༄༅། །འདི་གར་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༢ ཚེས་ ༡ ཉིན་སྦེལ་ཀོབ་བོད་མིའི་གཞིས་ཆགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་དུ་རྒྱལ་ཁབ་ཁག་འདྲ་མིན་གྱི་ནང་པའི་འདུལ་བ་འཛིན་པའི་མཁས་དབང་གདན་ཞུས་ཀྱིས། རྒྱལ་སྤྱིའི་དམ་ཆོས་འདུལ་བའི་བགྲོ་གླེང་ཐེངས་བཞི་པའི་དབུ་འབྱེད་མཛད་སྒོར་ཆོས་རིག་ལས་ཁུངས་ཀྱི་སྐུ་ཚབ་ཏུ་དྲུང་འཕར་བདུད་འདུལ་རྡོ་རྗེ་ལགས་ཆེད་བཅར་གྱིས་བགྲོ་གླེང་གི་གལ་གནད་དང་དགེ་ཕན་སྐོར་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཚོུད་ ༧༌༤༥ ཐོག་སྐུ་མགྲོན་རྣམ་པ་དང་འདུལ་བ་འཛིན་པའི་མཁས་དབང་རྣམ་པ། བླ་སྤྲུལ་དགེ་བཤེས། ཚོགས་བཞུགས་པ། དགེ་འདུན་འདུ་མང་བཅས་ཚང་འཛོམས་ཐོག་དགེ་བཤེས་བསོད་ནམས་དབང་ལྡན་ལགས་ཀྱིས་མཛད་རིམ་སྙན་སྒྲོན་གནང་རྗེས་སེར་བྱེས་སྐྱབས་རྗེ་མཁན་རིན་པོ་ཆེ་མཆོག་དང་སྐུ་མགྲོན་གཙོ་བོ་ཆོས་རིག་དྲུང་འཕར་གྱིས་སྣང་གསལ་ཞལ་ཕྱེ་གནང་བསྟུན་རྒྱུན་ཆགས་གསུམ་པ་དང་གང་བློ་མ་གསུང་འདོན་གནང་། དེ་ནས་སེར་བྱེས་མཁན་སྙན་གྲྭ་ཚང་གི་དེང་དུས་ཤེས་ཡོན་ལྷན་ཚོགས་ཀྱི་འགན་འཛིན་དགེ་བཤེས་ལྷ་རམས་པ་ཐབས་མཁས་བློ་གྲོས་ལགས་ཀྱིས་འདུལ་བའི་བགྲོ་གླེང་གི་ངོ་སྤྲོད་མདོར་བསྡུས་གནང་རྗེས། སེར་བྱེས་སྐྱབས་རྗེ་མཁན་རིན་པོ་ཆེ་མཆོག་གིས་རྒྱལ་ཁབ་འདྲ་མིན་ནས་ཕེབས་པའི་བགྲོ་གླེང་གི་མཁས་དབང་རྣམས་ལ་ཕེབས་བསུའི་མཇལ་དར་གནང་། 
དེ་རྗེས་དམིགས་བསལ་སྐུ་མགྲོན་སེར་བྱེས་སྐྱབས་རྗེ་མཁན་རིན་པོ་ཆེ་བཀྲ་ཤིས་ཚེ་མཐར་མཆོག་དང་། བཀའ་ཟུར་གཡུ་ཐོག་ཀརྨ་དགེ་ལེགས་མཆོག ཆོས་རིག་དྲུང་འཕར་བཅས་ནས་རིམ་བཞིན་གསུང་བཤད་གནང་ཡོད་པ་དང་། སྐབས་དེར་ཆོས་རིག་དྲུང་འཕར་གྱིས་བགྲོ་གླེང་འདི་ལྟ་བུ་གོ་སྒྲིག་གནང་ཐུབ་པ་ནི། རྒྱལ་བའི་བསྟན་པ་རིན་པོ་ཆེ་སྤྱི་དང་། ལྷག་པར་འདུལ་བའི་སྡེ་སྣོད་ལ་དག་ཐེར་མཛད་དེ་བསྟན་པར་ཕྱག་རྗེས་འཇོག་པའི་བྱ་བཞག་རྨད་དུ་བྱུང་བ་ཞིག་ཡིན་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་དགོངས་དོན་དང་མཐུན་པ་ཞིག་ཀྱང་ཡིན་པས་བགྲོ་གླེང་འདི་ལྟ་བུ་གོ་སྒྲིག་གནང་བར་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་ཚབ་གནང་སྟེ་ལེགས་གསོལ་སྔགས་བརྗོད་ཞུས་ཡོད།
དེ་བཞིན་བོད་ནང་དུ་ནང་པ་སངས་རྒྱས་པའི་བསྟན་པ་ཐོག་མར་དར་ཚུལ་དང་བོད་ཀྱི་དགེ་འདུན་པའི་སྡེ་གསར་འཛུགས་གནང་ཚུལ། དེ་ནས་བོད་དུ་སངས་རྒྱས་ཀྱི་བསྟན་པ་བཤད་སྒྲུབ་གཉིས་ཐད་ནས་འཕེལ་རྒྱས་ཆེན་པོ་བྱུང་རབས། དེས་དུས་ད་ལྟ་བར་དུ་བོད་ཀྱི་ཆོས་དང་རིག་གནས་ཡོངས་རྫོགས་བོད་ཀྱི་དགེ་འདུན་གྱི་སྡེ་དང་དགོན་པའི་སྒྲིག་འཛུགས་ལ་བརྟེན་ནས་འཕེལ་རྒྱས་སུ་ཕྱིན་ཡོད་པ་མ་ཟད། བསྟན་པ་དེའི་བརྒྱུད་ལམ་གཙོ་བོར་གྱུར་པ་བོད་ཀྱི་སྐད་ཡིག་དང་རིག་གནས་མ་ལག་དང་བཅས་པ་རྒྱུན་འཛིན་དར་སྤེལ་གནང་ཐུབ་མིན་ཡང་བོད་ཀྱི་དགེ་འདུན་པའི་སྡེ་ལ་རག་ལས་ཡོད་པས་བོད་ཀྱི་འདུལ་བ་འཛིན་པའི་དགེ་འདུན་པ་རྣམས་ནི་ནང་པའི་ཆོས་ལུགས་ཀྱི་གནད་དོན་ཙམ་དུ་མ་ཟད། བོད་མི་རིགས་དང་སྐད་ཡིག་རིག་གཞུང་དང་བཅས་པའི་སྲོག་ཤིང་ལྟ་བུར་གྱུར་ཡོད་པའི་སྐོར་སོགས་་ཀྱི་གསུང་བཤད་གནང་། མཐར་སེར་བྱེས་མཁས་སྙན་གྲྭ་ཚང་གི་ཕྱག་མཛོད་ཆེན་མོ་ངག་དབང་བྱང་ཆུབ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་བགྲོ་གླེང་དབུ་འབྱེད་ཀྱི་མཛད་སྒོ་རེ་ཞིག་གྲོལ་ཡོད་པ་བཅས།།
