༄༅། །ཕྱི་ལོ་ ༢༠༢༢ ཟླ་ ༡༢ ཚེས་ ༡༠ རེས་བཟའ་སྤེན་པ་ཉིན་སུད་སི་དང་། ཇར་མ་ནཱི། ཨི་ཊ་ལཱི། ཨོསྟྲི་ཡཱ་བཅས་ཀྱི་ནང་བོད་མི་དང་བོད་དོན་རྒྱབ་སྐྱོར་བ་སོགས་ཀྱིས་ཞི་བའི་སྐད་འབོད་གནང་སྟེ་འཛམ་གླིང་འགྲོ་བ་མིའི་ཐོབ་ཐང་ཉིན་མོ་སྲུང་བརྩི་ཞུས་གནང་ཡོད།
དེ་ཡང་མཉམ་འབྲེལ་རྒྱལ་ཚོགས་ནས་འགྲོ་བ་མིའི་ཐོབ་ཐང་གི་བཅའ་ཁྲིམས་ཡོངས་ཁྱབ་གསལ་བསྒྲགས་གནང་སྟེ་ལོ་ངོ་ ༧༤ འཁོར་བའི་དུས་ཆེན་དང་བསྟུན། བོད་མི་དང་བོད་དོན་རྒྱབ་སྐྱོར་བ་སོགས་ཀྱིས་མཉམ་འབྲེལ་རྒྱལ་ཚོགས་གཙོས་པའི་རྒྱལ་སྤྱིའི་ཚོགས་སྡེ་ཁག་ལ་རྒྱ་ནག་གི་ཁྲིམས་འགལ་གྱི་དབང་བསྒྱུར་འོག་བོད་ནང་གི་གནས་སྟངས་ཉིན་རེ་བཞིན་ཇེ་སྡུག་ཏུ་འགྲོ་བཞིན་པའི་སྐོར་རྟོག་ཞིབ་གནང་དགོས་པའི་འབོད་སྐུལ་ཞུས་གནང་ཡོད།
སུད་སི་དང་ལིག་ཏེན་སིཊཡན་བོད་རིགས་མི་མང་གི་གོ་སྒྲིག་འོག་བོད་མི་དང་བོད་དོན་རྒྱབ་སྐྱོར་བ་སོགས་ཀྱིས་ཇི་ནི་ཝར་རྟེན་གཞི་བྱས་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོའི་ལས་ཁུངས་དང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་ཁུངས་ཀྱི་མདུན་དུ་བོད་མི་དང་བོད་དོན་རྒྱབ་སྐྱོར་བ་སོགས་ཀྱིས་བོད་ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་དགོས་པ་མ་ཟད། མི་རིགས་རྩ་གཏོར་གྱི་སྲིད་བྱུས་མཚམས་འཇོག་བྱེད་དགོས་པའི་ཞི་བའི་སྐད་འབོད་གནང་ཡོད།
སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༣ འཁོར་བའི་མཛད་སྒོར་བཀའ་ཤག་གི་གསུང་བཤད་གསུང་འཕྲིན་སྒྲོགས་སྦྱང་གནང་བ་དང་འབྲེལ་རྒྱ་ནག་གཞུང་གིས་མུ་མཐུད་བོད་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་དང་དམ་བསྒྲགས་བྱེད་བཞིན་པ་སོགས་ཀྱི་སྐོར་གསུངས་ཡོད།
ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས་རྒྱ་ནག་གཞུང་གིས་མུ་མཐུད་བོད་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད་སྟབས། ཚང་མས་ནུས་པ་མཉམ་སྤུངས་གནང་སྟེ་ཁ་གཏད་གཅོག་དགོས་པའི་གལ་གནད་སྐོར་གསུང་བཤད་གནང་ཡོད། དེ་བཞིན་སུད་སིར་ཡོད་པའི་གཞུང་ཁོངས་མིན་པའི་ཚོགས་པ་དང་བོད་དོན་རྒྱབ་སྐྱོར་ཚོགས་པ་ཁག་གི་སྐུ་ཚབ་སོགས་ནས་གསུང་བཤད་གནང་ཡོད།
གཞན་ཡང་ཇར་མ་ནཱི་དང་། ཨི་ཊ་ལཱི། ཨོསྟྲི་ཡཱ་བཅས་ཀྱི་ནང་བོད་མི་དང་། ཡུ་གུར་བ། ཧོང་ཀོང་བ། རྒྱ་རིགས་སོགས་ནས་བོད་ནང་རང་དབང་དགོས་པ་དང་མི་རིགས་རྩ་གཏོར་མཚམས་འཇོག་དགོས་པ་སོགས་ཀྱི་ཞི་བའི་སྐད་འབོད་གནང་ཡོད་པ་བཅས།།
