༄༅། །ཕྱི་ལོ་ ༢༠༢༢ ཟླ་བ་ ༡༢ ཚེས་ ༡༧ ཉིན་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་ནིའུ་ཡོག་བོད་ཁང་དུ་བོད་རྒྱའི་གཞོན་སྐྱེས་གླེང་མོལ་ཚོགས་འདུ་ཞིག་གོ་སྒྲིག་གནང་ཡོད་པ་དང་། བོད་རྒྱའི་གཞོན་སྐྱེས་གླེང་མོལ་ཚོགས་འདུར་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་། བྱང་ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུར་པ་ཀུན་དགའ་བཀྲ་ཤིས་ལགས། རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས། རྒྱ་རིགས་ཤེས་ཡོན་པ་ཐེན་པིའོ་(Dr. Teng Biao) ལགས་དང་ཀྲིག་ཧྥིན་སུའོ་(Zhou Fengsuo) ལགས། དེ་བཞིན་རྒྱ་རིགས་མང་གཙོ་དོན་གཉེར་བ་སོགས་མཉམ་ཞུགས་གནང་ཡོད།དེ་ཡང་ཐོག་མར་བྱང་ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་ཚོགས་འདུ་ངོ་སྤྲོད་གནང་བ་དང་འབྲེལ་བོད་རྒྱའི་དཀའ་རྙོག་སེལ་ཐབས་སུ་མ་འོངས་པར་བོད་རྒྱའི་གཞོན་སྐྱེས་གང་མང་ཚོགས་འདུ་དེ་ལྟ་བུ་ནང་མཉམ་ཞུགས་གནང་དགོས་པའི་གལ་གནད་སྐོར་གསུང་བཤད་གནང་སྟེ་ཚོགས་འདུ་གཙོ་སྐྱོང་གནང་ཡོད། བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱའི་དཀའ་རྙོག་སེལ་ཐབས་སུ་བོད་རྒྱའི་གཞོན་སྐྱེས་དབར་གོ་རྟོགས་མང་ཙམ་སྤེལ་རེས་གནང་དགོས་པའི་བཀའ་སློབ་ཕེབས་ཡོད་པའི་སྐོར་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་དང་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་སོགས་ཀྱི་སྐོར་གསུང་བཤད་གནང་ཡོད།ཚོགས་བཅར་བ་ ༨༠ ཙམ་ཚོགས་འདུར་མཉམ་ཞུགས་ཀྱིས་ཨིན་སྐད་དང་རྒྱ་སྐད་བཤད་མཁན་རུ་ཁག་གཉིས་བཟོས་ཏེ་རྒྱ་ནག་གི་ཆབ་སྲིད་ལངས་ཕྱོགས་དང་། རྒྱ་ནག་དང་ཕྱི་རྒྱལ་དུ་ཤོག་དཀར་གསར་བརྗེ་བྱུང་བའི་སྐོར་དང་། བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས། བོད་མིའི་རང་ཐག་རང་གཅོད་ཀྱི་ཐོབ་ཐང་སོགས་ཀྱི་སྐོར་གྲོས་བསྡུར་གནང་ཡོད་པ་མ་ཟད། མ་འོངས་པར་བོད་རྒྱའི་དཀའ་རྙོག་སེལ་ཐབས་སུ་དེ་ལྟ་བུའི་ཚོགས་འདུ་མང་ཙམ་གོ་སྒྲིག་གནང་དགོས་པའི་དགོངས་ཚུལ་སོགས་གསུངས་ཡོད་པ་བཅས།།