༄༅། །འདི་གར་སྦེལ་ཇམ་སྐུ་ཚབ་དོན་ཁང་གིས་བཏང་གནས་ནང་འཁོད་དོན། བོད་ཟླ་ ༡༠ ཚེས་ ༢༥ ནི་རྗེ་ཙོང་ཁ་པ་ཆེན་པོ་མཆོག་དགོངས་པ་གཞན་དོན་དུ་གཤེགས་པའི་དུས་ཚེས་ཁྱད་པར་ཅན་འདི་ལ་བོད་མི་བྱིངས་དང་། ལྷག་པར་དུ་རི་བོ་དགེ་ལྡན་པའི་ཆོས་བརྒྱུད་འཛིན་པ་ཚོས་ཉིན་འདིར་མཆོད་འབུལ་སྨོན་ལམ་རྒྱ་ཆེར་ཞུ་ཡི་ཡོད་པ་རེད།
རྗེ་ཙོང་ཁ་པ་ཆེན་པོ་མཆོག་ནི་བོད་རབ་བྱུང་དྲུག་པའི་མེ་མོ་བྱ་ཡི་ལོ་སྟེ། ཕྱི་ལོ་ ༡༣༥༨ ལོར་མདོ་སྨད་ཙོང་ཁའི་ཡུལ་དུ་སྐུ་འཁྲུངས་ཤིང་། ཕྱི་ལོ་ ༡༤༡༩ ལོར་བོད་ས་ཕག་ལོའི་ཧོར་ཟླ་བཅུ་པའི་ཚེས་ཉེར་ལྔ་དང་དགུང་ལོ་རེ་གསུམ་སྟེང་དགོངས་པ་ཆོས་དབྱིངས་སུ་ཐིམ་པའི་ཚུལ་བསྟན་ཡོད་པ་དང་། དུས་དེ་ནས་བཟུང་དུས་ཚིགས་འདི་ལ་རྗེ་རིན་པོ་ཆེའི་དགོངས་རྫོགས་དུས་ཆེན་དགའ་ལྡན་ལྔ་མཆོད་ཆེན་མོ་ཞེས་ཀུན་གྱིས་སྡིག་སྤོང་དགེ་སྒྲུབ་དང་མཆོད་འབུལ་སྨོན་ལམ་རྒྱ་ཆེར་སྤེལ་བའི་ཉི་མ་ཞིག་ལ་བརྩི་བཞིན་ཡོད།
ཕྱི་ལོ་ ༢༠༢༢ ཟླ་ ༡༢ ཚེས་ ༡༨ དང་བོད་ཟླ་ ༡༠ ཚེས་ ༢༥ ཉིན་སྦེལ་ཇམ་སེར་བྱེས་ནང་པའི་རིག་གཞུང་ལྟེ་གནས་ཁང་གིས་གོ་སྒྲིག་འོག་སྦེལ་ཇམ་གྲོང་ཁྱེར་ཨན་ཊབ་ཏུ་རྟེན་གཞི་བྱས་པའི་དགོན་པར་(Schoten) འདི་ལོའི་དགའ་ལྡན་ལྔ་མཆོད་ཆེན་པོའི་དུས་དྲན་སྲུང་བརྩི་ཞུས། དེ་ཡང་མཛད་སྒོའི་ཐོག་མར་མེ་ཏོག་རིན་པོ་ཆེ་མཆོག་དང་དགེ་བཤེས་ཚེ་བརྟན་ཕུན་ཚོགས་ལགས། ལྟ་གྲུབ་དགེ་རྒན་འཇིགས་མེད་རྒྱ་མཚོ་ལགས་དང་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས། དེ་བཞིན་ཆོས་ཞུ་བ་མང་ཚོགས་ཡོངས་ནས་༸གོང་ས་༸སྐྱབས་མགོན་རིན་པོ་ཆེའི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་གྲུབ་བསྟུན། སྦེལ་ཇམ་སེར་བྱེས་ནང་པའི་རིག་གཞུང་ལྟེ་གནས་ཁང་གི་ཚོགས་གཙོ་རྣམ་རྒྱལ་སངས་རྒྱས་ལགས་ནས་རྗེ་རིན་པོ་ཆེའི་རྗེས་དྲན་ཉིན་མོ་འདི་གོ་སྒྲིག་གནང་དགོས་པའི་གལ་གནད་སྐོར་ངོ་སྤྲོད་སྙིང་བསྡུས་གནང་གྲུབ་བསྟུན། ལྟ་གྲུབ་དགེ་རྒན་འཇིགས་མེད་རྒྱ་མཚོ་ལགས་ནས་རྗེ་རིན་པོ་ཆེ་མཆོག་གི་མཛད་འཕྲིན་དང་དགའ་ལྡན་དགའ་མཆོད་སྐོར་ལ་རྒྱས་བཤད་གནང་།
དེ་རྗེས་མེ་ཏོག་རིན་པོ་ཆེ་མཆོག་ནས་མང་ཚོགས་ལ་རྟེན་འབྲེལ་གྱི་ཆོས་ཉིད་མཚོན་ཕྱིར་སྐྱབས་འགྲོ་སེམས་བསྐྱེད་ཀྱི་ཆོས་འབྲེལ་ངོ་སྤྲོད་གནང་། སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ནས་དོན་གཉེར་ཅན་གྱི་མང་ཚོགས་ལ་གསུང་དོན། དེ་སྔ་དགའ་ལྡན་ཕོ་བྲང་གི་དུས་ཏེ་རྒྱལ་བ་ལྔ་པའི་སྐབས་ལོ་སྟར་ཆགས་མཛད་སྒོ་ཚོགས་པའི་ཁོངས་ནས་དགའ་ལྡན་ལྔ་མཆོད་འདི་གཅིག་ཆགས་བསྡད་ཡོད་ཅིང་། རྗེ་རིན་པོ་ཆེ་མཆོག་གི་མཁས་སྒྲུབ་གཉིས་ལྡན་གྱི་ཡོན་ཏན་ལ་རྗེས་སུ་ཡི་རང་བྱེད་ཀྱི་ཡོད་ན། གལ་ཆེ་ཤོས་ཏེ་རང་ཉིད་ཀྱིས་བསམ་པ་རྣམ་དག་གི་སྒོ་ནས་རྗེ་རིན་པོ་ཆེ་མཆོག་གི་སྐུ་གསུང་ཐུགས་ཀྱི་ཡོན་ཏན་འདི་དག་ལ་བསླབས་དགོས་པ་དང་། རྗེས་དྲན་གནང་བའི་སྐབས་རང་ཉིད་སོ་སོའི་སྒོ་གསུམ་གྱི་གཤིས་སྤྱོད་ལ་བཟོ་བཅོས་དང་ཞུ་དག་བཏང་བའི་ཐོག་སོ་སོས་རྗེས་དྲན་ཞུས་པའི་བླ་མ་དེའི་བཀའ་སྲུང་ཅི་སྒྲུབ་ཞུ་གི་འདུག་མི་འདུག་ཞུ་དག་གནང་། བླ་མའི་བཀའ་བཞིན་སྒྲུབ་ཀྱི་འདུག་བསམ་ན། དེར་རྗེས་སུ་ཡི་རངས་དང་བསྔོ་བ་བྱས། རང་གི་བླ་མའི་བཀའ་ལྟར་སྒྲུབ་ཀྱི་མི་འདུག་བསམ་ན་བཤག་པ་བྱས། ཕྱིན་ཆད་དེ་ལྟར་བྱེད་ཀྱི་མིན་བསམ་པའི་ཀུན་སློང་བཅོས་ཐུབ་པ་ཞིག་དགོས་སྐོར་དང་། ༸གོང་ས་མཆོག་ནས་དུས་ཀུན་བཀའ་སློབ་ཕེབས་དོན་བཞིན་ནང་པའི་ཆོས་འདི་རྨོངས་དད་ཙམ་མ་ཡིན་པར་ཤེས་པའི་ཐོག་ནས་དད་པ་ཐོབ་པ་ཞིག་དགོས་ཞེས་གསུང་བ་ལྟར་ཚང་མས་དམ་དོན་དགོས་སྐོར་གསུངས། དེ་རྗེས་དགེ་ཤེས་ཚེ་བརྟན་ཕུན་ཚོགས་ལགས་ཀྱིས་དབུ་མཛད་གནང་སྟེ་ཚོགས་མཆོད་རྒྱ་ཆེ་ཕུལ་བ་དང་སྦྲགས་ཆོས་ཞུ་བ་རྣམས་ལ་ཉིན་དགུང་ཞལ་ལགས་གོ་སྒྲིག་གིས་ཉིན་རྒྱབ་ཕྱག་ཚོད་བཞི་དང་ཕྱེད་ཡོལ་ཐོག་མཛད་རིམ་གྲོལ་ཡོད་པ་བཅས།།
