༄༅། །འདི་གར་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཕྱི་ལོ་ ༢༠༢༣ ཟླ་བ་ ༠༡ ཚེས་ ༢༥ དང་ ༢༦ བཅས་ཉིན་གྲངས་གཉིས་རིང་རྒྱ་གར་བྱང་ཤར་ར་སྦང་ལ་ཀུན་ཕན་གླིང་བོད་མིའི་གཞིས་ཆགས་སུ་གཞུང་འབྲེལ་འཚམས་གཟིགས་ལེགས་གྲུབ་བྱུང་ཡོད་པ་དང་། སྐབས་དེར་ནང་སྲིད་འཛིན་གཞིས་ཚན་པའི་རྒྱ་གར་བྱང་ཤར་བོད་མིའི་གཞིས་སྒར་ཁག་གི་འབྲེལ་མཐུད་པ་དྲུང་ལས་བསྟན་འཛིན་མཆོག་ལྡན་ལགས་ཀྱང་ལྷན་བཅར་ཞུས་ཡོད།དེ་ཡང་ཕྱི་ལོ་ ༢༠༢༣ ཟླ་བ་ ༠༡ ཚེས་ ༢༥ ཉིན་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ར་སྦང་ལ་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་འགོ་འཛིན་རྡོ་རྗེ་ཚེ་རིང་ལགས་ཀྱིས་གཙོས་ས་འཐུས་ཚོགས་གཙོ་དང་། ས་གནས་རང་བདེན་ཚོགས་ཆུང་གི་ཚོགས་གཙོ། དགོན་པའི་སྐུ་ཚབ། ས་གནས་མཉམ་དྲུང་། ས་གནས་གཞོན་ནུ་དང་བུད་མེད་ཀྱི་སྐུ་ཚབ། དེ་བཞིན་ས་གནས་འགོ་འཛིན་ལས་ཁུངས་ཀྱི་ལས་བྱེད་དང་གནད་ཡོད་མི་སྣ་ཁག་གཅིག་ནས་ཕེབས་བསུའི་སྣེ་ལེན་ཞུས་ཡོད།ཕྱི་ཚེས་ ༢༦ ཉིན་གྱི་སྔ་དྲོ་ནང་སྲིང་དྲུང་ཆེ་དཔལ་ལྡན་དོན་གྲུབ་ལགས་ཀྱིས་གཞིས་དགོན་ཐུབ་བསྟན་དར་རྒྱས་གླིང་ཉམས་གསོ་དང་། གཞིས་གྲོང་གསུམ་པ་དང་། བཞི་པ། བདུན་པ་བཅས་ཀྱི་སྤྱི་ཁང་གསར་རྒྱག་དང་ཉམས་གསོ་གཙོས་པའི་ལས་གཞི་གསར་པ་་མཇུག་སྒྲིལ་ལེགས་གྲུབ་ཟིན་པ་ཁག་དབུ་འབྱེད་གནང་ཡོད།དེ་ནས་ཉིན་རྒྱབ་མང་ཚོགས་ལྷན་ཚོགས་འདུ་དང་། ལྷག་པར་བོད་མི་ཚོས་ས་ཆ་བདག་སྐྱོང་གང་ལེགས་གནང་དགོས་པའི་ལམ་སྟོན་གནང་རྗེས་དྲུང་ལས་བསྟན་འཛིན་མཆོག་ལྡན་ལགས་ཀྱིས་བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་བསྐྱར་བཅོས་ཕྱིན་ཡོད་པ་དེ་འགྲེལ་བརྗོད་གནང་ཡོད།