༄༅། །ཕྱི་ལོ་ ༢༠༢༣ ཟླ་བ་ ༠༡ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་གྲངས་འཛིན་དཔེ་མཛོད་ལས་འཆར་གྱི་སྔོན་འགྲོའི་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩: ༣༠ ཐོག་ཆོས་རིག་ལས་ཁུངས་ཀྱི་ཚོགས་ཁང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དབུ་བཞུགས་ཐོག ཆོས་རིག་དྲུང་ཆེ་འཆི་མེད་ཚེ་དབྱངས་ལགས་དང་། ཆོས་རིག་དྲུང་འཕར་བདུད་འདུལ་རྡོ་རྗེ་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། འགྲོ་ཕན་སྨན་རྩིས་ཁང་གི་འགན་འཛིན་ཐུབ་བསྟན་ཚེ་རིང་ལགས། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས་གཙོས་ལས་གཞི་དང་འབྲེལ་བའི་བཞུགས་སྒར་རྡ་ས་ཁུལ་གྱི་དཔེ་མཛོད་དང་ཚོགས་སྡེ་ཁག་གི་འགན་འཛིན་དང་སྐུ་ཚབ་མཉམ་ཞུགས་ཀྱིས་བོད་ཀྱི་གནའ་བོའི་ཡིག་ཚགས་རྣམས་གྲངས་འཛིན་དཔེ་མཛོད་ཀྱི་རྣམ་པར་སྐྲུན་འཆར་སྐོར་གྱི་སྔོན་འགྲོའི་ཚོགས་འདུ་ཞིག་བསྐོང་ཚོགས་གནང་ཡོད་པ་རེད།
ཚོགས་འདུའི་ཐོག་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་བོད་ཀྱི་རིན་ཐང་བྲལ་བའི་གནའ་བོའི་ཡིག་ཆ་རྣམས་དུས་ཀྱི་འགྱུར་འགྲོས་དང་བསྟུན་ཏེ་འཇིག་རྟེན་མ་སྟོང་བར་དུ་ཉར་ཚགས་ཐུབ་ཆེད་གྲངས་འཛིན་དཔེ་མཛོད་གལ་གནད་ཆེན་པོ་ཆགས་ཚུལ་དང་། རིང་མིན་རྒྱ་བལ་འབྲུག་གསུམ་ནང་ཡོད་པའི་དཔེ་མཛོད་ཆེ་ཁག་དང་མཉམ་རུབ་ཞུས་ཏེ་ཡིག་ཚགས་གྲངས་མཛོད་ནང་བླུག་རྒྱུའི་ལས་འཆར་དང་། དེ་ལས་འཕྲོས་ཏེ་ད་བར་ཡིག་ཆ་ཇི་ཙམ་གྲངས་མཛོད་ནང་བླུགས་ཡོད་མེད་རྟོགས་ཞིབ་ཀྱིས་ལས་དོན་ཉིས་བརྩེགས་མ་འགྱུར་བ་བྱ་དགོས་པའི་སྐོར་ལམ་སྟོན་གནང་བ་མ་ཟད། དེ་བཞིན་མ་འོངས་པར་རྒྱ་བལ་འབྲུག་གསུམ་ནང་ཡོད་པའི་དཔེ་མཛོད་ཆེ་ཁག་དང་ལྷན་འཛོམས་ཀྱིས་ཚོགས་འདུ་རྒྱས་པ་ཞིག་བསྐོང་ཚོགས་གནང་སྟེ་དེ་འབྲེལ་ལས་དོན་གནང་ཕྱོགས་ཇི་དགེའི་ཐད་བགྲོ་གླེང་གནང་འཆར་ཡོད་པ་འགྲེལ་བརྗོད་གནང་ཡོད་པ་རེད།
སྤྱིར་ཐེངས་འདིའི་གྲངས་འཛིན་དཔེ་མཛོད་ལས་འཆར་གྱི་ཚོགས་འདུ་དེ་བཞིན་སྔོན་འགྲོའི་རྣམ་པར་བཞུགས་སྒར་ཉེ་ཁུལ་གྱི་འབྲེལ་ཡོད་ཚོགས་སྡེ་ཁག་གི་འགན་འཛིན་དང་སྐུ་ཚབ་རྣམ་པ་ལྷན་འཛོམས་ཀྱིས་ཚོགས་ཡོད་པ་དང་། མ་འོངས་པར་རྒྱ་བལ་འབྲུག་གསུམ་ནང་གི་དཔེ་མཛོད་ཆེ་གྲས་དང་ལྷན་དུ་ཚོགས་འདུ་རྒྱས་འཛོམས་ཤིག་བསྐོང་ཚོགས་གནང་སྟེ་གྲངས་འཛིན་དཔེ་མཛོད་ཀྱི་ལས་འཆར་སྐོར་བགྲོ་གླེང་ཞིབ་རྒྱས་གནང་རྒྱུ་རེད་འདུག་པ་བཅས།།
