༄༅། །མཉམ་འབྲེལ་རྒྱལ་ཚོགས་ནས་འགྲོ་བ་མིའི་ཐོབ་ཐང་གི་བཅའ་ཁྲིམས་ཡོངས་ཁྱབ་གསལ་བསྒྲགས་གནང་སྟེ་ལོ་ངོ་ ༧༤ འཁོར་བའི་དུས་ཆེན་དང་བསྟུན། ཕྱི་ལོ་ ༢༠༢༢ ཟླ་ ༡༢ ཚེས་ ༩ ཉིན་འགྲོ་བ་མིའི་ཐོབ་ཐང་དེ་ཉིད་ཞི་བདེའི་རིག་གཞུང་ཞིག་ཏུ་ཡོང་ཐབས་ཞེས་པའི་འགོ་བརྗོད་འོག་ཉིན་གྲངས་གཅིག་རིང་སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ཕོ་བྲང་ནང་བཞུགས་མོལ་ཚོགས་འདུ་ཚོགས་ཤིང་། ཚོགས་འདུར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས། ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས། དེ་བཞིན་རྒྱལ་ཁབ་འདྲ་མིན་གྱི་ཚོགས་པ་དང་ཆོས་ལུགས་ཚོགས་པ་ཁག་གི་སྐུ་ཚབ་རྣམས་མཉམ་ཞུགས་གནང་ཡོད།
དེ་ཡང་སུད་སི་སྐུ་ཚབ་དོན་གཅོད་འཕྲིན་ཆོས་སྐྱིད་ལགས་ཀྱིས་བཞུགས་མོལ་ཚོགས་འདུའི་ལས་རིམ་གཉིས་པའི་སྐབས་ཆོས་དད་དང་འགྲོ་བ་མིའི་ཐོབ་ཐང་ཞེས་པའི་བརྗོད་གཞིའི་ཐོག་གསུང་བཤད་གནང་སྐབས་བོད་བརྒྱུད་ནང་བསྟན་གྱི་གཞུང་ནས་སེམས་ཅན་ཐམས་ཅད་རྩ་ཆེན་པོ་རྩི་ཡི་ཡོད་པའི་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནམ་རྒྱུན་འཛམ་གླིང་གི་མི་འབོར་ཐེར་འབུམ་བདུན་ལྷག་ཡོད་པ་རྣམས་ཀྱིས་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པའི་སྐོར་བཀའ་སློབ་ཡང་ཡང་ཕེབས་ཀྱི་ཡོད་སྐོར་ནན་ཏན་དུ་གསུངས་ཡོད།
གཞན་ཡང་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་ཐུང་བརྒྱུད་ཕྱི་ལོ་ ༢༠༢༡ ལོར་རྒྱལ་སྤྱིའི་ཆོས་དད་རང་དབང་ལྷན་ཚོགས་སུ་འཛམ་གླིང་གི་ཆོས་བརྒྱུད་ཚང་མས་བྱམས་བརྩེ་དང་། བཟོ་བསྲན། ཆོག་ཤེས་སོགས་ཉམས་ལེན་བྱེད་དགོས་པ་གཅིག་མཚུངས་གསུང་གི་ཡོད་པའི་བཀའ་སློབ་སྩལ་བ་གཟིགས་འབུལ་ཞུས་པར། ཚོགས་འདུར་བཅར་མཁན་རྒྱལ་ཁབ་འདྲ་མིན་གྱི་ཚོགས་པ་དང་ཆོས་ལུགས་ཚོགས་པ་ཁག་གི་སྐུ་ཚབ་རྣམས་ཀྱིས་དགའ་བསུའི་ཐལ་མོ་བརྡབས་གནང་ཡོད།
སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས་གཙོས་ཚོགས་འདུར་བཅར་མཁན་རྒྱལ་ཁབ་འདྲ་མིན་གྱི་ཚོགས་པ་དང་ཆོས་ལུགས་ཚོགས་པ་ཁག་གི་སྐུ་ཚབ་ཡོངས་ལ་ཐུགས་རྗེ་ཆེ་ཞུས་གནང་ཡོད་པ་བཅས།།
