༄༅། །ཕྱི་ལོ་ ༢༠༢༢ ཟླ་བ་ ༡༢ ཚེས་ ༠༩ ཉིན་བོད་མིའི་སྒྲིག་འཛུགས་ཀྱི་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་དང་། སཾ་བྷོ་ཊ་བོད་སློབ་ཚོགས་པའི་འགན་འཛིན་ཚེ་རིང་དོན་གྲུབ་ལགས། ལས་འཆར་འགན་འཛིན་འཇིགས་མེད་དབྱངས་ཅན་ལགས་བཅས་ཨོ་ཌི་ཤཱ་ཕུན་ཚོགས་གླིང་བོད་མིའི་གཞིས་ཆགས་དང་སཾ་བྷོ་ཊ་ཅན་དྲ་གྷི་རི་སློབ་གྲྭར་གཞུང་འབྲེལ་འཚམས་གཟིགས་སུ་ཕེབས་ཡོད།སྐབས་དེར་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་སློབ་གྲྭའི་དགེ་ལས་སློབ་ཕྲུག་རྣམས་ལ་གསུང་བཤད་གནང་སྐབས་སློབ་ཕྲུག་རྣམས་ནས་མ་འོངས་པར་བོད་མིའི་སྤྱི་ཚོགས་ཁྲོད་འགོ་ཁྲིད་འགན་ཁུར་ཐུབ་པ་དགོས་པ་དང་། གོ་སྐབས་དམ་འཛིན་གྱིས་ལས་འགུལ་གང་མང་ལ་མཉམ་ཞུགས་ཀྱིས་གདེང་ཚོད་དང་འགོ་ཁྲིད་ནུས་སྟོབས་སྤེལ་དགོས་པའི་སྐོར། དེ་བཞིན་རིགས་གཅིག་རྐང་འཛིན་གྱི་གལ་གནད་དང་སློབ་སྦྱོང་བྱེད་སྐབས་དཔྱད་ཞིབ་ཐབས་ལམ་བསྟེན་རྒྱུའི་དགོས་ཕན་སོགས་ཀྱི་སྐོར་གསུང་བཤད་གནང་ཡོད།ཕྱི་དྲོ་ཁོང་རྣམས་ནས་ཕྲུ་གུའི་ཕ་མ་དང་ཐུག་འཕྲད་གནང་སྐབས་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་དམའ་རིམ་ཤེས་ཡོན་གྱི་གལ་ཆེའི་རང་བཞིན་སྐོར་དང་། ཤེས་རིག་ལས་ཁུངས་ནས་དམའ་རིམ་ཤེས་ཡོན་གྱི་གཞི་རྟེན་ལེགས་པར་ཚུགས་ཐུབ་ཆེད་ལས་གཞི་སྣ་ཚོགས་སྤེལ་བཞིན་པའི་སྐོར། དེ་འབྲེལ་ཕ་མ་རྣམས་ནས་ཀྱང་ཕྲུ་གུ་གསོ་སྐྱོང་ཐད་ཐུགས་ཁུར་ཆེ་བཞེས་དགོས་པའི་འབོད་སྐུལ་གནང་ཡོད་པ་རེད།

གཞན་ཡང་ཁོང་གིས་ཤེས་ཡོན་གྱི་སྤུས་ཚད་གོང་མཐོར་གཏང་རྒྱུ་དང་། དགེ་རྒན་དང་ཕ་མ་ཟུང་སྦྲེལ་གྱིས་ཕྲུ་གུའི་ཤེས་རིག་འཚར་ལོངས་ལ་སྐུལ་དེད་གནང་དགོས་སྐོར། ཕ་མ་རྣམས་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་སླད་ཐུགས་ཁུར་བཞེས་དགོས་པ་སོགས་ཀྱི་སྐོར་གསུང་བཤད་གནང་། ཕྱོགས་མཚུངས་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་ས་གནས་ཀྱི་བོད་སློབ་ཁག་གི་དགེ་རྒན་རྣམས་དང་ཐུག་འཕྲད་གནང་སྟེ་དགེ་རྒན་རྣམས་ལ་བསྔགས་བརྗོད་གནང་བ་དང་སྦྲགས། སློབ་མ་གཙོ་བོར་བཟུང་བའི་སློབ་ཁྲིད་ཐབས་ལམ་བསྟེན་རྒྱུ་དང་། སློབ་མའི་རྒྱུད་ལ་ཤེས་འདོད་ཆོས་ཅན་བསྐྲུན་རྒྱུ། དགེ་རྒན་ཆེད་ལས་ཀྱི་དགེ་ཚན་སོགས་ཀྱི་སྐོར་གསུངས་རྗེས་མཐར་དགེ་རྒན་རྣམས་ཀྱི་དོགས་འདྲི་ཁག་ལ་ལན་འདེབས་གསལ་བཤད་གནང་ཡོད་པ་བཅས།།