༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ལོ་ ༢༠༢༢ ཟླ་བ་ ༡༢ ཚེས་ ༢༦ ཉིན་བཀའ་ཤག་ཚོགས་ཁང་དུ་ཆོས་རིག་ལས་ཁུངས་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་གོ་སྒྲིག་འོག་དགུན་དུས་བོད་ཀྱི་རིག་གཞུང་གོ་རྟོགས་ལས་རིམ་སླད་དུ་རྡོར་གླིང་དང་། སྦེང་ལོར། སྡེ་ར་ལྡུན་ཁུལ་ནས་ཕེབས་པའི་འཛིན་རིམ་བརྒྱད་པ་ནས་བཅུ་གཅིག་བར་གྱི་བོད་པའི་སློབ་ཕྲུག་གྲངས་ ༡༩ ལ་བོད་མཐོ་སྒང་གི་ཁོར་ཡུག་གི་གལ་གནད་དང་། རྒྱ་ནག་གིས་བོད་ཀྱི་ཁོར་ཡུག་ཐོག་དོ་སྣང་མ་བྱས་ན་རྗེས་མ་རྒྱ་ནག་གི་མང་ཚོགས་ལའང་ཆུའི་དཀའ་ངལ་འཕྲད་རྒྱུ་ཡིན་པ་མ་ཟད། བོད་ཀྱི་ཁྱིམ་མཚེས་རྒྱ་གར་གྱིས་གཙོས་ཨེ་ཤི་ཡའི་རྒྱལ་ཁབ་མང་པོར་ཆུའི་དཀའ་ངལ་འཕྲད་ངེས་ཡིན་པ། ད་ལྟ་ང་ཚོ་ཆབ་སྲིད་ཀྱི་བཙན་བྱོལ་པ་རེད། མ་འོངས་པར་ཆུའི་དཀའ་ངལ་ལ་བརྟེན་ནས་ཆུའི་བཙན་བྱོལ་པ་གཞན་ཡང་ཡོང་སྲིད་པ་རེད། ཅེས་གསུངས་པ་མ་ཟད། བོད་ཀྱི་ལོ་རྒྱུས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་ཡོངས་ལ་མང་གཙོ་གསོལ་རས་སྩལ་བ། བཙན་བྱོལ་བོད་མིའི་མང་གཙོའི་འཕེལ་རིམ། རྒྱ་གར་གཞུང་གིས་བཙན་བྱོལ་བོད་མི་རྣམས་ལ་ས་ཞིང་གནང་བ་ལ་བརྟེན་ནས་བོད་པའི་མི་རབས་རྒན་པ་རྣམས་ཀྱིས་དགོན་སྡེ་ཁག་དང་། བོད་མིའི་གཞིས་ཆགས་ཁག སློབ་གྲྭ་སོགས་གསར་འཛུགས་གནང་ཐུབ་ཡོད་པ། དེ་བཞིན་མང་གཙོའི་ཀ་བ་གསུམ་སོགས་ཀྱི་སྐོར་ངོ་སྤྲོད་གནང་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་སློབ་ཕྲུག་རྣམས་ལ་བོད་མིའི་སྒྲིག་འཛུགས་ཀྱི་ལྷན་ཁང་ཁག་བདུན་གྱི་ལས་དོན་གནང་ཕྱོགས་སྐོར་ངོ་སྤྲོད་གནང་ཡོད་པ་མ་ཟད། ཕྱི་ལོ་ ༢༠༠༨ ལོར་བོད་ནང་ས་བྱི་ཞི་རྒོལ་ཆེན་མོ་བྱུང་བར་བརྟེན་རྒྱ་ནག་གཞུང་གིས་བོད་ཀྱི་ས་ཁུལ་ཡོངས་སུ་དམ་བསྒྲགས་བྱས་པ་དང་། དེ་བཞིན་རྒྱ་གར་ནས་བོད་མི་ཕྱི་རྒྱལ་ཁག་ཏུ་གཞིས་སྤོ་བྱས་པ། ཕྲུ་གུ་སྐྱེས་ཚད་ཉུང་དུ་ཕྱིན་པ་བཅས་ལ་བརྟེན་ནས་བོད་པའི་སློབ་ཕྲུག་གི་གྲངས་ཀ་ཉུང་དུ་ཕྱིན་ཡོད་པ་སོགས་ཀྱི་སྐོར་གསུངས་ཡོད་པ་བཅས།།
