༄༅། །འདི་གར་པེ་རི་སི་འབྲེལ་མཐུད་ལས་ཁུངས་ནས་བཏང་གནས་ནང་འཁོད་དོན། པེ་རི་སི་འབྲེལ་མཐུད་ལས་ཁུངས་དང་བོད་རིགས་ཚོགས་པ་ཐུན་མོང་གི་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༣ འཁོར་བའི་དུས་ཆེན་གྱི་མཛད་སྒོར་པེ་རི་སི་གནས་སྡོད་བོད་མི་གྲངས་ ༥༠༠ ལྷག་ཙམ་ཚང་འཛོམས་ཀྱི་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་མཛད་སྒོའི་སྐུ་མགྲོན་གཙོ་བོར་ས་གནས་སྲིད་གཞུང་གི་འགྲོ་བ་མིའི་ཐོབ་ཐང་ཚན་པའི་ལས་ཀྱི་སྣེ་མོ་བ་ཁག་གཅིག་གདན་ཞུ་བཞིན་ཆེད་ཕེབས་ཀྱིས་གསུང་བཤད་གནང་ཡོད་པ་མ་ཟད། བོད་དོན་རྒྱབ་སྐྱོར་ཚོགས་པའི་སྐུ་ཚབ་ཁག་གཅིག་ཀྱང་མཉམ་ཞུགས་གནང་ཡོད། པེ་རི་སི་འབྲེལ་མཐུད་ལས་ཁུངས་ནས་མི་མང་ཚང་འཛོམས་སྟེང་བཀའ་སྤྱི་གཉིས་ཀྱི་གསུང་འཕྲིན་སྒྲོགས་སྦྱང་དང་། མང་ཚོགས་ལ་དང་བླངས་དཔྱ་དངུལ་ལག་དེབ་དང་མི་འབོར་གྲངས་བཤེར་གྱི་གལ་གནད་སྐོར་འགྲེལ་བརྗོད་ཞིབ་ཕྲ་ཞུས་ཡོད། མཐར་ས་གནས་ཀྱི་ཚོགས་སྡེ་ཁག་གིས་གཞས་སྣ་འཁྲབ་སྟོན་གཟིགས་འབུལ་ཞུས་ཏེ་མཛད་སྒོ་རྒྱལ་ཁའི་ངང་གྲུབ་ཡོད་པ་བཅས། །
