བལ་ཡུལ་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་ཏེ་ལོ་ངོ་ ༣༣ འཁོར་བའི་དུས་ཆེན་སྲུང་བརྩི་ཞུས་པ།

གསར་ལས་ཁང་གི་གསར་འགོད་པས།

༢༠༢༢-༡༢-༡༢

༄༅། །འདི་གར་བལ་ཡུལ་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བལ་ཡུལ་དོན་ཁང་གི་གོ་སྒྲིག་འོག་ཕྱི་ལོ་ ༢༠༢༢ ཟླ་ ༡༢ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༣ འཁོར་བའི་ཉིན་མོ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོའི་དུས་དྲན་གཉིས་འཛོམས་ཉིན་འཕགས་ཤིང་བྲག་དཀར་དགོན་པའི་ཚོགས་ཁང་ནང་སྐུ་མགྲོན་དང་མི་མང་བསྡོམས་ ༥༠༠ ལྷག་ཙམ་ཚང་འཛོམས་ཐོག་མཛད་སྒོ་གཟབ་རྒྱས་ངང་སྲུང་བརྩི་ཞུས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༠༠ ཐོག་སྐུ་མགྲོན་གཙོ་བོ་༸སྐྱབས་རྗེ་ཤྲཱི་ཆུ་བཟང་རིན་པོ་ཆེ་མཆོག་དང་། གཞུག་དགོན་བསམ་གཏན་གླིང་དང་ཤེལ་དཀར་ཆོས་སྡེ་དགོན་པ་གཉིས་ཀྱི་མཁན་རིན་པོ་ཆེ་རྣམ་པ་དབུས་པའི་དགེ་བཙུན་རྣམ་པ། བལ་ཡུལ་དོན་གཅོད། ཕྱོགས་བཞུགས་སྤྱི་འཐུས་དང་སྤྱི་ཟུར་རྣམ་པ། དམིགས་བསལ་སྐུ་མགྲོན་ཨ་རིའི་གཞུང་ཚབ་གཞོན་པ་སྐུ་ཞབས་ཇཱ་སོན་ཝིཀ་ (Mr. Jasson Week) ལགས་དང་ཆབ་སྲིད་སྡེ་ཚན་གྱི་ལྕམ་སྐུ་ལིན་ཛི་ (Miss Lindsay Seuc) ལགས། བལ་ཡུལ་ནང་འགྲོ་བ་མིའི་ཐོབ་ཐང་རྩོད་ལེན་བྱེད་མཁན་སྐུ་ཞབས་གོ་པལ་ཤི་བ་ཀོ་ཊི་ (Dr. Gopal Shivakoti,President of INHURED International) ལགས་དང་བྷ་ཝ་ནི་པྲ་སཏ་ཁ་རེལ་ (Mr. Bhawani Prasad Kharel,President of National Human Rights Foundation) ལགས། དེ་བཞིན་བལ་ཡུལ་ཁུལ་གྱི་ས་གནས་འཐུས་ཚོགས་ཀྱི་ཚོགས་གཙོ་རྣམ་པ།

ས་གནས་འགོ་འཛིན་རྣམ་པ་དང་ས་གནས་འགོ་འཛིན་ཟུར་པ། བལ་ཡུལ་གངས་ཅན་བདེ་རྩྭའི་དྲུང་ཆེ། ས་གནས་རང་བདེན་ཚོགས་གཙོ་རྣམ་པ། བལ་ཡུལ་ཤེས་རིག་པར་ཁང་གི་འགན་འཛིན། བལ་ཡུལ་སྣེ་ལེན་འབྲེལ་མཐུད་འགན་འཛིན། སློབ་གྲྭ་ཁག་གི་དབུ་འཛིན་དང་དགེ་ཆེ་རྣམ་པ། བལ་ཡུལ་ཀཐ་མན་གྲུའི་ས་གནས་བུད་མེད་ཚོགས་པ་གཉིས་ཀྱི་ཚོགས་གཙོ་། སྲི་ཞུའི་ལས་བྱེད་རྣམ་པ། གཞན་ཡང་མི་མང་དང་སློབ་ཕྲུག་བཅས་འདུ་འཛོམས་ཐོག་ཚོགས་ཁང་ནང་གཞུང་དགོན་བསམ་གཏན་གླིང་དགོན་པའི་དགེའདུན་པ་རྣམས་ནས་ཁྲུས་གསོལ་རབ་གནས་དང་། དེ་རྗེས་སྐུ་མགྲོན་གཙོ་བོ་དང་བལ་ཡུལ་དོན་གཅོད། ཕྱོགས་བཞུགས་སྤྱི་འཐུས་དང་མཁན་རིན་པོ་ཆེ་རྣམས་ནས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་སྐུ་གསུང་ཐུགས་རྟེན་འདེགས་འབུལ་དང་། གཞན་ཡང་སྐུ་མགྲོན་དང་མི་མང་རྣམས་ནས་རིམ་པ་བཞིན་མཇལ་དར་ཕུལ།

དེ་ནས་སྐུ་མགྲོན་དང་མི་མང་ཡོངས་ལ་རྟེན་འབྲེལ་གསོལ་ཇ་འབྲས་སིལ་འདེགས་འབུལ་ཞུས་མཚམས་ཚང་མ་སྐུ་བཞེངས་ཐོག་འཕགས་ཤིང་རྣམ་རྒྱལ་འབྲིང་རིམ་སློབ་ཕྲུག་ནས་བལ་བོད་གཉིས་ཀྱི་རྒྱལ་གླུ་དང་ནོ་སྦེལ་ཞི་བདེའི་བསྟོད་དབྱངས་ཕུལ་གྲུབ་མཚམས་ཕྱོགས་བཞུགས་སྤྱི་འཐུས་བཀྲ་ཤིས་དོན་གྲུབ་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་དང་། བལ་ཡུལ་སྐུ་ཚབ་དོན་གཅོད་རྩིབས་རི་ལོ་པན་སྤྲུལ་སྐུ་ངག་དབང་མཆོག་གྲུབ་ལགས་ཀྱིས་བཀའ་ཤག་གི་གསུང་འཕྲིན་སྒྲོགས་སྦྱང་གནང་རྗེས་སྐུ་མགྲོན་གཙོ་བོ་༸སྐྱབས་རྗེ་ཤྲཱི་ཆུ་བཟང་རིན་པོ་ཆེ་མཆོག་གིས་གསུང་བཤད་གནང་།

མཐར་བལ་ཡུལ་ལྷ་མོ་ཚོགས་པ་ནས་ཆོལ་ཁ་གསུམ་གྱི་གཞས་སྣ་གསུམ་འཁྲབ་སྟོན་དང་། སྲི་ཞུའི་ལས་བྱེད་དང་མི་མང་ནས་མཉམ་གཞས་སོགས་སུ་མཉམ་ཞུགས་གནང་རྗེས་ཀི་བསྭོའི་ལྷ་རྒྱལ་འཐེན། འདི་ལོའི་ནོ་སྦེལ་ཞི་བདེའི་གཟེངས་རྟགས་ཀྱི་དུས་དྲན་སྐབས་སྔར་དང་མི་འདྲ་བར་ས་གནས་ཉེན་རྟོགས་པ་སོགས་ཀྱི་མཛད་སྒོ་ཚོགས་ཡུལ་ལ་སུན་གཙེར་གང་ཡང་མེད་པའི་ཐོག་མཛད་སྒོ་གཟབ་རྒྱས་ངང་སྲུང་བརྩི་དང་མཇུག་སྒྲིལ་ཡོད་པ་བཅས།།