༄༅། །བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་ཟུང་འབྲེལ་གྱིས་ཕྱི་ལོ་ ༢༠༢༢ ཟླ་ ༡༢ ཚེས་ ༢༡ ནས་ ཕྱི་ལོ་ ༢༠༢༣ ཟླ་ ༠༡ ཚེས་ ༡༠ བར་དུས་ཡུན་ཉིན་གྲངས་ ༢༡ རིང་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་རྒྱ་བལ་གཉིས་ཀྱི་སྒེར་པའི་སློབ་གྲྭར་འགྲིམ་བཞིན་པའི་བོད་ཕྲུག་རྣམས་ལ་བོད་ཀྱི་རིག་གཞུང་ངོ་སྤྲོད་ཆེད་དགུན་དུས་བོད་ཀྱི་རིག་གཞུང་གོ་རྟོགས་ལས་གཞི་ཞིག་གོ་སྒྲིག་གནང་ཡོད་པ་དང་། ཐེངས་འདིའི་དགུན་དུས་བོད་ཀྱི་རིག་གཞུང་གོ་རྟོགས་ལས་རིམ་ནང་རྡོར་གླིང་དང་། སྦེང་ལོར། སྡེ་ར་ལྡུན་ཁུལ་གྱི་སློབ་གྲྭའི་འཛིན་རིམ་བརྒྱད་པ་ནས་བཅུ་གཅིག་བར་གྱི་བོད་པའི་སློབ་ཕྲུག་གྲངས་ ༡༩ མཉམ་ཞུགས་གནང་ཡོད།
དགུན་དུས་བོད་ཀྱི་རིག་གཞུང་གོ་རྟོགས་ལས་གཞི་དེའི་དམིགས་ཡུལ་གཙོ་བོ་ནི། བོད་ཕྲུག་རྣམས་ལ་བོད་ཀྱི་ཐུན་མོང་མ་ཡིན་པའི་རིག་གཞུང་དང་སྐད་ཡིག་ངོ་སྤྲོད་དང་། བོད་མིའི་སྒྲིག་འཛུགས་གཙོས་པའི་རིག་གཞུང་གི་བསྟི་གནས། བོད་མིའི་གཞིས་ཆགས་དང་དགོན་སྡེ་ཁག་ནང་ཉིན་རེའི་བྱེད་སྒོ་སོགས་ལ་ཤེས་རྟོགས་ཡོང་ཆེད་ཡིན། ཕྱི་ལོ་ ༢༠༢༢ ཟླ་ ༡༢ ཚེས་ ༢༡ ཉིན་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་དགུན་དུས་བོད་ཀྱི་རིག་གཞུང་གོ་རྟོགས་ལས་གཞི་དབུ་འབྱེད་མཛད་སྒོ་ཚོགས་ཡོད་པ་དང་། དབུ་འབྱེད་མཛད་སྒོར་སྐུ་མགྲོན་གཙོ་བོ་ཆོས་རིག་ལས་ཁུངས་ཀྱི་དྲུང་ཆེ་ལས་འཕར་བདུད་འདུལ་རྡོ་རྗེ་ལགས་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས། ཟབ་ཁྲིད་པ་དགེ་རྒན་སོགས་ཕེབས་ཡོད།
དེ་ཡང་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་ཀྱིས་དབུ་འབྱེད་མཛད་སྒོར་བོད་ཀྱི་སྐད་ཡིག་དང་། ཡིག་གཟུགས། གཞས་སྣ་འཁྲབ་སྟོན། ནང་པའི་ལྟ་གྲུབ། རིག་གཞུང་། སྔོན་འགྲོའི་སྒོམ་ཉམས་ལེན། བོད་ཀྱི་རྒྱལ་རབས་སོགས་ཀྱི་བསླབ་གཞི་སྐོར་དང་། དེ་བཞིན་སྦིར་དང་། བཀྲ་ཤིས་ལྗོངས། ཅོན་ཏ་རཱ་བོད་མིའི་གཞིས་ཆགས་དང་དགོན་སྡེ་ཁག་སོགས་བོད་ཀྱི་རིག་གཞུང་བསྟི་གནས་ཁག་ཏུ་སྐོར་སྐྱོད་ཀྱི་ལས་རིམ་ཁག་ངོ་སྤྲོད་གནང་ཡོད།
དེ་རྗེས་ཆོས་རིག་ལས་ཁུངས་ཀྱི་དྲུང་ཆེ་ལས་འཕར་བདུད་འདུལ་རྡོ་རྗེ་ལགས་ཀྱིས། ཐེངས་འདིའི་དགུན་དུས་བོད་ཀྱི་རིག་གཞུང་གོ་རྟོགས་ལས་རིམ་སྐབས་སློབ་ཕྲུག་ཚོས་གོ་སྐབས་སྟངས་འཛིན་གྱིས་བོད་ཀྱི་སྐད་ཡིག་དང་། རིག་གཞུང་། ལོ་རྒྱུས་སོགས་སྦྱང་བརྩོན་བྱེད་དགོས་པའི་གལ་གནད་དང་། དེ་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་གང་ཐུབ་ཀྱིས་ཉན་དགོས་པ་པ་མ་ཟད། མགོན་པོ་གང་ཉིད་མཆོག་གིས་ལྗགས་རྩོམ་མཛད་པའི་དཔེ་དེབ་གང་མང་ཀློག་དགོས་པའི་གལ་གནད་སྐོར་གསུངས། གཞན་ཡང་ཁོང་གིས་བོད་ནང་གི་བོད་མི་རྣམས་ལ་སོ་སོའི་སྐད་ཡིག་དང་རིག་གཞུང་སོགས་སྦྱོང་རྒྱུའི་གོ་སྐབས་མེད་པ་དང་། དགུན་དུས་བོད་ཀྱི་རིག་གཞུང་གོ་རྟོགས་ལས་རིམ་གྲོལ་བའི་རྗེས་སུའང་སློབ་ཕྲུག་རྣམས་ཀྱིས་མུ་མཐུད་བོད་དོན་སྐོར་ཐུགས་སྣང་དང་འགན་མང་ཙམ་འཁུར་དགོས་པའི་གལ་གནད་སོགས་ཀྱི་སྐོ་གསུངས་ཡོད།
དགུན་དུས་བོད་ཀྱི་རིག་གཞུང་གོ་རྟོགས་ལས་གཞིའི་འགྲོ་གྲོན་སླད་དུ་ཨ་རིའི་རོགས་ཚོགས་ (USAID) ནས་མཐུན་འགྱུར་གནང་ཡོད་པ་བཅས།།
