༄༅། །ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་བོད་མི་མང་སྤྱི་འཐུས་བསྟན་པ་ཡར་འཕེལ་ལགས་ཀྱིས་སྣེ་ཁྲིད་འོག་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་། སྤྱི་འཐུས་དབང་འདུས་རྡོ་རྗེ་ལགས་བཅས་ལས་གྲུབ་པའི་སྤྱི་འཐུས་སྐུ་ཚབ་ཚོགས་ཆུང་དང་ལྷན་དུ་ལི་ཐུ་ནི་ཡཱའི་གྲོས་ཚོགས་ཀྱི་ཚོགས་གཙོ་གཞོན་པས་དབུས་པའི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་ཀྱིས་བོད་དོན་ཞུ་གཏུག་གི་ལས་འགུལ་ལེགས་པར་སྤེལ་གྲུབ་རྗེས་ཕྱི་ལོ་ ༢༠༢༢ ཟླ་བ་ ༡༡ ཚེས་ ༢༣ ནས་ ༢༤ བར་ཉིན་གྲངས་གཉིས་རིང་ལཱཏ་ཝི་ཡཱ་ནང་ཆེད་ཕེབས་ཀྱིས་ལཱཏ་ཝི་ཡཱའི་ཕྱི་སྲིད་ལས་ཁུངས་ཀྱི་འབྲེལ་ཡོད་ལས་བྱེད་ཁག་གཅིག་དང་མཇལ་འཕྲད་གནང་སྟེ་ད་ལྟའི་བོད་ནང་གི་ཛ་དྲག་གི་གནས་སྟངས་སྐོར་འགྲེལ་བརྗོད་གནང་ཡོད་པ་མ་ཟད། ལཱཏ་ཝི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་དང་ལཱཏ་ཝི་ཡཱའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཞོན་ཇུ་རི་སི་ཝི་ལུམ་སི་ (Juris Vilums) མཆོག་དང་མཇལ་འཕྲད་ཀྱིས་འཆར་ལོའི་ནང་ལཱཏ་ཝི་ཡཱ་དང་། ལི་ཐུ་ནི་ཡཱ། ཨེསྚོ་ནི་ཡཱ་བཅས་ཀྱི་གྲོས་ཚོགས་འཐུས་མི་ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་སར་ཕེབས་འཆར་ཡོད་པའི་སྐོར་གོ་བསྡུར་ཞུས་གནང་ཡོད།གཞན་ཡང་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ལཱཏ་ཝི་ཡཱའི་རྒྱལ་ས་རི་གཱ་ནང་རྟེན་གཞི་བྱས་པའི་ཨ་རིའི་གཞུང་ཚབ་ཁང་གི་འབྲེལ་ཡོད་ལས་བྱེད་སྐུ་ཞབས་ཨན་ཌི་རེའོ་ (Andrew Byrley) ལགས་དང་ཐུག་འཕྲད་ཀྱིས་བོད་དོན་སྐོར་གླེང་མོལ་ཞུས་གནང་ཡོད་ལ། དེ་བཞིན་ལཱཏ་ཝི་ཡཱའི་གསར་འགྱུར་ལས་ཁང་ཆེ་ཤོས་ (TV Net and Delfi) གཉིས་ཀྱི་བཅར་འདྲི་ལ་དང་ལེན་གནང་སྟེ་བོད་དོན་སྐོར་གླེང་མོལ་གནང་ཡོད། ཕྱོགས་མཚུངས་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ཨེསྚོ་ནི་ཡཱའི་ནང་ཆེད་ཕེབས་ཀྱིས་ཨེསྚོ་ནི་ཡཱ་གཞུང་གི་ཕྱི་སྲིད་བློན་ཆེན་ཨུར་མ་སི་རིན་སཱ་ལུ་ (Urmas Reinsalu) མཆོག་དང་མཇལ་འཕྲད་ཞུས་གནང་ཡོད་པ་མ་ཟད། ཨེསྚོ་ནི་ཡཱའི་སྲིད་དོན་པ་ཨན་ཌི་རེ་སི་ཧར་ཀེལ་ (Andres Herkel) ལགས་དང་ལྷན་གསར་འགོད་ལྷན་ཚོགས་དང་ཨེསྚོ་ནི་ཡཱའི་ཉིན་རེའི་གསར་ཁང་གི་བཅར་འདྲི་ལ་དང་ལེན་གནང་ཡོད།སྐབས་དེར་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ཨེསྚོ་ནི་ཡཱ་གཞུང་གིས་བཙན་བྱོལ་བོད་མིའི་ཕྱི་སྐྱོད་ལག་འཁྱེར་སེར་པོ་ (Identity Certificate) ངོས་འཛིན་གནང་ཕྱོགས་དང་ཨེསྚོ་ནི་ཡཱ་ནང་བོད་མིར་སློབ་སྦྱོང་གི་གོ་སྐབས་དང་སློབ་ཡོན་གནང་ཐུབ་མིན་སྐོར་གླེང་མོལ་གནང་ཡོད། དེ་བཞིན་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ཨེསྚོ་ནི་ཡཱའི་གྲོས་ཚོགས་འཐུས་མི་ཀ་ལེ་ལཱ་ནེ་ཊི་ (Kalle Laanet) ལགས་དང་ཊར་མོ་ (Tarmo Kruusimae) ལགས། ལོ་རྒྱུས་སྨྲ་བ་ཇཱག་ཇུ་སི་ཀེ་ (Jaak Juske) ལགས། གྲོས་ཚོགས་འཐུས་མི་ཟུར་པ་ཨར་ཐུར་( Artur Talvik) ལགས། གསར་འགོད་པ་དང་གྲོས་ཚོགས་འཐུས་མི་ཇུ་ཀུ་ཀ་ལེ་ (Juku-Kalle Raid) ལགས་སོགས་དང་ཐུག་འཕྲད་གནང་ཡོད།སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ལཱཏ་ཝི་ཡཱ་དང་། ལི་ཐུ་ནི་ཡཱ། ཨེསྚོ་ནི་ཡཱ་བཅས་ཀྱི་གཞུང་གི་ལས་བྱེད་མི་སྣ་དང་། གྲོས་ཚོགས་འཐུས་མི། གསར་འགོད་པ། བོད་དོན་རྒྱབ་སྐྱོར་བ་སོགས་དང་ཐུག་འཕྲད་གནང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གློད་བཀྲོལ་ཡོང་ཐབས་སྐོར་དང་། རྒྱ་ནག་གཞུང་གིས་བོད་མཐོ་སྒང་གི་ཁོར་ཡུག་ལ་གཏོར་བཤིག་ཚབས་ཆེན་གཏོང་བཞིན་པ་མ་ཟད། བོད་མིའི་རིགས་རྫས་བསྡུ་རུབ་དང་། བོད་པའི་ཕྲུ་གུ་རྣམས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བཏང་ཡོད་པ་སོགས་ཀྱི་སྐོར་གླེང་སློང་ཤུགས་ཆེ་གནང་ཡོད་པ་བཅས།།