༄༅། །འདི་གར་བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པས་བཏང་གནས་ནང་འཁོད་དོན། བྱང་ཨ་རི་སྐུ་ཚབ་དོན་ཁང་དུ་གནས་ཚུལ་ཕུལ་འབྱོར་བྱུང་དོན།  ཨ་མེ་རི་ཀའི་མངའ་སྡེ་ལྦར་མོཎ་ཊ་ནང་ཡོད་པའི་ལྦར་མོཎ་ཊ་ (Vermont) ས་གནས་བོད་རིགས་སྤྱི་མཐུན་ཚོགས་པས་ <<བོད་ཀྱི་དུས་སྟོན་ཐེངས་བཅོ་བརྒྱད་པ།>> དེ་ཕྱི་ལོ་ ༢༠༢༢ ཟླ་བ་ ༡༡ ཚེས་ ༡༩ རེས་གཟའ་སྤེན་པའི་ཉིན་ས་གནས་སུ་ཚོགས་ཡོད།  བོད་རིགས་སྤྱི་མཐུན་ཚོགས་པའི་ཚོགས་གཙོ་བསོད་ནམས་དར་རྒྱས་ལྷ་ཁང་ལགས་ཀྱིས་ངོ་སྤྲོད་གནང་བར་གཞིགས་ན།  ལྦར་མོཎ་ཊ་བོད་རིགས་སྤྱི་མཐུན་ཚོགས་པས་བོད་ཀྱི་དུས་སྟོན་ཚོགས་པའི་དགོས་དམིགས་གཙོ་བོ་ནི་ཐུན་མོང་མ་ཡིན་པའི་བོད་ཀྱི་ཆོས་དང་རིག་གཞུང་གི་རིན་ཐང་ངོ་སྤྲོད་དང་།  བོད་དོན་དྲིལ་བསྒྲགས་བྱེད་རྒྱུ་དེ་ཡིན་ཞིང་།  བར་ལམ་ཏོག་དབྱིབས་ནད་ཡམས་ཀྱི་རྐྱེན་བྱས་ཏེ་ལོ་གསུམ་ཙམ་དུས་སྟོན་ཚོགས་ཐུབ་མེད་ཀྱང་།  ཁྱབ་ཁོངས་བོད་མི་ཡོངས་ནས་ནུས་པ་མཉམ་སྤུངས་ཀྱིས་འབད་བརྩོན་གནང་བ་ལ་བརྟེན་ནས།  འདི་ཆེས་ ༡༩ ཉིན་དུས་སྟོན་ཐེངས་བཅོ་བརྒྱད་པ་ཚོགས་ཐུབ་པ་བྱུང་བ་མ་ཟད།  ས་གནས་དེ་གའི་ཡུལ་མི་དང་།  མཐོ་སློབ་ཀྱི་དགེ་རྒན།  སློབ་ཕྲུག་བཅས་དུས་སྟོན་གཟིགས་པར་ཕེབས་པ་འདིས་ས་གནས་ཡུལ་མིར་བོད་དོན་དྲིལ་བསྒྲགས་བྱེད་རྒྱུར་ཕན་ཐོགས་གང་ལེགས་བྱུང་ཡོད་འདུག  ས་གནས་བོད་རིགས་སྤྱི་མཐུན་ཚོགས་པས་ <<བོད་ཀྱི་དུས་སྟོན་ཐེངས་བཅོ་བརྒྱད་པ།>> གྲ་སྒྲིག་གནང་བའི་སྐོར་ས་གནས་ཀྱི་ WCAX-TV བརྙན་འཕྲིན་གྱིས་རྒྱང་བསྲིངས་བྱས་ཡོད་པ་མ་ཟད།  བོད་རིགས་སྤྱི་མཐུན་ཚོགས་པའི་ཚོགས་གཙོ་བསོད་ནམས་དར་རྒྱས་ལྷ་ཁང་ལགས་ལ་དུས་སྟོན་སྐོར་བཅར་འདྲི་ཡང་ཞུས་ཡོད་པ་རེད།  

དེ་མིན་ཨ་མེ་རི་ཀའི་ནུབ་ཕྱོགས་སུ་ཡོད་པའི་བྱང་ཀེལ་བོད་རིགས་སྤྱི་མཐུན་ཚོགས་པས་ (Northern California) ཀྱང་འདི་ཚེས་ ༡༩ ཉིན་བཀའ་དྲིན་དྲན་པར་བྱེད་པའི་ཨ་རིའི་དུས་ཆེན་ཆེན་མོ་ཞིག་གི་དུས་ཚེས་དང་བསྟུན་ཏེ་  (Thanksgiving Lunch) ཞེས་པའི་བྱེད་སྒོ་ཞིག་གྲ་སྒྲིག་གིས།  ས་གནས་སྤྱི་མཐུན་ཚོགས་པར་རྟག་ཏུ་རྒྱབ་སྐྱོར་གནང་མཁན་གྱི་སྦྱིན་བདག་རྣམ་པ་དང་།  ཡུན་རིང་བོད་དོན་ལ་རྒྱབ་སྐྱོར་གནང་མཁན་ཕྱི་ནང་གི་འབྲེལ་ཡོད་མི་སྣ་ཡོངས་ལ་ཐུགས་རྗེ་ཆེ་ཞུའི་གསོལ་སྟོན་འདེགས་འབུལ་གནང་བ་དང་ཆབས་ཅིག་བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན་དང་།  བོད་དོན་དང་འབྲེལ་བའི་དཔར་རིས་སྣ་ཚོགས་འགྲེམས་སྟོན་གནང་བར་ཕྱི་རྒྱལ་སྐུ་མགྲོན་རྣམ་པ་ཐུགས་མཉེས་པོ་བྱུང་ཡོད་པ་མ་ཟད།  ལྷག་པར་བོད་ཀྱི་རིག་གཞུང་འཁྲབ་སྟོན་ལ་དམིགས་བསལ་གྱིས་ཡིད་དབང་འཕྲོག་པོ་བྱུང་འདུག་པའི་ཞིབ་ཕྲའི་གནས་ཚུལ་ཡུ་ཁྲུབ་དྲྭ་ཐག་འདི་ནས་གཟིགས་ཐུབ།ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་སྦྱིན་པ་མཐར་ཕྱིན་ལགས་ཀྱིས་ཐེངས་འདིའི་བྱེད་སྒོ་ལེགས་གྲུབ་བྱུང་བ་དེ་ནི།  གཙོ་བོ་ས་གནས་ཀྱི་རྒྱུན་ལས་ལས་ཟུར་རྣམས་དང་།  ཁྱད་ནུས་མི་འདྲ་བ་ཡོད་པའི་སྤྱི་མཐུན་ཚོགས་པའི་ཚོགས་མི།  གཟའ་མཇུག་སློབ་གྲྭའི་དགེ་སློབ་ཡོངས་བཅས་ཐུན་མོང་གིས་འབད་བརྩོན་གནང་བ་ལ་བརྟེན་ནས་བྱུང་བ་ཞིག་ཡིན། ཞེས་གསུངས་ཡོད།  །