༄༅། །ཨོསྟྲི་ལི་ཡཱ་སྐུ་ཚབ་དོན་གཅོད་ཀརྨ་སེངྒེ་ལགས་དང་ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་གཉིས་ཁུ་ཧིན་ལེན་ (Queensland) ས་གནས་སུ་གཞུང་འབྲེལ་ཕྱོགས་ཕེབས་དང་བསྟུན་ཨོསྟྲི་ལི་ཡཱ་གྲོས་ཚོགས་གོང་མའི་འཐུས་མི་མེག་ཅན་ཊན་ལར་ (Max Chandanler Mather) ལགས་དང་། གྲོང་སྡེ་ལྷན་ཚོགས་ཀྱི་ཚོགས་མི་ཇ་ན་ཐན་ (Janathan Sri) ལགས་གཉིས་ལ་འཚམས་འདྲིའི་མཇལ་འཕྲད་གནང་ཡོད། སྐབས་དེར་བོད་མིའི་སྐུ་ཚབ་རྣམས་ནས་བོད་ནང་རྒྱ་ནག་གཞུང་གི་དྲག་གནོན་ཆེ་བའི་སྲིད་བྱུས་འོག་བོད་མིའི་ཆོས་དང་རིག་གཞུང་ངོ་བོ་དང་བཅས་པ་རྩ་གཏོར་གཏོང་རྒྱུའི་འཆར་གཞི་གདིང་བཞིན་པའི་སྐོར་དང་། ཉེ་ལམ་ཀེན་བྷེ་ར་རུ་ཨོསྟྲི་ལི་ཡཱའི་གྲོས་ཚོགས་འཐུས་མི་རྣམས་དང་མཇལ་འཕྲད་ཀྱིས་བོད་དོན་ཞུ་གཏུག་གི་ལས་འགུལ་སྤེལ་བའི་སྐོར་བཅས་ཞུས་ཡོད།

གྲོས་ཚོགས་གོང་མའི་འཐུས་མི་མེག་ཅན་ཊན་ལར་ལགས་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་བརྩི་ཆེན་པོ་ཞུ་མཁན་ཞིག་ཡིན་པ་མ་ཟད། བོད་དོན་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཀྱང་ཡིན།  ཕྱི་ལོ་ ༢༠༡༢ ལོར་ཁོང་ཐེ་བའི་ཨོསྟྲི་ལི་ཡཱའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་རམ་ས་ལར་ཕེབས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཡོད།དེ་རྗེས་སྐུ་ཚབ་དོན་གཅོད་ཀརྨ་སེངྒེ་ལགས་དང་ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་གཉིས་ནས་བི་རིས་བ་ནེ་ (Brisbane) གྲོང་སྡེའི་ལྷན་ཚོགས་ཀྱི་ཚོགས་མི་ཝི་ཀི་ཧོ་ཝཊ་ (Vicki Howard) ལགས་དང་མཇལ་འཕྲད་གནང་སྟེ་གྲོང་སྡེའི་ནང་ཡོད་པའི་བོད་མི་རྣམས་ལ་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་སླད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་ཡོད།དེ་སྔོན་སྐུ་ཚབ་རྣམ་གཉིས་ནས་སྤྱན་རས་གཟིགས་ཆོས་ཚོགས་སུ་ཆེད་ཕེབས་ཀྱིས་ཆོས་ཚོགས་ཀྱི་ཚོགས་གཙོ་ཀོ་ལིན་ (Colin Crosbie) ལགས་དང་འགན་འཛིན་རུ་བྷི་ (Ruby Karmey) ལགས། དགེ་བཤེས་ཚུལ་ཁྲིམས་ལགས་བཅས་ནས་ཕེབས་བསུའི་སྣེ་ལེན་དང་ཆོས་ཚོགས་སྐོར་ངོ་སྤྲོད་གནང་། དེ་ནས་ཁོང་རྣམས་ཀྱིས་བཀྲ་ཤིས་ཁང་དམར་བསམ་གྲུབ་གླིང་དུ་མཁན་ཟུར་དགེ་བཤེས་བཀྲ་ཤིས་ཚེ་རིང་ལགས་དང་མཇལ་འཕྲད་གནང་སྟེ་རྗེས་ལོའི་ཕྱི་ཟླ་གསུམ་པའི་ནང་འཚོག་འཆར་ཡོད་པའི་ཨོསྟྲི་ལི་ཡཱ་དང་ནིའུ་ཛི་ལེནྡ་ཁུལ་གྱི་ནང་པའི་ཆོས་ཚོོགས་ཁག་གི་ཚོགས་ཆེན་སྐོར་སྙན་སེང་ཞུས། མཁན་ཟུར་བཀྲ་ཤིས་ཚེ་རིང་ལགས་ཀྱི་ནང་ཆོས་དང་ཤེས་ཡོན་ཐད་ཀྱི་མཛད་པ་ལ་ངོས་འཛིན་ཆེད་ཕྱི་ལོ་ ༢༠༢༠ ལོར་ཨོསྟྲི་ལི་ཡཱའི་སྙན་གྲགས་ཆེ་བའི་གཟེངས་བསྟོད་ཨོསྟྲི་ལི་ཡཱན་མེ་ཊལ་ (Order of Australian Medal) ཞེས་པ་གནང་ཡོད།གཞན་ཡང་སྐབས་དེར་སྐུ་ཚབས་དོན་གཅོད་ཀརྨ་སེངྒེ་ལགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༣ འཁོར་བའི་དུས་ཆེན་མཛད་སྒོར་མཉམ་ཞུགས་གནང་སྟེ་བཀའ་ཤག་གི་གསུང་འཕྲིན་སྒྲོགས་སྦྱང་གནང་བ་སྦྲགས། བོད་མིའི་ཆིག་སྒྲིལ་གྱི་གལ་གནད་དང་བོད་ཀྱི་སྐད་ཡིག་སློབ་སྦྱོང་བྱ་རྒྱུར་དོ་སྣང་གནང་དགོས་སྐོར་གསུང་བཤད་གནང་ཡོད་པ་བཅས།།