༄༅། །བོད་ཀྱི་ཆབ་སྲིད་བཙོན་ཟུར་གྲྭ་ཨ་རྒྱལ་ཚེ་རིང་ལགས་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་ཡོད་པ་རེད། ཨ་རྒྱལ་ཚེ་རིང་ལགས་བོད་ཁམས་དཀར་མཛེས་རྫོང་རོང་པ་ཚ་ཇོ་རི་གྲོང་ཚོ་ནང་འཁྲུངས་ཤིང་། ཏྲེ་ཧོར་དར་རྒྱས་དགོན་གྱི་གྲྭ་ཨ་རྒྱལ་ཚེ་རིང་ངམ་ཡོངས་གྲགས་སུ་ཨ་ཕོ་ཨ་རྒྱལ། མིང་གཞན་བླ་མ་བློ་བཟང་ངམ་བློ་བཟང་བསྟན་འཛིན་ལགས་ནི། ཕྱི་ལོ་ ༡༩༩༠ ལོའི་ཕྱི་ཟླ་ ༣ ཚེས་ ༨ ཉིན་རྒྱ་ནག་དམར་ཤོག་སྲིད་གཞུང་གིས་ཐོག་མར་མཚོ་སྔོན་ཞིང་ཆེན་སྐྱེས་དགུ་མདོ་ནས་འཛིན་བཟུང་བྱས་ཤིང་། སྐབས་དེར་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་གསུང་འཕྲིན་ཕྱོགས་བསྡུས་ཀྱི་དཔེ་དེབ་དང་། བོད་རང་བཙན་གྱི་འགྲེམས་ཤོག་སོགས་བཀྲམ་པའི་རྐྱེན་གྱིས་ཟླ་གྲངས་ ༡༨ ཙམ་རིང་རྒྱ་ནག་གི་བཙོན་ཁང་ནས་སྡུག་སྦྱོང་མནར་སྤྱོད་ཚད་མེད་མྱངས་དགོས་བྱུང་ཡོད།
དེ་རྗེས་ཕྱི་ལོ་ ༡༩༩༩ ལོའི་ཟླ་ ༡༠ ཚེས་ ༢༤ ཉིན་རྒྱ་གཞུང་གིས་དཀར་མཛེས་རྫོང་ཐོག་ནས་ཁོང་དང་དགེ་བཤེས་བསོད་ནམས་ཕུན་ཚོགས་ལགས། རོགས་པ་གཞན་བསོད་ནམས་ཆོས་འཕེལ་ལགས་བཅས་གསུམ་མཉམ་དུ་སླར་ཡང་འཛིན་བཟུང་བྱས་ཡོད་པ་དང་། ཕྱི་ཟླ་ ༡༠ ཚེས་ ༣༡ ཉིན་དཀར་མཛེས་རྫོང་ཐོག་ཏུ་མི་མང་གསུམ་སྟོང་ལྷག་ཙམ་འདུ་འཛོམས་ཀྱིས་ཁོང་གསུམ་གློད་བཀྲོལ་དགོས་པའི་དགོས་འདུན་གྱི་སྐད་འབོད་ཤུགས་ཆེ་བྱས་རྗེས་རྒྱ་ནག་དམར་ཤོག་གཞུང་གིས་དྲག་ཆས་ཉེན་རྟོག་པ་རུ་ཁག་མངགས་ཏེ་མང་ཚོགས་སྟེང་མེ་མདའ་བརྒྱབ་པ་མ་ཟད། མི་མང་༨༠ ཙམ་འཛིན་བཟུང་བཀག་ཉར་བྱས་ཏེ་ཨ་རྒྱལ་ཚེ་རིང་ལགས་སུ་ལོ་ངོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་རེད།
ཨ་རྒྱལ་ཚེ་རིང་ལགས་ནས་ཆུ་དམར་ལེབ་རྫོང་ཐོག་ཏུ་རིས་མེད་ཐུབ་བསྟན་ཆོས་འཁོར་དར་རྒྱས་གླིང་ཞེས་མ་ཎི་དུང་འཁོར་སོགས་བཞེངས་བསྐྲུབ་ཆེད་དཔལ་འབྱོར་འདུ་འགོད་ཀྱི་ལས་དོན་འགན་ཁུར་རྐང་བཞེས་གནང་ཡོད། སྐབས་དེ་དུས་ཀྱི་ཕྱག་རོགས་ནག་ཚང་ནུ་ལུ་ཡིས་རང་ཉིད་ཀྱི་མི་ཚེའི་ལོ་རྒྱུས་ནང་གསལ་པོར་འཁོད་ཡོད། ཨ་རྒྱལ་ཚེ་རིང་ལགས་ཕྱི་ལོ་ ༡༩༥༢ ལོར་ཕ་བསམ་གཏན་ལགས་དང་མ་དབྱངས་སྐྱིད་ལགས་གཉིས་ཀྱི་སྲས་སུ་འཁྲུངས་ཤིང་། ཉེ་ཆར་ཕྱི་ལོ་ ༢༠༢༢ ཟླ་ ༡༢ ཚེས་ ༡༨ རེས་གཟའ་ཉི་མའི་སྔ་དྲོ་ཆུ་ཚོད་ ༨།༡༤ སྟེང་དགུང་ལོ་ ༧༡ ཐོག་དགོངས་པ་རྫོགས་ཡོད་པ་རེད།། 
