེས་ ༡༠ ཉིན་ཕྱི་དྲིལ་ཀམ་པུ་ཊར་སྡེ་ཚན་དང་དཔལ་འབྱོར་ལས་ཁུངས་ཁྱབ་ཁོངས་སྤྱི་ཚོགས་ཡར་རྒྱས་ཐེབས་རྩ་ཟུང་སྦྲེལ་གྱིས་གོ་སྒྲིག་ཞུས་པའི་བོད་མིའི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་ཐེངས་དང་པོ་ལེགས་པར་མཇུག་སྒྲིལ་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༤ པ་ཙམ་ལ་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་གི་ཐུ་མི་ཚོགས་ཁང་དུ་བོད་མི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུའི་མཇུག་སྡོམ་མཛད་སྒོ་ཚོགས་ཡོད་པ་ལྟར། མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག་ཕྱི་དྲིལ་ཀམ་པུ་ཊར་སྡེ་ཚན་གྱི་འགན་འཛིན་བསྟན་འཛིན་ཚུལ་ཁྲིམས་ལགས་དང་། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས། དེ་བཞིན་ཚོགས་བཅར་བ་བཅས་ཚང་འཛོམས་གནང་ཡོད་ཅིང་། སྐབས་དེར་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་མ་འོངས་པར་བཙན་བྱོལ་བོད་མིའི་སྲིད་སྤྱིའི་འོས་བསྡུ་དྲ་ཐོག་མཉེན་ཆས་ལ་བརྟེན་ནས་འོས་འཕེན་ཐུབ་རྒྱུའི་ཐབས་འཚོལ་གནང་དགོས་པ་དང་། ད་ལྟའི་བཙན་བྱོལ་བོད་མིའི་གྲངས་ཐོ་ཚད་ལྡན་ཞིག་མེད་པའི་དཀའ་ངལ་ཡོད་པ་དེ་མ་འོངས་པར་མཉེན་ཆས་ལ་བརྟེན་ནས་གཅིག་མཚུངས་བཟོ་ཐབས་གནང་རྒྱུའི་ཐུགས་འཆར་ཡོད་སྐོར་ངོ་སྤྲོད་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་དང་བླངས་དཔྱ་དངུལ་འབུལ་བབ་ལ་སྤར་ཆ་དགོས་མིན་ཐད་དང་འབྲེལ་ཏེ་གསུང་དོན། དང་བླངས་དཔྱ་དངུལ་མང་དུ་གཏང་དགོས་དང་མི་དགོས་ཐད་ད་ལྟ་རྒྱ་བལ་འབྲུག་གསུམ་ནང་མང་ཆེ་བས་ཕུལ་གྱི་ཡོད། མི་སོ་སོས་དང་བླངས་དཔྱ་དངུལ་ཕུལ་བ་གཅིག་པུས་ཞེ་དྲག་སླེབས་ཀྱི་མེད། ལོ་གཅིག་ལ་སྒོར་མོ་ལྔ་བཅུ་ང་བརྒྱད་རེད། ཟླ་བ་རེ་ལ་སྒོར་བཞི་རེད། དེ་ད་ལྟ་སྤར་དགོས་འདུག་ཅེས་སྤྱི་འཐུས་འགའ་ཤས་ཀྱིས་གྲོས་ཚོགས་ནང་གསུངས་པར་བརྟེན་ང་ཚོས་མི་མང་ལ་སྤར་ན་ག་ཚོད་སྤར་དགོས་མིན་སྐད་ཆ་དྲིས་པ་རེད། སྒོར་མང་ཤོས་ག་ཚོད་སླེབས་ཀྱི་ཡོད་ན། དེ་དང་འབྲེལ་ཏེ་ཕྱི་ཟླ་གསུམ་པའི་གྲོས་ཚོགས་ནང་སྒྲིག་གཞི་བསྐྱར་བཅོས་འཁྱེར་རྒྱུ་ཡིན། གལ་ཏེ་གྲོས་ཚོགས་ཀྱིས་སྤར་བ་ཡིན་ན་དེ་ལྟར་སྤར་རྒྱུ་རེད། ཕྱི་རྒྱལ་ཁག་ཏུ་བོད་མི་བརྒྱ་ཆ་ལྔ་བཅུས་མ་སྤར་རོགས་ཞེས་གསུངས་པ་ལྟར་དེ་ལ་སྤར་ཆ་ཁྱེར་རྒྱུ་མིན། དེ་དང་མཉམ་དུ་ད་ལྟ་ཁྱེད་ཚོའི་ཚོགས་ཆུང་ནང་གོ་བསྡུར་བྱུང་བ་དེ་བཀའ་ཤག་ནང་བཀའ་བསྡུར་གནང་རྒྱུ་ལྷག་བསྡད་ཡོད། མ་འོངས་པར་མི་མང་བས་དཔྱ་དངུལ་སྤྲོད་ཐབས་ཇི་ལྟར་བྱ་དགོས་རྒྱུའི་ཐད་བསམ་བློ་གཏོང་དགོས། སྒྲིག་གཞི་ནང་གསལ་ལྟར་ན་བོད་མི་ཞིག་ཡིན་ཕྱིན་ཆད་དང་བླངས་དཔྱ་དངུལ་སྤྲོད་དགོས་ཞེས་གསལ་ཡོད་ཞེས་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་མ་འོངས་པར་འཕྲུལ་རིག་ལ་བརྟེན་ནས་གྲོས་ཚོགས་འཚོག་ཐུབ་མིན་ཐད་ལའང་བསམ་བློ་གཏང་དགོས་པ་དང་། དེ་དང་འབྲེལ་ཏེ་འཕྲུལ་ལས་ཆེད་ལས་པ་རྣམས་ནས་མཉམ་ལས་སམ་སྒེར་ཐོག་ནས་ཞབས་འདེགས་གང་ཞུ་ཐུབ་མིན་ལ་བསམ་བློ་གཏོང་དགོས་པའི་འབོད་སྐུལ་ཞུས་པ་དང་སྦྲགས། ད་ལྟའི་དུས་སུ་བོད་མིའི་སྒྲིག་འཛུགས་ལ་དྲ་རྒྱའི་སྲིད་བྱུས་ཤིག་དགོས་སྐོར་དང་། འཕྲུལ་ལས་ཆེད་ལས་པ་རྣམས་ནས་བོད་མིའི་སྒྲིག་འཛུགས་ལ་སྨན་པའི་འཕྲུལ་རིག་དང་འབྲེལ་བའི་འཆར་གཞི་རིགས་འཆར་འབུལ་ཞུས་ན་དེ་འབྲེལ་བཀའ་ཤག་གིས་བཀའ་བསྡུར་ཐག་གཅོད་ཀྱིས་འོས་འཚམས་རིགས་ལ་སྔོན་རྩིས་བཟོས་ཏེ་མཉམ་ལས་བྱ་ཐུབ་ཚུལ་སྐོར་འགྲེལ་བརྗོད་གནང་ཡོད་པ་རེད།
སྤྱིར་ཉིན་གྲངས་གཉིས་རིང་གི་བོད་མི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུའི་དམིགས་ཡུལ་གཙོ་བོ་ནི། ད་ལྟའི་བཙན་བྱོལ་ནང་གི་བོད་མི་བརྡ་འཕྲིན་འཕྲུལ་ལས་ཆེད་ལས་པའི་གནས་སྟངས་རྒྱུས་ལོན་བྱ་རྒྱུ་དང་། བོད་མི་འཕྲུལ་ལས་ཆེད་ལས་པ་ནང་ཁུལ་འབྲེལ་ལམ་འཛུགས་རྒྱུ། དེ་བཞིན་བརྡ་འཕྲིན་འཕྲུལ་རིག་ལ་བརྟེན་པའི་བོད་མིའི་སྤྱི་ཚོགས་ཤིག་སྐྲུན་ཐབས་སུ་མ་འོངས་པར་བོད་མི་འཕྲུལ་ལས་ཆེད་ལས་པ་དང་བོད་མིའི་སྒྲིག་འཛུགས་མཉམ་ལས་གནང་ཕྱོགས་ཇི་དགེའི་སྐོར་ཤེས་རྟོགས་ཡོང་ཐབས་ཡིན། བོད་མི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་དང་པོའི་ནང་དང་བླངས་དཔྱ་དངུལ་བསྡུ་ཐབས་བདེ་སླད་མཉེན་ཆས་གསར་སྐྲུན་གནང་ཕྱོགས་དང་། བོད་མིའི་སྒྲིག་འཛུགས་ཀྱི་གློག་འཕྲུལ་ཡིག་ཚགས། དྲ་རྒྱའི་བདེ་འཇགས། བོད་མིའི་སྒྲིག་འཛུགས་ཀྱི་སྔོན་རྩིས་འབུལ་ཕྱོགས་འཕྲུལ་རིག་གྲངས་མཛོད་ཀྱི་ངོ་བོར་སྒྱུར་ཐབས། ཕྱོགས་གསུམ་ཅན་གྱི་འགུལ་གཟུགས་བཟོ་སྐྲུན་སོགས་ཀྱི་སྐོར་བགྲོ་གླེང་ལྷུག་པོ་གནང་ཡོད་པ་བཅས།།
