༄༅། །སྐབས་བཅུ་དྲུག་པའི་བཀའ་ཤག་གིས་དབུ་འཛུགས་གནང་བའི་དང་བླངས་བོད་དོན་ཞུ་གཏུག་ལས་འགུལ་ནི་བོད་དོན་ཞུ་གཏུག་རྒྱལ་སྤྱིའི་སྟེང་སྔར་ལྷག་གོང་འཕེལ་གཏང་རྒྱུའི་དམིགས་ཚད་བཟུང་ཡོད་པ་ལྟར། བེལ་ཇམ་སྐུ་ཚབ་དོན་ཁང་གིས་བོད་རིགས་གཞོན་སྐྱེས་རྣམས་བོད་དོན་ལ་དོ་སྣང་དང་སེམས་འགུལ་ཐེབས་སླད་ཕྱི་ལོ་ ༢༠༢༢ ཟླ་བ་ ༡༢ ཚེས་ ༠༡ ཉིན་ཁེ་ན་ཊ་གནས་འཁོད་བོད་དོན་ལས་འགུལ་བ་འཆི་མེད་ལྷ་མོ་ལགས་མགྲོན་འབོད་ཀྱིས་ས་གནས་ཀྱི་གཞོན་སྐྱེས་ཁག་གཅིག་ལ་ཁོང་མོའི་བོད་དོན་ལས་འགུལ་ཀྱི་འགྲུལ་བཞུད་སྐོར་གཏམ་བཤད་གོ་སྒྲིག་གནང་ཡོད།
སྐབས་དེར་འཆི་མེད་ལྷ་མོ་ལགས་ཀྱིས་རྒྱ་ནག་དམར་ཤོག་གཞུང་གིས་བོད་ཕྱི་ནང་གཉིས་སུ་བརྙས་བཅོས་ཐུབ་ཚོད་དང་དྲག་གནོན་ཅན་གྱི་སྲིད་བྱུས་ཇི་ལྟར་འཛིན་གྱི་ཡོད་པ་ངོ་སྤྲོད་དང་། རྒྱ་ནག་གཞུང་གིས་བོད་མི་ཡིན་ནོ་ཅོག་ལ་རྒྱབ་དེད་གཏོང་གི་ཡོད་ཅིང་། དེ་སྔ་ཁོང་མོར་འཇིགས་སྐུལ་བཏང་མྱོང་ཡོད་སྐོར་འགྲེལ་བརྗོད་གནང་བ་དང་འབྲེལ། གཞོན་སྐྱེས་རྣམས་ནས་མི་ཚེའི་ནང་དཀའ་ངལ་རིགས་འཕྲད་ཚེ་དེ་ལ་བརྟེན་ནས་བོད་དོན་ལ་སེམས་ཤུགས་ཆག་མི་ཉན་པ་མ་ཟད། དེང་གི་དུས་སུ་བོད་མི་ཡིན་པའི་ངོ་བོ་སྲུང་སྐྱོབ་གནང་གལ་ཆེ་བའི་སྐོར་ངོ་སྤྲོད་གནང་།
གཞན་ཡང་ཁོང་མོས་གཞོན་སྐྱེས་རྣམས་ཀྱིས་བོད་ནང་གི་ཛ་དྲག་གནས་སྟངས་ལ་དོ་སྣང་དང་རྒྱུས་ལོན་གནང་རྒྱུ་གལ་ཆེན་པོ་ཡིན་པ་དང་། བོད་ཀྱི་ཛ་དྲག་གནས་སྟངས་རྒྱུས་ལོན་བྱུང་ན་དེ་ཉིད་རྒྱལ་སྤྱིའི་སྟེང་བོད་དོན་ཞུ་གཏུག་སླད་ཕན་ཐོགས་ཆེན་པོ་ཡོད་པ་འགྲེལ་བརྗོད་གནང་ཡོད་པ་བཅས།།
