༄༅། །ཕྱི་ལོ་ ༢༠༢༣ ཟླ་ ༡ ཚེས་ ༢༨ ནས་ ༢༩ བར་གོ་ཝཱ་གཙུག་ལག་སློབ་གཉེར་ཁང་གི་སྤྱི་ཚོགས་རིག་པའི་སྡེ་ཚན་གྱི་སློབ་དཔོན་ཇོ་ན་ (Joana Coelho) ལགས་ཀྱིས་སྣེ་ཁྲིད་དེ་སློབ་ཕྲུག་རྣམས་སྦེལ་ཀོབ་བོད་མིའི་གཞིས་ཆགས་སུ་གཟིགས་སྐོར་གནང་ཡོད་པ་དང་། སྐབས་དེར་ཁོང་རྣམ་པ་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་དང་། བྱེས་ཀྱི་གདན་ས་བཀྲ་ཤིས་ལྷུན་པོའི་དགོན་པ། རྒན་གསོ་ཁང་། སཾ་བྷོ་ཊ་སློབ་གྲྭ བོད་ཁྱིམ་སློབ་གྲྭ སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་སོགས་ལ་གཟིགས་སྐོར་གནང་ཡོད།

དེ་ཡང་གོ་ཝཱ་གཙུག་ལག་སློབ་གཉེར་ཁང་གི་སྤྱི་ཚོགས་རིག་པའི་སྡེ་ཚན་གྱི་སློབ་དཔོན་དང་སློབ་ཕྲུག་རྣམས་སྦེལ་ཀོབ་བོད་མིའི་གཞིས་ཆགས་སུ་ཕེབས་འབྱོར་སྐབས་ལུགས་ཟུང་བསམ་གྲུབ་གླིང་དང་བདེ་སྐྱིད་སླར་གསོ་ས་གནས་འགོ་འཛིན་ལས་ཁུངས་ཀྱི་རྩིས་པ་ནས་ཕེབས་བསུའི་སྣེ་ལེན་ཞུས་ཡོད།སེ་ར་བྱེས་ཀྱི་མཁན་པོ་དགེ་བཤེས་བཀྲ་ཤིས་ཚེ་རིང་ལགས་ཀྱིས་སློབ་ཕྲུག་རྣམས་ལ་སེ་ར་བྱེས་ཀྱི་དགེ་འདུན་པའི་སློབ་གཉེར་གནང་ཕྱོགས་སྐོར་ངོ་སྤྲོད་གནང་ཡོད། བྱེས་ཀྱི་གདན་ས་བཀྲ་ཤིས་ལྷུན་པོ་དགོན་པའི་སྤྱི་ཁྱབ་འགན་འཛིན་དཀྱིལ་ཁང་རིན་པོ་ཆེ་མཆོག་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གི་སྐོར་གྱི་དཔེ་དེབ་རྐུ་ལ་ཤོར་བའི་བོད་ཀྱི་བྱིས་པ་དྲན་རྟེན་དུ་གནང་ཡོད། འབྲེལ་ཡོད་ཚན་པ་སོ་སོ་ནས་གོ་ཝཱ་གཙུག་ལག་སློབ་གཉེར་ཁང་གི་སྤྱི་ཚོགས་རིག་པའི་སྡེ་ཚན་གྱི་སློབ་དཔོན་དང་སློབ་ཕྲུག་རྣམས་ལ་རྒྱ་ནག་དམར་ཤོག་གཞུང་གིས་བོད་ལ་དབང་བསྒྱུར་བྱས་ཏེ་བོད་ནང་གི་དགོན་སྡེ་ཁག་གཏོར་བཤིག་བཏང་བ་དང་། ཕྱིས་སུ་བཙན་བྱོལ་བོད་མི་རྣམས་ཀྱིས་རྒྱ་གར་དུ་བོད་བརྒྱུད་ནང་བསྟན་སླར་གསོ་ཇི་ལྟར་གནང་བའི་སྐོར་འགྲེལ་བརྗོད་གནང་ཡོད་པ་མ་ཟད། བཙན་བྱོལ་བོད་མིའི་གཞིས་ཆགས་ཁག་དང་ད་ལྟའི་བོད་ནང་གི་གནས་སྟངས་སོགས་ཀྱི་སྐོར་འགྲེལ་བརྗོད་གནང་ཡོད་པ་བཅས།།