༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༢ ཚེས་ ༢༣ དང་ ༢༤ བཅས་ཉིན་གཉིས་རིང་གནས་མཆོག་རྡོ་རྗེ་གདན་དུ་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་དང་། འཕགས་ཡུལ་དཔལ་ལྡན་རྒྱལ་བ་ཇོ་ནང་བའི་རྡོར་གདན་སྨོན་ལམ་ཚོགས་ཆུང་། རྡོར་གདན་དབུ་མ་གཞན་སྟོང་བགྲོ་གླེང་ཚོགས་ཆུང་བཅས་ནས་གོ་སྒྲིག་གནང་བའི་ཀུན་མཁྱེན་དོལ་བོ་སངས་རྒྱས་དགོངས་པ་གཞན་དོན་དུ་གཤེགས་པའི་ཚུལ་བསྟན་ནས་ལོ་ངོ་ ༦༦༠ འཁོར་བའི་རྗེས་དྲན་མཇུག་བསྡོམས་དང་། འཕགས་ཡུལ་རྡོར་གདན་གཞན་སྟོང་དབུ་མའི་བགྲོ་གླེང་ཆེན་མོ་སྐབས་གསུམ་པར་ཆོས་རིག་ལས་ཁུངས་ཀྱི་སྐུ་ཚབ་དྲུང་འཕར་བདུད་འདུལ་རྡོ་རྗེ་ལགས་ཆེད་ཕེབས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་།
དེ་ཡང་ཕྱི་ཚེས་ ༢༣ ཉིན་གྱི་ཞོགས་པ་ཕྱག་ཚོད་ ༨༌༣༠ ཐོག་དབུ་འབྱེད་མཛད་སྒོར་ཕེབས་པའི་དཔལ་༸རྒྱལ་བ་ཇོ་ནང་བའི་བསྟན་པའི་མངའ་བདག་༸སྐྱབས་རྗེ་ཇོ་ནང་རྒྱལ་ཚབ་ཆོས་ཀྱི་སྣང་བ་རིན་པོ་ཆེ་མཆོག སྐྱབས་རྗེ་སྟང་རིན་པོ་ཆེ་མཆོག ཇོ་ནང་མ་དགོན་དང་བལ་ཡུལ་དགོན་པའི་མཁན་པོ་རྣམ་པ། བགྲོ་གླེང་བ་མཁས་དབང་རྣམ་པ། མཁན་ཟུར་བླ་སྤྲུལ་དང་དགེ་བཤེས་རྣམ་པ། ཚོགས་པ་ཁག་གི་ཚོགས་གཙོ་རྣམ་པ། གཞན་ཡང་ཚོགས་ཞུགས་པ་རྣམ་པ། དགེ་འདུན་འདུ་མང་བཅས་ཚང་འཛོམས་ཐོག སྤྱི་ནོར་༸གོང་ས་ས༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་རྗེས། ཆོས་རིག་དྲུང་འཕར་ནས་སྣང་གསལ་སྒྲོལ་མེ་ཞལ་ཕྱེ་གནང་། གྲྭ་མང་ནས་རྒྱུན་ཆགས་གསུམ་པ་དང་། རྒྱལ་མདུན་མ། ༸རྒྱལ་བའི་འཁྲུངས་རབས་གསོལ་འདེབས་བཅས་གསུང་འདོན་གནང་རྗེས་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས།
བགྲོ་གླེང་གོ་སྒྲིག་ཚོགས་ཆུང་གི་ཚོགས་གཙོ་བཀའ་བཅུ་བ་ཚུལ་ཁྲིམས་རྣམ་རྒྱལ་ལགས་ནས་བགྲོ་གླེང་གོ་སྒྲིག་ཞུ་དགོས་པའི་དམིགས་ཡུལ་དང་ངོ་སྤྲོད་གསུང་བཤད་གནང་། དེ་ནས་དཔལ་༸རྒྱལ་བ་ཇོ་ནང་བའི་བསྟན་པའི་མངའ་བདག་༸སྐྱབས་རྗེ་ཇོ་ནང་རྒྱལ་ཚབ་ཆོས་ཀྱི་སྣང་བ་རིན་པོ་ཆེ་མཆོག་གིས་བགྲོ་གླེང་དང་འབྲེལ་བའི་གསུང་བཤད་གནང་གྲུབ་བསྟུན། དཔལ་ལྡན་ཆོས་རིག་བཀའ་བློན་མཆོག་གི་སྐུ་ཚབ་ཆོས་རིག་དྲུང་འཕར་བདུད་འདུལ་རྡོ་རྗེས་ཀུན་མཁྱེན་དོལ་བོ་སངས་རྒྱས་མཆོག་གི་མཛད་རྣམ་སྙིང་བསྡུས་དང་། ད་ཐེངས་གནས་མཆོག་རྡོ་རྗེ་གདན་དུ་གཞན་སྟོང་དབུ་མའི་བགྲོ་གླེང་ཆེན་མོ་ཚུགས་པའི་ཐོག་ནས་ཀུན་མཁྱེན་དོལ་བོ་སངས་རྒྱས་ལ་བཀའ་དྲིན་རྗེས་དྲན་ཞུ་བའི་ལས་རིམ་འདི་ནི། ཤིན་ཏུ་དོན་དང་ལྡན་པ་དང། ཁ་ཚ་དགོས་གཏུགས་སུ་གྱུར་པ། གནད་ལ་བབས་པ། དོན་དམ་པའི་བཀའ་དྲིན་རྗེས་དྲན་གྱི་བྱ་བ་རྨད་དུ་བྱུང་བ། བཀའ་བཞིན་སྒྲུབ་པའི་མཆོད་པ་ཕུན་སུམ་ཚོགས་པ་ཞིག་ཏུ་གྱུར་ཡོད་པ། གཞན་སྟོང་དབུ་མའི་བགྲོ་གླེང་ཆེན་མོའི་ནང་མཉམ་ཞུགས་གནང་མཁན་མང་ཆེ་བ་ནི་གཞོན་སྐྱེས་ཤ་སྟག་ཡིན་པས་དམིགས་བསལ་གྱིས་ཕན་ཐོགས་ཡོད་པ་ཞིག་ཏུ་ངོས་འཛིན་ཞུ་བཞིན་ཡོད་པ། ཆོས་བརྒྱུད་སོ་སོའི་ཁོངས་ཀྱི་གཞོན་སྐྱེས་གྲྭ་བཙུན་རྣམས་གསོ་སྐྱོང་ཚད་ལྡན་གནང་ཐབས་མཛད་དགོས་པ་ཆོས་རིག་ལས་ཁུངས་ཀྱི་ངོས་ནས་ཤིན་ཏུ་གལ་གནད་ཆེན་པོ་ཞིག་ལ་ངོས་འཛིན་ཞུ་བཞིན་པ་པ་སོགས་ཀྱི་གསུང་བཤད་གནང་། བགྲོ་གླེང་གོ་སྒྲིག་ཚོགས་ཆུང་གི་ཚོགས་གཞོན་ཡོན་ཏན་རྒྱ་མཚོ་ནས་ཐུགས་རྗེ་ཆེ་ཞུའི་གསུང་བཤད་གནང་རྗེས་དབུ་འབྱེད་མཛད་སྒོ་གྲོལ་ཡོད་པ་དང་།
ཐེངས་འདིར་གཞན་སྟོང་དབུ་མ་ཆེན་མོའི་བགྲོ་གླེང་གི་གཙོ་སྐྱོང་གནང་མཁན་པོ་དགེ་འདུན་རྒྱ་མཚོ་མཆོག་དང་། མཁན་སྤྲུལ་ཀུན་དགའ་ཆོས་འཕེལ་མཆོག། མཁན་ཟུར་ཀུན་དགའ་མཚམས་ཆུང་མཆོག དགེ་བཤེས་ལྷ་རམས་པ་དྲི་མེད་འོད་ཟེར་མཆོག་བཅས་ཀྱིས་ཚོགས་ཐེང་གཉིས་རེ་གཙོ་སྐྱོང་གནང་།གསུང་བཤད་གནང་མཁན་གཞོན་སྐྱེས་མཁས་པ་ ༡༣ ནས་དུས་ཡུན་སྐར་མ་ ༢༠ རེ་གསུང་བཤད་གནང་རྗེས་གྲྭ་མང་ནས་དྲི་བ་དྲིས་ལན་གནང་རྒྱུའི་སྐར་མ་ ༡༠ རེ་གོ་སྐབས་གནང་ཡོད། ཕྱི་ཚེས་ ༢༤ ཉིན་རྒྱབ་ཚོུད་ ༣༌༣༠ ཐོག་མཇུག་བསྡོམས་མཛད་སྒོར་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་རྟག་བརྟན་དགེ་བཤེས་བླ་མ་སྦྱིན་པ་བཟང་པོ་ལགས་ཀྱིས་བགྲོ་གླེང་དང་འབྲེལ་བའི་གསུང་བཤད་དང་། དུས་འཁོར་གྲྭ་ཚང་གི་སློབ་དཔོན་ལྷ་སྐྱབས་ལགས་དང་། བལ་ཡུལ་ཇོ་ནང་དགོན་པའི་མཁན་པོ་དགེ་འདུན་རྒྱ་མཚོ་མཆོག འཕགས་ཡུལ་ཇོ་ནང་མ་དགོན་གྱི་མཁན་པོ་མཁན་སྤྲུལ་ཀུན་དགའ་ཆོས་འཕེལ་མཆོག་བཅས་ནས་གསུང་བཤད་གནང་གྲུབ་མཚམས། དཔལ་༸རྒྱལ་བ་ཇོ་ནང་བའི་བསྟན་པའི་མངའ་བདག་༸སྐྱབས་རྗེ་ཇོ་ནང་རྒྱལ་ཚབ་ཆོས་ཀྱི་སྣང་བ་རིན་པོ་ཆེ་མཆོག་གིས་རྒྱུགས་སྤྲོད་ཆེན་མོའི་རྒྱུགས་འབྲས་རྩེ་འཕུད་རྣམས་ལ་གཟེངས་བསྟོད་ཕྱག་འཁྱེར་དང་། བགྲོ་གླེང་གསུང་བཤད་གནང་མཁན་མཁས་པ་རྣམས་ལ་གཟེངས་སྟོད་ཕྱག་འཁྱེར་དང་ཐུགས་རྗེ་ལེགས་འབུལ་གནང་། ཚོགས་གཞོན་རྒན་ཡོན་ཏན་རྒྱ་མཚོ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་རྗེས་རིམ་གཉིས་སྨོན་ལམ་དང་། རྒྱལ་བའི་རྒྱལ་ཚབ་མ་བཅས་གསུང་འདོན་གནང་རྗེས་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས།།
