༄༅། །ཕྱི་ལོ་ ༢༠༢༢ ཟླ་བ་ ༡༡ ཚེས་ ༣༠ ཉིན་ཨོསྟྲི་ལི་ཡཱའི་དཔྱིད་དུས་གྲོས་ཚོགས་འཚོག་བཞིན་པ་དང་སྟབས་བསྟུན་ཨོསྟྲི་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལྷན་འཛོམས་ཀྱིས་བོད་དོན་དང་འབྲེལ་བའི་ལག་བསྟར་ལས་གཞི་ཁག་གཅིག་འཆར་འགོད་གནང་ཡོད།

དེ་ཡང་ཨོསྟྲི་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་གཙོ་སྐྱོང་བ་སྐུ་ཞབས་ཝེ་རན་ཨི་ཅ་ (Warren Entsch) ལགས་ཀྱི་གཙོ་སྐྱོང་གནང་བའི་ཚོགས་འདུའི་ཐོག་ཚོགས་པའི་གཙོ་སྐྱོང་བ་གཞན་སྐུ་ཞབས་སུ་སན་ཀྲེམ་པེ་ལི་མན་ ( Susan Templeman) ལགས་དང་། ལྕམ་སྐུ་ཇེ་ནིཊ་རེ་སི་ (Janet Rice) ལགས། ཨིས་ཀྲེ་ཕན་བྷེ་ཊི་ (Stephen Bates) ལགས། གྷེཊ་ཀེར་ནི་ (Ged Kearney) ལགས་བཅས་ལྷན་ཞུགས་གནང་ཡོད་པ་རེད།

གཞན་ཡང་ཚོགས་འདུའི་ནང་ཨོསྟྲི་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་དང་། ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས། ཨོསྟྲི་ལི་ཡཱའི་བོད་དོན་ལྷན་ཁང་གི་འཛིན་སྐྱོང་འགན་འཛིན་སྐུ་ཞབས་ཛོ་བྷེཊ་ཕོཊ་ (Zoe Bedford) ལགས། ཨོསྟྲི་ལི་ཡཱ་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཚེ་རིང་ལགས། སྐུ་ཚབ་དོན་ཁང་གི་དྲུང་ཆེ་ལྷ་དབང་རྒྱལ་པོ་ལགས་བཅས་ཀྱང་མཉམ་ཞུགས་གནང་ཡོད།

སྐབས་དེར་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་སྐུ་ཚབ་དོན་ཁང་གི་མ་འོངས་ལས་འཆར་ཁག་ངོ་སྤྲོད་དང་དེའི་སླད་ཚོགས་མི་རྣམས་ནས་རྒྱབ་སྐྱོར་མཐུན་གྲོགས་གནང་སྐྱོང་ཡོང་བའི་འབོད་སྐུལ་ཞུས་པ་མ་ཟད། ལྷག་པར་གྲོས་ཚོགས་འཐུས་མི་ལྕམ་སྐུ་ཇེ་ནིཊ་རེ་སི་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གནད་དོན་ཐོག་གླེང་སློང་དང་། གྲོས་ཚོགས་ནང་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་བསྒྲགས་གཏམ་སྒྲོགས་སྦྱང་གནང་བར་ཐུགས་རྗེ་ཆེ་ཞུས་ཡོད།

ཐེངས་འདིའི་ཚོགས་འདུའི་ནང་ཨོསྟྲི་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་བཞུགས་སྒར་རྡ་རམ་ས་ལར་ཕེབས་འཆར་སྐོར་དང་། ཨོསྟྲི་ལི་ཡཱར་གནས་སྡོད་བོད་མི་རྣམས་ཀྱི་གནད་དོན་དང་འབྲེལ་བའི་ལས་འཆར་ཁག་ཐེ་བའི་བོད་དོན་དང་འབྲེལ་བའི་གནད་དོན་ཁག་གཅིག་ཐོག་བགྲོ་གླེང་གནང་ཡོད་པ་བཅས།།