༄༅། །ཕྱི་ལོ་ ༢༠༢༢ ཟླ་ ༡༢ ཚེས་ ༢༤ ཉིན་བོད་མིའི་སྒྲིག་འཛུགས་ཀྱི་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གིས་ཚོགས་འདུ་ཚོགས་ཡོད་པ་དང་། ཚོགས་འདུར་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་མི་འཕྲོད་བསྟེན་ལས་ཁུངས་ཀྱི་དྲུང་ཆེ་ཟླ་བ་ཚུལ་ཁྲིམས་ལགས་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས། འགྲོ་ཕན་སྨན་རྩིས་ཁང་གི་འགན་འཛིན་ཐུབ་བསྟན་ཚེ་རིང་ལགས། འགྲོ་ཕན་སྨན་རྩིས་ཁང་གི་སྨན་པ་རིག་འཛིན་བཟང་མོ་ལགས། བདེ་ལེགས་སྨན་ཁང་གི་སྨན་པ་རྣམ་གྲོལ་ལགས་བཅས་ཕེབས་ཡོད་པ་མ་ཟད། ༸སྐུའི་ཕྱི་ལུགས་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དང་། ༸སྐུའི་གསོ་རིག་བླ་སྨན་པ་ཚེ་དབང་རྟ་མགྲིན་ལགས་དྲ་ཐོག་ནས་མཉམ་ཞུགས་ཀྱིས་ལམ་སྟོན་གནང་ཡོད།དེ་ཡང་ཚོགས་འདུ་ཚོགས་དགོས་པའི་དམིགས་ཡུལ་གཙོ་བོ་ནི། ཏོག་དབྱིབས་གཉན་རིམས་གསར་དུ་ངོ་བོ་འགྱུར་ལྡོག་བྱུང་བའི་གཉན་རིམས་ཨོ་མི་ཁི་རོན་ (Omicron Sub-Variant BF7) སྐོར་དང་། མ་འོངས་སྔོན་འགོག་གི་ཐབས་ལམ་སོགས་ཀྱི་སྐོར་གྲོས་བསྡུར་གནང་སླད་ཡིན་ཞིང་། ཐེངས་འདིའི་ཚོགས་འདུའི་ཐོག་ཚོགས་མི་རྣམ་པས། མི་རེ་ངོ་རེ་ནས་ཁ་རས་གྱོན་དགོས་པ་མ་ཟད། ནད་རྟགས་ཐོན་ཚེ་ཁྱིམ་དུ་བསྡད་ནས་འཕྲལ་དུ་བརྟག་དཔྱད་བྱེད་དགོས་པའི་གལ་གནད་དང་། ལྷག་པར་ཟླ་འདིའི་ཟླ་མཇུག་ཏུ་ལྷ་དང་བཅས་པའི་འགྲོ་བ་ཡོངས་ཀྱི་མགོན་སྐྱབས་སྤྱི་ནོར་༸གོང་ས་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་སྟོན་པ་བཅོམ་ལྡན་འདས་རྒྱལ་བ་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་པའི་གནས་མཆོག་རྡོ་རྗེ་གདན་དུ་ཆོས་འབྲེལ་བཀའ་དྲིན་སྩལ་སྐབས་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ནས་ཆོས་ཞུ་བ་གནད་ཡོད་མི་སྣ་དང་། སེར་སྐྱ་མང་ཚོགས་བཅས་ལ་ངེས་པར་ཁ་རས་གྱོན་དུ་འཇུག་དགོས་པའི་གལ་གནད་སོགས་ཀྱི་སྐོར་གོ་བསྡུར་གནང་ཡོད་ལ། དེ་བཞིན་བཙན་བྱོལ་བོད་མིའི་གཞིས་ཆགས་ཁག་ཏུ་ཏོག་དབྱིབས་གཉན་རིམས་དང་འབྲེལ་བའི་འཚོ་རླུང་གསོག་ཆས་སོགས་ཀྱི་མཐུན་རྐྱེན་འདང་ངེས་གྲ་སྒྲིག་གནང་དགོས་པའི་གལ་གནད་སོགས་ཀྱི་སྐོར་གོ་བསྡུར་གནང་ཡོད་པ་བཅས།།