༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༡ ཚེས་ ༡༠ ཉིན་རྒྱབ་ཆུ་ཚོད་ ༢ པའི་ཐོག་ཨ་རི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚོགས་པའི་འགན་འཛིན་ལྕམ་སྐུ་ནཱ་ཌིན་མཱ་ཨིན་ཛ་ (Nadine Maenza) མཆོག་གི་སྣེ་ཁྲིད་པའི་སྐུ་ཚབ་ཚོགས་ཆུང་ཞིག་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་སུ་འཚམས་གཟིགས་ཕེབས་སྐབས་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་ཕེབས་བསུའི་མཇལ་དར་ཕུལ་མཚམས་སྐར་ཆ་ ༤༥ ཙམ་རིང་ཕན་ཚུན་བཀའ་མོལ་ཞིབ་ལྷོད་གནང་ཡོད་པ་མ་ཟད། རྒྱ་ནག་གཞུང་གིས་སྲིད་བྱུས་དང་ལྡན་པའི་ཐོག་ནས་བོད་བརྒྱུད་ནང་བསྟན་རྩ་མེད་ཇི་ལྟར་བཟོ་བཞིན་པའི་ཐད་འགྲེལ་བརྗོད་དང་སྦྲགས་ཨིན་ཇི་དང་རྒྱ་ཡིག་ཐོག་ཡོད་པའི་ཤོག་གྲངས་ ༡༨ ཅན་ཞིག་ཡིག་ཐོག་ཕུལ་ཡོད།
དེ་ནས་ཕྱི་ཚེས་ ༡༤ ཉིན་གྱི་སྔ་དྲོ་ཚོུད་ ༩ ཙམ་ལ་ཨ་རི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚོགས་པའི་འགན་འཛིན་མཆོག་དང་། རྒྱ་ནག་ཡེ་ཤུའི་ཆོས་པ་རོགས་རམ་ལྷན་ཚོགས་ཀྱི་ཚོགས་གཙོ་ཆོས་དཔོན་ཕུ་ཞི་ཆུབ་ལགས། ཐའེ་ཝན་ཀྲང་ལའོ་ཆོས་ཚོགས་ཀྱི་སྤྱི་ཁྱབ་དང་ཆོས་དཔོན་ཁྲིན་ཞིན་ནན་ལགས། ཀྲ་ལའོ་ཆོས་ཚོགས་ཀྱི་སྤྱི་ཁྱབ་ལྷན་ཁང་གི་ཆོས་དཔོན་ཁྲི་ཡན་ལགས། ཐའེ་ཝན་གྱི་རྒྱ་ནག་འགྲོ་བ་མིའི་ཐོབ་ཐང་ལ་ཐུགས་ཁུར་མནའ་འབྲེལ་ཚོགས་པའི་ཚོགས་གཙོ་ཡང་ཞན་ཧུང་ལགས། དྲུང་ཆེ་ཆུབ་ལིང་ཨའོ་ལགས། ཐའེ་ཝན་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་མི་འགྱུར་གཡུ་སྒྲོན་ལགས་བཅས་ཀྱིས་ཐའེ་ཝན་གྲོས་ཚོགས་ཀྱི་ཚོགས་གཙོ་ (You Si Kun) མཆོག་དང་མཇལ་འཕྲད་ཞུས་ཡོད།
ཐའེ་ཝན་གྲོས་ཚོགས་ཀྱི་ཚོགས་གཙོ་མཆོག་གིས་ཚོགས་གཙོའི་མཇལ་འཕྲད་ཁང་དུ་མི་རེ་ངོ་རེར་ཕེབས་བསུ་དང་དྲན་རྟེན་སྐུ་པར་མཉམ་སྒྲོན་གནང་རྗེས་ཆུ་ཚོད་གཅིག་ཙམ་རིང་ཕན་ཚུན་བཀའ་མོལ་ཞུ་སྐབས་ཚོགས་གཙོ་མཆོག་གིས་ཐའེ་ཝན་ནང་མང་གཙོའི་བྱུང་རབས་ཐད་ངོ་སྤྲོད་གནང་གྲུབ་མཚམས་ཨ་རི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚོགས་པའི་འགན་འཛིན་མཆོག་གིས་རྒྱལ་སྤྱིའི་ནང་མིག་དཔེ་འོས་པའི་ཐའེ་ཝན་གྱི་ཡང་དག་པའི་མང་གཙོ་དང་ཆོས་དད་རང་དབང་ལ་བསྔགས་བརྗོད་དང་རྗེས་སུ་ཡི་རང་ཞུས་གནང་པ་དང་སྦྲགས་ཐའེ་ཝན་དུ་ཕེབས་དགོས་པའི་དམིགས་ཡུལ་གཙོ་བོ་ཇི་ཡིན་འགྲེལ་བརྗོད་གནང་།
སྐབས་དེར་ཐའེ་ཝན་བོད་ཀྱི་སྐུ་ཚབ་དོན་ཁང་གི་དྲུང་ཆེ་མི་འགྱུར་གཡུ་སྒྲོན་ལགས་ཀྱིས་གོ་སྐབས་དམ་འཛིན་གྱིས་རྒྱ་ནག་གཞུང་ནས་བོད་ནང་ཆོས་དད་རང་དབང་ལ་རྡོག་རོལ་བཏང་སྟེ་མི་ལོ་ ༦༣ ལྷག་ཙམ་འགྲོ་བཞིན་པ་དང་། ད་བར་བོད་ཀྱི་ཆོས་དང་རིག་གཞུང་། སྐད་ཡིག་རང་དབང་ཆེད་བོད་ནང་གི་བོད་མི་གྲངས་ ༡༥༧ ཙམ་གྱིས་རང་ལུས་མེར་སྲེག་གནང་ཡོད། འདི་ལོའི་ཕྱི་ཟླ་ ༧ པའི་ནང་མདོ་སྨད་རྔ་པ་ཀིརྟི་དགོན་པའི་དགེ་བཤེས་རྭ་ཆུང་དགེ་འདུན་ལགས་དང་དགེ་བཤེས་བསོད་ནམས་རྒྱ་མཚོ་ལགས་རྣམ་གཉིས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཀིརྟི་རིན་པོ་ཆེ་མཆོག་ལ་སྐྱབས་བསྔོ་ཞུ་རྟེན་ཕུལ་བར་བསྙད་དེ་རྒྱ་གཞུང་ནས་འཛིན་བཟུང་བཀག་ཉར་དང་བཙོན་འཇུག་ཁྲིམས་ཐག་གཅོད་པ་དང་། གཞན་ཡང་མདོ་སྨད་རྔ་པ་ནས་ཡིན་པ་ཚེ་རིང་ལྷ་མོ་ལགས་དང་རང་ལོ་ ༦༨ ལ་སོན་པའི་བསམ་སྐྱིད་ལགས་བཅས་ལ་བཙོན་འཇུག་བཀག་ཉར་སོགས་ཀྱི་ཛ་དྲག་གནས་སྟངས་དཔེ་མཚོན་དང་བཅས་འགྲེལ་བརྗོད་ཀྱིས་བོད་ནང་གི་ཛ་དྲག་གནས་སྟངས་ཐོག་མང་གཙོ་ཅན་གྱི་རྒྱལ་ཁབ་ཨ་རི་དང་ཐའེ་ཝན་གྱིས་གཙོས་པའི་རྒྱལ་ཁབ་གཞན་ནས་གོང་གསལ་ཆབ་སྲིད་བཙོན་པ་རྣམས་ཀྱིས་གཙོས་པའི་བོད་ཀྱི་ཆབ་སྲིད་བཙོན་པ་རྣམས་གང་མྱུར་གློད་གྲོལ་ཡོང་སླད་རྒྱབ་སྐྱོར་ཡོང་བའི་འབོད་སྐུལ་ཞུས་རྗེས་དོན་ཁང་ནས་པར་སྐྲུན་གནང་པའི་༼བོད་འདི་ལོ་རྒྱུས་ཐོག་ནས་རྒྱ་ནག་གི་ཆ་ཤས་ནམ་ཡང་མིན།༽ ཞེས་པའི་དཔེ་དེབ་ཕུལ་བར་གྲོས་ཚོགས་ཀྱི་ཚོགས་གཙོ་མཆོག་ཐུགས་དགྱེས་ཚོར་ཆེན་པོའི་ངང་བོད་ཀྱི་གནས་སྟངས་ལ་དུས་རྟག་ཏུ་ཐུགས་སྣང་གནང་བཞིན་ཡོད་པའི་བཀའ་མོལ་དང་དྲན་རྟེན་སླད་སྐུ་དཔར་མཉམ་སྒྲོན་གནང་།
ད་རེས་ཨ་རི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚོགས་པའི་འགན་འཛིན་དང་སྐུ་འཁོར་བཅས་ཐའེ་ཝན་དུ་ཕེབས་དགོས་དོན་གཙོ་བོ་ནི་ཞི་ཧིན་མནའ་འབྲེལ་གྱི་སྒྲོམ་གཞི་ཆེན་པོའིི་འོག་ཞི་ཧིན་ཆོས་དད་རང་དབང་གི་མནའ་འབྲེལ་འཛུགས་ཐབས་ཀྱི་ལས་འཆར་ཞིག་ཡིན་འདུག་པ་དང་། ཐའེ་ཝན་དུ་ཆོས་ལུགས་འདྲ་མིན་དང་ཐའེ་ཝན་གྱི་གནད་ཡོད་ཆབ་སྲིད་མི་སྣ་སོགས་མང་དག་དང་ཐུག་འཕྲད་གནང་རྒྱུའི་འཆར་གཞི་ཡོད་འདུག་པ་བཅས། །
