༄༅། །ཕྱི་ལོ་ ༢༠༢༢ ཟླ་བ་ ༡༢ ཚེས་ ༡༠ ཉིན་ནི་དར་ལེནྜ་ནང་ཡོད་པའི་བོད་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༣ འཁོར་བའི་དུས་ཆེན་སྲུང་བརྩིའི་མཛད་སྒོ་ཞིག་ཚོགས་ཡོད།
མཛད་སྒོའི་སྐུ་མགྲོན་གཙོ་བོར་བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་བོད་མི་མང་སྤྱི་འཐུས་བསྟན་པ་ཡར་འཕེལ་ལགས་མགྲོན་འབོད་གནང་བ་ལྟར། སྐབས་དེར་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་བོད་ཀྱི་རང་དབང་འཐབ་རྩོད་ཐོག་བོད་མི་རྣམས་འཆམ་མཐུན་རྡོག་རྩ་ཆིག་སྒྲིལ་གནང་དགོས་པ་དང་། ནང་ཁུལ་གྱི་གནད་དོན་ཆུང་ཙག་རིགས་ལ་དུས་ཚོད་ཆུད་ཟོས་སུ་མ་བཏང་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བསྒྲུབ་པར་འབད་འབུངས་རྒྱ་གང་ཆེ་གནང་དགོས་པའི་འབོད་སྐུལ་ཞུས་གནང་བ་དང་སྦྲགས། བོད་མིའི་སྒྲིག་འཛུགས་ནས་བཙན་བྱོལ་བོད་མིའི་མི་འབོར་གྲངས་བཤེར་གནང་བཞིན་པར་མཉམ་ཞུགས་གནང་དགོས་པའི་རེ་སྐུལ་གནང་ཡོད།
དེ་བཞིན་ཁོང་མོས་ཕྱིར་གྱར་བོད་མི་རྣམས་ལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་བཅས་པ་མི་ཉམས་རྒྱུན་འཛིན་གནང་རྒྱུའི་འགན་ཡོད་པ་གསལ་སྟོན་དང་སྦྲགས། གལ་ཏེ་རྒྱལ་ཁབ་ཅིག་གསོན་པོར་གནས་དགོས་ན་ང་ཚོས་དེའི་ངོ་བོ་མཚོན་པའི་རིག་གཞུང་བདག་གཅེས་བྱ་དགོས་ཞེས་གསུངས། ཕྱོགས་མཚུངས་ཁོང་མོས་བོད་མི་རྣམས་ཀྱི་གཤིས་རྒྱུད་དུ་འཇགས་པའི་བྱམས་བརྩེ་དང་གཞན་ཕན་གྱི་རིན་ཐང་ལ་བརྟེན་ནས་ཞི་བདེ་ལྡན་པའི་སྤྱི་ཚོགས་སྐྲུན་པར་ཕན་ཐོགས་ཐུབ་ཅེས་སོགས་གསུངས་ཡོད་པ་རེད། སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱི་ཐེངས་འདིའི་ནི་དར་ལེནྜ་ཁུལ་གྱི་ཕྱོགས་ཕེབས་དེ་ནི་ཁོང་མོས་སྐུ་ཚབ་དོན་གཅོད་ཀྱི་ལས་ཁུར་བཞེས་རྗེས་ཐེངས་དང་པོ་ཆགས་ཡོད།
གཞན་ཡང་སྐབས་དེར་མཛད་སྒོ་དང་སྟབས་བསྟུན་བོད་རིགས་སྤྱི་མཐུན་ཚོགས་པས་བོད་ཀྱི་ཆོས་རིག་འཛིན་སྐྱོང་ཐད་ཕྱག་ལས་གནང་བཞིན་པའི་ས་གནས་ཀྱི་གཞུང་ཁོངས་མིན་པའི་ཚོགས་སྐྱིད་ཁག་བཅུ་གཅིག་དང་ལྷན་ཚོགས་འདུ་བསྐོང་ཚོགས་ཀྱིས་ས་གནས་སུ་ཚོགས་ཁང་གསར་རྒྱག་གི་ལས་གཞིའི་སྐོར་གྲོས་བསྡུར་གནང་ཡོད་པ་བཅས།།
